22
ዳውቴ ዖሎና ባሻዖ ዓይናዼ ዓይኑሞ
(ዓይኑ. 18)
1 ናንጊና ናንጋ ጎዳ ሳኣዖኦሌንታ ሃንጎ ዒዛኮ ሞርኮንታይዳፓ ዓይሴሢሮ ሂዚ ጌዒ ፆኦሲ ቦንቾም ዳውቴ ዓይናዼኔ፦
2 «ናንጊና ናንጋ ጎዳ ታና ዓውሳ ላላሢ
ታኣኮ ዒ ዶዶ ዋርዲያሢኬ።
3 ናንጊና ናንጋ ጎዳ ታና ዓውሳ ላላሢ ማዔሢሮ
ዒዛና ዎላ ኮሺ ታ ናንጋኔ፤
ዒዚ ጊቲማጉዲ ታጊዳ ሙካ ባኮ ቃዛኔ፤
ታና ማኣዳሢ፥ ዒዚ ኮሺ ታና ናንጊሳኔ፤
ዒዚ ታና ዓውሳያታሢሮ
ሜቶይዳፓ ታና ካፓኔ፤ ዓውሳኔ።
4 ጋላታ ኮይሳ ናንጊና ናንጋ ጎዳሢ ታ ሺኢቃኔ፤
ዒዚ ታ ሞርካፓ ታና ዻቂሻኔ።»
5 «ሃይቢ ታኣኮ ካራ ባይዚ ታና ማንጌኔ፤
ባይሲንታ ዲጲ ሙኪ ታና ዔኤዼኔ፤
6 ጋፒንፃባኣ ዒጊቻ ዔቶኮ ሱዛ ታና ማሬኔ፤
ሃይቢ ፒራ ታኣም ፒሪንቴኔ።
7 ሜታሢ ታና ሄሌ ዎዶና
ናንጊና ናንጋ ጎዳ ታኣኒ ሺኢቄም
ታና ዒ ማኣዳንዳጉዲ ታ ፆኦሲ ታኣኒ ዖኦጬም
ፔኤኮ ጌኤዦ ማኣራ ዓኣዖ ታ ዑኡዞ ዋይዜኔ፤
ታኣኒ ሺኢቂ ዒላታ ዒላቶዋ ዒ ዋይዜኔ።»
8 «ፆኦሲ ዻጋዼሢሮ
ሳዓ ዓጊፄኔ፥ ጎጋይቄኔ፤
ጫሪንጮ ማዢ ዔቂሶና ፃጳ ቤዞ ሃሺ ዓጊፄኔ።
9 ዒዛኮ ሲኢዻፓ ዻጋ ጩቢ
ዒዛኮ ዻንጋፓ ሙዓ ታሚ ሎስታ
ሃሣ ሚቻ ቄንሢያ ኬስኬኔ።
10 ዒዚ ጫሪንጮ ዳርዚ ሊካ ኬዴኔ፤
ዒዛኮ ቶኮ ዴማ ዲም ጌዔ ሻኣሬ ዓኣኔ፤
11 ኪሩቤሌ ጌይንታ ባኮይዳ ዴዒ ዒ ባራኔኔ፤
ዒዚ ዢባሮ ባኣካ ጋኣሲ ዓኣያ ማዒ ጴዼኔ።
12 ፔና ጉቤ ዒ ዹሚና ዓኣቼኔ፤
ዒርዚ ካርሤ፥ ዲም ጌዔ ሻኣሬ ዒዛ ኮይላ ቡኬኔ።
13 ዒዛኮ ቤርታ ዓኣ ዜኤሊንፆፓ
ታሚ ዔኤቲ ኬስኬኔ፤
14 ናንጊና ናንጋ ጎዳ ጫሪንጫፓ ጉጉንሤኔ፤
ዼኤፖ ፆኦዛሢ ፔ ዑኡዞ ዋይዚሴኔ።
15 ፔኤኮ ሂኢዦና ዒ ዱኪ
ሃሣ ዜኤሊንፆ ፓልዖና ዳውሲ
ፔኤኮ ሞርኮ ዒዚ ላኣሌኔ።
16 ናንጊና ናንጋ ጎዳሢዮ! ኔኤኮ ሞርኮ ኔ ጎሬ ዎዶና
ኔኤኮ ዻጎ ዑኡዞ ኔ ዋይዚሴ ዎዶና
ዼኤፖ ባዞኮ ጋፖ ሳዓ ጴዼኔ፤
ሳዓ ማዢንቴ ዓይፆ ካራ ፔጋዼኔ።»
17 «ናንጊና ናንጋ ጎዳ ሎፓ ኩጮ ዳኪ ታና ዓርቄኔ፤
