18 ዬሱሴ፦ «ፆኦሲ ካኣቱማ ዓይጎ ኮኦኪንሢና ኬኤዚንታንዳይ? ሃሣ ጊንሣ ዓይጎና ታ ቤኤዛንዳይ? 19 ፔቴ'' ዓሲ ፔኤኮ ቱኮ''ና ባኮ ባኣካ'' ዜርቄ ሴናፒጬ ጌይንታ ሚፄሎ ዜርፆ ማላኔ፤ ዒዛ ዑጊ ዼኤፒ ሚሢ ማዓኔ፤ ካፓኣ ዒዞኮ ካኣፖይዳ ማኣሪ ማዣኔ» ጌዔኔ።

20 ዬሱሴ ሃሣ ላሚ፦ «ፆኦሲ ካኣቱሞ ዓይጎና ዎላ'' ታ ቤኤዛንዳይ? 21 ፆኦሲ ካኣቱማ ፔቴ'' ላኣሊ ሙኑቆ ካፂሳንዳጉዲ ዺቦ'' ዺኢሎ ዲርካኣና ዋሃ ሙኑቃ ፃኣዛ ማላኔ» ጌዔኔ።

22 ዬካፓ ዬሱሴ ዬሩሳላሜ ባንሢ ዴንዳዖ ካታሞና ካታሞኮ ዙሎ''ናይዳ ቢያ ዔርዚ ዔርዚ ዓኣዻኔ። 23 ዬማና ፔቴ'' ዓሲ፦ «ጎዳሢዮ! ዻቃንዳዞንሢ ዻካ'' ዓሲዳ?» ጌይ ዖኦጫዛ፥ ዬሱሴ ዔያቶም ማሃዖ፦ 24 «ኩንዖ ካሬ''ሎና ጌላኒ ኮሺ'' ዶዱዋቴ፤ ዬኖ ካሬ''ሎና ጌላኒ ኮዓ ዓሳ ሚርጌኬ፤ ጋዓንቴ ጌላኒ ዔያታ ዳንዳዑዋሴ፥ ታ ዒንሢም ጋዓኣኬ። 25 ማኣሮ ዓዴ ዔቂ ካሬ''ሎ ዎዻንዳኔ፤ ዒንሢ ዙላ'' ዔቂ ዔኤሊ''ንቲ ‹ጎዳሢዮ! ሃዳራ ካሮ'' ኑም ቡሌ''!› ጋዓዛ፥ ዒዚያ ‹ዓንካፓ ዒንሢ ሙኬቶዋ ታ ዒንሢ ዔሩዋሴ› ጌይ ዒንሢም ማሃንዳኔ። 26 ዬኖ ዎዶ''ና ዒንሢ ‹ኔኤና ዎላ'' ኑ ሙዒ ዑሽኬኔ፤ ኑ ጉርዶይዳ ኔ ዔርዜንቴሞ!› ጋዓንዳኔ። 27 ዒዚ ላሚ ሃሣ ‹ዓንካፓ ዒንሢ ሙኬቶዋ ታ ዒንሢ ዔሩዋሴ! ዒንሢ ሃይ ፑርቶ ዓሳ ታ ኮራፓ ሺኢኩዋቴ!› ዒንሢ ጋዓንዳኔ። [b] 28 ዒንሢ ዓብራሃሜንታ ዪሳኣቄንታ ያይቆኦቤንታ ሃሣ ፆኦሲ ማሊፆ ኬኤዛዞንሢ ቢያ ፆኦሲ ካኣቱሞይዳ ዛጋንዳኔ፤ ዒንሢ ጋዓንቴ ዙላ'' ኬኤሪንቲ ዓቴ'' ዎዶ''ና ዬኤፒና ዓቺ ዻይሢና ዒንሢም ማዓንዳኔ። [c] 29 ሚርጌ ዓሳ ዓባ'' ኬስካ ካሮ''ና ጌላ ካሮ''ናይዳፓ ሃሣ ሳዖኮ ዾኦሎ''ና ኬዶ''ናይዳፓ ሙኪ ፆኦሲ ካኣቱሞይዳ ሙዎ ሙዖ ቤዛ ዴዓንዳኔ። [d] 30 ዬያሮ ሚርጌ ላቤ''ያ ሃሣ ጊንፃዼያ ማላ ዓሳ ቤርታ ማዓንዳኔ፤ ጎኦቢ ቤርታዻያ ማላ ዓሳ ጊንሢም ማዓንዳኔ» ጌዔኔ። [e]

31 ዒማ''ና ፔቴ'' ፔቴ'' ፔርሴ ዓሳ ዬሱሴ ኮራ ሙካዖ፦ «ሄሮዲሴ ኔና ዎዻኒ ኮዓሢሮ ሃይፓ ሜሌ'' ቤሲ ዴንዴ» ዒዛም ጌዔኔ።

32 ዬሱሴ ጋዓንቴ ዔያቶም፦ «ዒንሢ ዴንዲጋፓ ዬያ ዉኡካሢም [f] ‹ሃኖ''ና ዚሮና ፑርቶ ዓያኖ ታ ኬሲ''፥ ሃርጊንቴ ዓሶዋ ፓሣንዳኔ፤ ሃይሣሳ ኬሎ''ና ማዾ'' ታኣኮ ታ ጋፒሳንዳኔ› ጋዓኔ ጎዑዋቴ። 33 ዓካሪ ሃኖ'' ማዔቶዋ ዚሮ፤ ሃሣ ሂንቶታቴያ ዬሩሳላሜ ታ ዓኣዺፆሮ ዔቃንዳኔ፤ ዓይጎሮ ጌዔቶ ፆኦሲ ማሊሢ ኬኤዛሢ ዬሩሳላሜይዳፓ ዓታዛ ሜሌ'' ቤስካ ሃይቃንዳያ ኮይሱዋሴ።

34 «ዬሩሳላሜ! ዬሩሳላሜ! ኔኤኒ ፆኦሲ ማሊፆ ኬኤዛዞንሢያ ዎዻኔ፤ ኔ ባንሢ ዳኪንታ ኪኢቶ'' ዓሶዋ ሹቻ ኔ ዹዓኔ፤ ኮይዳ ፔኤኮ ጋኣዞ ዴማ'' ናኣቶ'' ቡኩሳሢጉዲ ታኣኒያ ሚርጌና ናኣቶ'' ኔኤኮ ቡኩሳኒ ኮዔኔ፤ ዒንሢ ጋዓንቴ ዒፄኔ። 35 ዬያሮ ማኣራ ዒንሢኮ ባዔ ማዒ ዓታንዳኔ፤ ዒንሢያ ‹ፆኦሲ ሱ'ንፆና ሙካሢ ዓንጂንቴያኬ› ጋዓንዳ ኬሎ'' ሄላ''ንዳኣና ፔቴ''ታዖ ታና ዒንሢ ዴንቃዓኬ» ጌዔኔ። [g]