19
ዒስራዔኤሌ ዓሶኮ ሱኡጎ ቃዮና ቃዬ
1 ናንጊና ናንጋ ጎዳ ዒስራዔኤሌ ዓሶኮ ሱኡጎ ሂዚ ጌዒ ታ ቃያንዳጉዲ ታኣም ኬኤዜኔ፦
2 ዒንዳ ኔኤኮ ዞቦ ባኣካ ዎዚጉዴ ዞቢዳይ!
ሃጊ ዔቃ ዓዶ ዞቦ ባኣካ ዒዛ ዖቶርቂ
ናኣቶ ፔኤኮ ዲቼኔ፤
3 ዒዞኮ ናኣቶ ባኣካፓ ፔቴ ዛጊ ዒዛ ዲቼኔ፤
ዒዚያ ዶዲ ዞቢ ማዔኔ፤
ኬሞዋ ዔሪ፥ ዓሲ ሙዒሢያ ዓርቄኔ።
4 ዴራ ዒዛ ዑፃ ዒላቴኔ፤
ዔያታ ቦኦኬ ዔቶይዳ ዒ ዓዺንቴኔ፤
ዓንጊ ኪሬና ሲኢዾ ዒዛኮ ዑሪ
ጎቺ ጎቺ ጊብፄ ዓጮ ዔኪ ዒዛ ዔያታ ዓኣዼኔ።
5 ዒዛኮ ዒንዳ ማሊፃ ዒዞኮ ጊኢጊባኣሢ ዛጊ
ሃጊ ማዓ ዎዛ ቲቃዖ
ናኣቶይዳፓ ባጋሢ ዔኪ ዛጊ ዲቺሢና ዶዲ ዞቢ ማሂ ኬሴኔ።
6 ዒዚያ ሜሌ ዞቦና ዎላ ሃንቲሢ ዓርቄኔ፤
ዶዲ ዞቢያ ማዒ ኬሞዋ ዔሬኔ፤
ዓሲ ሙዒሢያ ዓርቄኔ።
7 ዔያቶኮ ዒዚ ዋርዲዮ ሻሄኔ፤
ካታሞዋ ዔያቶኮ ዒዚ ዶይሴኔ፤
ዒዚ ጉዻ ዎዶና ሳዖንታ ዒኢካ ናንጋ ዓሳ ቢያ ዲቃቲ ካራ ባይዜኔ።
8 ሜሌ ዴራ ቢያ ዒዛ ዑፃ ዔቄኔ፤
ቢያሢ ፔ ቤዛፓ ቤዛፓ ሙኬኔ፤
ዔያቶኮ ሮኦጮ ማላ ፒራሢ ሱዞዋ ዓጌኔ፤
ዔያቶኮ ዔቶይዳ ዒዚ ዓዺንቴኔ፤
9 ሲኢዾ ዒዛኮ ዓንጊ ኪሬና ዓርቂ ዓንጊ ዲሢ ጋርሲ ጌልዜኔ፤
ባብሎኔ ካኣቲ ኮራኣ ዔኪ ዓኣዼኔ፤
ላሚ ዑኡዛ ዒዛኮ ዒስራዔኤሌ ዓጮ ጌሜሮይዳ ዋይዚንቱዋጉዲ
ቱኡሲ ማኣሪ ዔያታ ዒዛ ጌልዜኔ።
10 ዒንዳ ኔኤኮ ዋኣሢ ዓቺዳ ቱኪንቴ ዎይኔ ሚሢጉዲኬ፤
ዋኣፆኮ ሚርጉማፓ ዔቄያና
ካኣፒንታ ዓኣፒያ ኩሜ ዎይኔ ሚሢ ማዔኔ።
11 ካኣፓ ዒዞኮ ዶዲ ማዔሢሮ
ካኣቶ ማዒ ዎይሣያ ዒኢፓ ኬስካንዳያ ሄላንዳኣና ዑጌኔ፤
ዬይ ዎይና ዲም ጌዔ ዴኤላፓ ዑሣ ባሼ ዼኤፔኔ፤
ዖዶሱማ ሚርጌ ካኣፖና ዎላ ዼጊ ጌዒ ጴዼኔ።
12 ጋዓንቴ ዻጋና ፃጳፓ ቱጊንቲ ሳዓ ሊካ ኬኤሪንቴኔ፤
ዓሲ ናንጉዋ ዳውላፓ ዔቃ፥ ዓባ ኬስካ ባንፆ ዢባራ ዬያ ሜልዜኔ፤
ዬያሮ ዓኣፓ ዲኢኔኔ፤
ዶዲ ማዔ ካኣፓኣ ሜሌኔ፤
ታሚያ ዬያ ሙዔኔ።
13 ሃሢ ጋዓንቴ ዓሲ ናንጉዋ ዳውሎይዳ
ዋኣፃባኣ ሜሎ ሳዓ ቱኪንቴኔ።
14 ዬያ ዎይኖኮ ፃጳፓ ታሚ ኬስኬኔ፤
ካኣፖንታ ዓኣፖዋ ቢያ ታማ ሙዔኔ፤
ካኣፓ ማይ ላሚ ዶዲ ማዓዓኬ፤
ካኣቶ ማዒ ዎይሣኒያ ዳንዳዑዋሴ፤
ዓካሪ ማሂ ማሂ ቃዪንታንዳ ቃያሢ ዬያኬ፤