ዼኤፖ ዔቶ ዋኣፆ ዴማፓ ጎቺ ታና ኬሴኔ።
18 ዑሣ ዓኣዼ ታኣም ዎልቃዼ ታኣኮ ሞርኮና
ታና ዒፃ ዓሶ ቢያሢፓ
ናንጊና ናንጋ ጎዳ ታና ዓውሴኔ።
19 ታኣም ካራ ባይቃዛ ሞርኬ ማዒ ዔያታ ዔቄንቴ
ናንጊና ናንጋ ጎዳ ታና ካፔኔ።
20 ናንጊና ናንጋ ጎዳ ታና ማኣዲ ፑርታፓ ኬሴኔ፤
ታ ናንጎና ዒዚ ዎዛዼሢሮ
ፑርታፓ ታ ቶላንዳ ዳልጊ ካራ ታኣም ዒ ጌሤኔ።»
21 «ታኣኒ ፂሎ ባኣዚ ማዻሢሮ
ናንጊና ናንጋ ጎዳ ዬያ ዛሎ ማሂ ታኣም ጪጋኔ፤
ታኣኮ ፒዙሞ ማዾ ጎይፆ
ኮሺ ባኣዚ ዒ ታኣም ማዻኔ።
22 ናንጊና ናንጋ ጎዳ ዓይሣ ጎይፆ ታ ሃንቴኔ፤
ታ ፆኦዛሢፓ ታና ዱማሳ ዻቢንቲ ታ ማዺባኣሴ።
23 ናንጊና ናንጋ ጎዳኮ ዎጎ ቢያ ማዺ ታ ኩንሤኔ፤
ዒዚ ዓይሤ ዳምቦዋ ታ ቦንቼኔ።
24 ታ ዒዛ ቤርታ ጌኤሺኬ፤
ጎሜያ ታ ማዺባኣሴ።
25 ታኣኒ ዒዛ ቤርታ ማዼ ባኮ
ኮዦ ማዾንታ ጉሙርቂንቲፆንታ
ናንጊና ናንጋ ጎዳ ዔራያታሢሮ
ዒዚ ዬያ ዛሎ ማሂ ታኣም ጪጋኔ።»
26 «ናንጊና ናንጋ ጎዳሢዮ!
ኔኤም ጉሙርቂንታ ዓሶም ኔ ጉሙርቂንታያኬ፤
ፒዜ ዓሶማኣ ኔ ፒዜኬ፤
27 ጌኤዦ ዓሶም ኔ ጌኤሺኬ፤
ዎቦ ዓሶም ኔ ዎቦኬ።
28 ሼሌዔ ዓሶ ኔ ዓውሳኔ፤
ዖቶርቃ ዓሶ ጋዓንቴ ኔ ቦርሲሳኔ።
29 ናንጊና ናንጋ ጎዳሢዮ! ኔ ታኣኮ ፖዓሢኬ፤
ታጊዳ ዓኣ ዹሞ ኔ ፖዒሳኔ።
30 ታኣኒ ሞርኮ ባሻንዳ ዎልቄ ኔ ታኣም ዒንጋኔ፤
ዔያታ ዋርዲ ዴዔ ቤዞ ኮኦሚ ታ ጌላንዳጉዲ
ዎልቄ ታኣም ኔ ዒንጋኔ።»
31 «ፆኦሲ ማዻ ማዾና ፓጫ ባኣዚ ባኣያኬ!
ናንጊና ናንጋ ጎዳኮ ቃኣላኣ ፒዜኔ፤
ዒዛና ካናዻ ዓሶም ቢያ ዒ ጊቲማኬ።
32 ናንጊና ናንጋ ጎዳፓ ዓታዛ ሜሌ ፆኦሲ ባኣሴ፤
ዒዛይዳፓዓቴም ካናዾ ባኣዚያ ባኣሴ።
33 ታኣም ዶዱሞ ዒንጋሢና
ጎይፆ ታኣም ጊኢጊሻሢያ ናንጊና ናንጋ ጎዳኬ።
34 ዒዚ ታኣኮ ቶኮ ጌንዖ ቶኪጉዲ ዶዲሻኔ፤
ጌሜሮ ጎኦቦይዳ ዓልቱዋዖ ታ ዔቃንዳጉዲ ማኣዳኔ። ዒምባ. 3፡19።
35 ኩጮ ታኣኮ ዒ ዖልዚ ዔርዛኔ፤
ዶዶ ቆኦዞ ታ ጎቻንዳጉዲ ኩጮዋ ዒዚ ዶዲሻኔ።
36 ታ ፆኦዛሢዮ!
