1 ታ ዒሾንሦ! ታ ሚሾንሦ! ቦንቺንቴ ኑ ጎዳሢ ዬሱስ ኪሪስቶሴ ዒ'ንሢ ጉሙርቃያ ማዔሢሮ ፔቴ''ሢ ባጋሢዳፓ ባሻያ ማሂ ዛጊ ዱሙሞ ሳዛ'' ጌሢፖቴ። 2 ጎዖንቴ ላምዖ ዓሲ ዒንሢ ቡኪንቴ ቤዞ ሙኬኔ ኑ ጎዖም፤ ፔቴ'' ዓሢ ኬኤሎ''ይዳ ዎርቄ ዢኢሮ ዓኣሢ ሃሣ ሚዛጲ ማኣዖ ማይንቴ ዖርጎቺ ዓሲ፥ ባጋሢ ቱርጫዺ ኪንቄ ማኣዖ ማይንቴያ ማንቆ ዓሲ ማዔቶ፥ 3 ዒንሢ፡ ሚዛጶ ዓፒሎ ማይንቴ ዓሢ ቦንቺ፦ «ሃኖ' ኮዦ ቤዜሎይዳ ዴዔ» ጌዒጋፓ ማንቆ ዓሢም ጋዓንቴ፦ «ኔኤኒ ያኣሶ ዔቄ ጋዓንዳኔ፤ ሃንጎ ዒንሢ ዒዛ ሃይካ ሙኪ ቶኮ ዴማ'' ዴዔ» ጋዓንዳኔ። 4 ዬያይዲፆና ዒንሢ ባኣኮ''ይዳ ዒንሢ ፔቴ''ሢ ሂርኪዲ ባጋሢ ባሼ ማሂ ዱሙሞ ሳዛ'' ጌሣያ፥ ሃሣ ፑርቱሞና ዓሲዳ ዎጋያ ማዒባኣዓዳ?

5 ታኣኒ ዒንሢ ናሽካ፥ ታኣኮ ዒሾንሦ! ሚሾንሦ! ዋይዙዋቴ፤ ፆኦሲ ዒዛ ጉሙርቂ ጎናሲ ዔኪፆና ዔያታ ዖርጎቺ ማዓንዳጉዲና ዒዛ ናሽካ ዓሶም ሃጊ ማዓንዳ ዎዛ ማሂ ዒንጌ ካኣቱሞ ዔያታ ዻካላንዳጉዲ ሃያ ሳዖይዳ ዓኣ ማንቆ ዓሶ ዒዚ ዶኦሪባኣዓዳ? 6 ዒንሢ ጋዓንቴ ማንቆ ዓሶ ቦሃኔ፤ ዒንሢ ሜታሳ ዓሶና ሃሣ ዎጎ ቤዞ ዒንሢ ዔኪ ዔኪ ዓኣዻ ዓሳ ዖርጎጮ ዓሶቱዋዓዳ? 7 ዒንሢ ዛሎ''ና ዔኤሊ''ንታ ቦንቺንቴ ሱ'ንፆ ዒንሢኮ ጫሽካሢ ዔያቶቱዋዓዳ?

8 ጌኤዦ ማፃኣፖይዳ፦ «ዓሲ ዓዳ'' ኔና ማሂ ናሽኬ» ጌይንቲ ፃኣፒንቴ ፆኦሲኮ ቦንቺንቴ ዎጎ ዒንሢ ኩንሣያ ማዔቶ ኮሺ ዒንሢ ማዻኔ። [a] 9 ዓሶ ባኣካ'' ዒንሢ ዱማሲሢ ጌሤቶ ጋዓንቴ ጎሜ ዒንሢ ማዻኔ፤ ዎጎኮ ዒንሢ ዑሣ ዓኣዺፆና ዎጋ'' ፔ ቶኦኪና ዒንሢም ዻቢንቶ ዻዋንዳኔ። 10 ዓሲ' ፆኦሲ ዓይሢፆ ቢያሢዳፓ ፔቴ'' ዻባዖ፥ ሃንጎ ዓቴ''ሢ ቢያ ኩንሤያታቶዋ ቢያሢ ዒዚ ዻቤያ ማዓንዳኔ። 11 «ማቾ ሃሣ ዓኒ ማዒባኣ ዓሲና ላሂፖ» ጌዔ ጎዳሢ ዬያጉዲ ሃሣ «ዓሲ ዎዺፖ» ጌዔኔ፤ ኔኤኒ ማቾ ሃሣ ዓኒ ማዒባኣ ዓሲና ላሂባኣያ ማዔቶዋ ዓሲ ኔ ዎዼቴ ዎጎ ኔ ዻቤኔ። [b] 12 ዒንሢ ጌስታኣና ሃሣ ማዻኣና ዎጋ'' ጎሜ ዓይላቶይዳፓ ጉቤ ኬሴ'' ዓሲጉዲ ማዑዋቴ። 13 ዓይጎሮ ጌዔቶ ፆኦሲኮ ዎጋ'' ዓቶም ጎውዋ ዓሲም ፔኤሮ ዓቶም ጎውዋሴ፤ ያዺ ማዔቶዋ ዓቶም ጌይሢ ዎጌ ባባሻኔ።