ታና ዓውሳ ጊቲሞ ታኣም ኔ ዒንጋኔ፤
ኔ ዎልቃ ታና ዶዲሻኔ።
37 ታኣኮ ቤርታ ዓኣ ባኮ ዒ ሺኢሻኔ፤
ዬያሮ ቶካ ታኣኮ ዹቂንቱዋሴ።»
38 «ታ ሞርኮ ዳውሲ ታ ዓርቃኔ፤
ታ ዔያቶ ባይዙዋዖ ጊንሢም ማዑዋሴ።
39 ላሚ ዔቁዋ ጎይሢ ታ ዔያቶ ባይዛኔ፤
ታኣኮ ዔያታ ቶኮ ዴማ ሎኦማኔ።
40 ዖሎ ታ ዖላንዳ ዎልቄ ታኣም ኔ ዒንጋኔ፤
ዖሎና ታ ሞርኮ ኔ ታና ባሺሳኔ።
41 ታ ሞርካ ታ ቤርታፓ ጳሽካንዳጉዲ ኔ ማሃኔ፤
ታና ዒፃ ዓሶ ቢያ ኔ ባይዛኔ።
42 ዔያቶ ማኣዳ ዓሲ ኮዒ ዔያታ ዒላታኔ፤
ጋዓንቴ ዔያቶ ማኣዳ ዓሲ ፔቴታዖ ባኣሴ፤
ናንጊና ናንጋ ጎዳ ዔያታ ዔኤላኔ፤
ጋዓንቴ ዒዚ ዔያቶም ዬሁዋሴ።
43 ሲላሊ ማዓንዳያ ሄላንዳኣና ታ ዔያቶ ጊኢጫኔ፤
ጎይሢዳ ዓኣ ቶርጶጉዲ ታ ዔያቶ ዳኣፃኔ።»
44 «ፑርቶ ዴሮይዳፓ ኔ ታና ዓውሴኔ፤
ዴሮ ቢያ ዎይሣንዳጉዲ ኔ ታና ዶኦሬኔ፤
ታ ዔሩዋ ዴሬ ታ ዴማ ዎርቃኔ።
45 ፃንጎ ማዔ ዴራ
ታ ዛሎ ዋይዚ ታኣም ዓይሢንታኔ፤
ታና ቦንቺ ዚጊያ ዚጋኔ።
46 ጫርሹማ ዔያቶኮ ባይቄም ዒጊጪ ሜታዺ
ጎጋይቂ ፔኤኮ ዋርዲዮይዳፓ ኬስኪ
ታ ባንሢ ሙካኔ።»
47 «ናንጊና ናንጋ ጎዳ ናንጊና ናንጋያኬ፤
ታኣኮ ካናዾ ፆኦዛሢ ጋላቲንቶም፤
ታና ዻቂሻ ዼኤፖ ፆኦዛሢ ዼግ ዼጊ ጎዖም!
48 ዒ ታ ሞርኮ ኮሚ ኮሞ ማሃኔ፤
ዴሮ ቢያሢ ታ ዴማ ማሂ ዒ ዎይሢሳኔ።
49 ታ ሞርካፓ ታና ዒ ዓውሳኔ፤
ፆኦዛሢዮ!
ታ ሞርኮ ኔ ታና ባሺሲሳኔ፤
ጌኖ ማዾ ማዻ ዓሶፓ ኔ ታና ዓውሳኔ።
50 ዬያሮ ዴሮ ባኣካ ታ ኔና ጋላታኔ፤
ኔ ሱንፆዋ ዓይኑሞና ታ ዼኤፒሳኔ። ሮሜ 15፡9።
51 ዒዚ ካኣታሤ ካኣቲም ባሺሢ ዒዚ ዒንጋኔ፤
ዒዚ ቲሽኪ ዶኦሬ ዳውቴና ዜርፆናም፤