14 ታ ዒሾንሦ! ታ ሚሾንሦ! ዓሲ፦ «ዬሱሴ ታ ጉሙርቃኔ» ጋዓዖ፥ ጉሙርቂፆ ኮሺ ማዾና ፔጋሲባኣቶ ዒዛ ዓይጎ ማኣዳ''ንዳይ? ጉሙርቂፃ ዒዛኮ ዒዛ ዻቂሻኒ ዳንዳዓ? 15 ኮኦኪንሢና፡ ማኣዓ ባኣዚ''ና ሙዓ ባኣዚ''ና ባኣ ጌርሲንሢ ሃሣ ጌሮንሢ ማዓ ዓሲ ዒንሢኮ ዓኣንቴ፥ 16 ዒንሢ ዔያቶ ናንጎም ኮይሳ ባኮ ዒንጉዋዖ ጉሪ፦ «ኮሺ ዓኣዹዋቴ! ዒንሢም ዖይዾንጎ! ሙዒ ሚሽኩዋቴ!» ጌዔያታቶ ዔያቶ ዓይጎ ማኣዳ''ንዳይ? 17 ዬያሮ ኮሺ ማዾይዳፓ ዱማዼ ዬሱሴ ጉሙርቂሢ ፔ ቶኦኪና ሃይቄያኬ።

18 ጋዓንቴ፦ «ኔኤኒ ታ ዬሱሴ ጉሙርቃኔ ጌዒ ዖቶርቃያታቶ፥ ታ ኮሺ ማዾ ማዻያኬ ጋዓ ዓሲ ዓኣቶ፥ ታኣኒ ዒዛም ኔኤኮ ዬሱሴ ጉሙርቂፆ ኔ ማዾ''ይዳፓ ዱማሲ ታና ቤኤዜ፤ ታኣኒያ ታ ማዾ''ና ዬሱሴ ጉሙርቂፆ ታኣሲ'' ኔና ቤኤዛንዳኔ» ጋዓንዳኔ። 19 ኔኤኒ፦ «ፔቴ'' ፆኦሲ ዓኣኔ ጌዒ ጉሙርቃኔ» ዬይ ኮሺኬ፤ ጋዓንቴ ጉሙርቂፆ ፑርቶ ዓያናኣ ጉጉሙርቃኔ፤ ሃሣ ዒጊጪያ ጎጎጋይቃኔ። 20 ኔኤኒ ሃይ ዔኤያሢ! ማዾይዳፓ ዱማዼ ጉሙርቂሢ ዓኣፒ ባኣያ [c] ማዔሢ ኔ ዛጋ? 21 ኑ ዓዳሢ ዓብራሃሜ ፔ ናኣዚ'' ዪሳኣቄ ዒንጎ ባኮ ሺኢሺ ካኣሽኮ ቤዞይዳ ፆኦሲም ዒንጎ ባኣዚ'' ማዓንዳጉዲ ሺኢሼ ዎዶ''ና፥ ማዾና ፂሊ''ባኣዓዳ? [d] 22 ዬይ ጉሙርቂፃ ማዾና ዎላ'' ማዔሢና ጉሙርቂፃኣ ማዾና ጎናዼሢ ኔ ዛጋ? 23 ጌኤዦ ማፃኣፖይዳ፦ «ዓብራሃሜ ፆኦሲ ጉሙርቄኔ፤ ፆኦሲያ ዒዛ ፔ ዓሲ ማሄኔ» ጌይንቴ ቃኣላ'' ኩሜኔ፤ ዬያይዲፆና ዓብራሃሜ ፆኦሲኮ ላጌ'' ጌይንቴኔ። [e] 24 ዓካሪ ዓሲ ፂላ''ሢ ጉሙርቂሢና ሌሊቱዋንቴ ማዾና ዎላ'' ማዔሢ ኔ ዛጋኔ።

25 ዓኒ ባኣያ ዞኦዛ ኮኦማ፥ ሬዓባ ጌይንታ ላኣሌላ ዒስራዔኤሌኮ ኪኢቶ'' ዓሶ ፔ ማኣራ ዔኪ ሾኦቺንሢፆና ሃሣ ጊንሣ ሜሌ'' ጎይሢና ፑኒንቲ ዔያታ ቶሊ'' ዴንዳንዳጉዲ ማሂፆና ፔ ማዾ''ና ፂሊ''ባኣዓዳ? [f]

26 ሼምፖይዳፓ ዱማዼ ዓሽኪ ሃይቄያታሢጉዲ ማዾይዳፓ ዱማዼ ጉሙርቂሢ ያዼ ሃይቄያኬ።

<- ያይቆኦቤ ኪኢቶ'' 1ያይቆኦቤ ኪኢቶ'' 3 ->