1 ታ ዒሾንሦ ታ ሚሾንሦ! ጎኔ ኬኤዞያታቴ ታኣኒ ዒንሢ ዔርዜሢ ሃጊ ዒንሢ ኪሪስቶሴ ጉሙርቂፆና ዶዲባኣ፥ ናይ ማዔያ ሃሣ ሃያ ዓጮ'' ማሊፆና ዓኣ ዓሲ ማሂ ማዓንዳኣፓዓቴም ዶዲ ዓያናና ዓኣ ዓሲ ማሂ ታ ዒንሢ ዔርዛኒ ዳንዳዒባኣሴ። 2 ዶዲ ሙኡዚ'' ሙዓኒ ዳንዳዑዋያ ዒንሢ ማዔሢሮ ታ ዒንሢ ዑሼሢ ዲኢቂ ማዓንዳኣፓዓቴም ዶዲ ሙኡዚ'' ታ ዒንሢ ሙኡዚ''ባኣሴ፤ ሃሢታቴያ ዒንሢ ዶዲ ሙኡዚ'' ሃጊ ሙዓኒ ዳንዳዑዋያኬ። [a] 3 ዎይቲ ጌዔቴ ሃሢያ ዒንሢ ሃያ ዓጮ'' ዓሶ ማሊፆና ዓኣያኬ፤ ዎሊ ዒንሢ ቂኢራያና ማርማያናታሢሮ ሃያ ዓጮ'' ዓሶ ማሊፆና ዓኣኔ ጌይሢቱዋዓዳ? ፆኦሲ ዓሲ ማዒፃ ዒንሢኮ ዓቴም ሃያ ዓጮ'' ዓሶ ዒንሢ ማዒባኣዓዳ? 4 ዒንሢዳፓ ፔቴ''ሢ፦ «ታ ጳውሎሴ ዓሲኬ» ጋዓዛ፥ ባጋሢ ሃሣ፦ «ታኣኒ ዓጲሎሴ ዓሲኬ» ጌይፆና ዒንሢ ፆኦሲ ዓሲ ማዒፆ ሃሺ'' ሃያ ዓጮ'' ዓሲ ማዒባኣዓዳ? [b]

5 ዓካሪ ዓጲሎሴንታ ጳውሎሴንታ ዓይጎዳይ? ዔያታ ዒንሢ ኪሪስቶሴ ጉሙርቃንዳጉዲ ማሄ ፆኦሲም ማዻ ዓሶኬ፤ ዔያታ ፔቴ'' ፔቴ''ሢ ማዻሢ ጎዳ ዔያቶ ማዻንዳጉዲ ዓይሤ ጎይፆኬ፤ 6 ዜርፆ ታ ዱኡቄኔ፤ ዓጲሎሴ ዋኣፆ ዑሼ''ኔ፤ ባቃልሲ ዑጊሴሢ ጋዓንቴ ፆኦሲኬ። [c] 7 ዬያሮ ዼኤፖ ማዾ'' ማዼሢ ባቃሎ'' ዑጊሴ፥ ፆኦዛሢ ማዓንዳኣፓዓቴም ዱኡቄሢንታ ዋኣፆ ዑሼ''ሢንታቱዋሴ። 8 ዜርፆ ዱኡቄሢና ዋኣፆ ዑሼ''ሢና ሄኮኬ፤ ዬያታ ፔቴ'' ፔቴ''ሢ ፔኤኮ ማዾ''ጉዴያ ማዼ ዛሎ'' ዒንጎ ባኮ ዔካንዳኔ። 9 ዓይጎሮ ጌዔቴ ኑኡኒ ፆኦሲም ዎላ'' ማዻዞንሢኬ፤ ዒንሢ ጋዓንቴ ፆኦሲኮ ጎዦና ማኣሮና ማዓያኬ። 10 ፆኦሲ ታኣም ዒንጌ ኮሹሞ ዒንጊፆጉዴያ ኮሺ'' ዔራ፥ ማኣሪ ማዣ፥ ሃኣሚጉዲ ቦኦኮሎ ታ ቦኦኮልቄኔ፤ ባጋሢ ታኣኒ ቦኦኮልቄሢዳ ማኣሮ ማዣኔ፤ ጋዓንቴ ፔቴ'' ፔቴ''ሢ ዎማይዲ ዔሪ ማዣንዳቴያ ኮሺ'' ዔራኒ ኮይሳኔ። 11 ዓይጎሮ ጌዔቴ ፔቴ''ና ቦኦኮልቂንቴማፓ ዓታዛ ዖኦኒያ ሜሌ'' ጊዳ'' ቦኦኮልቃኒ ዳንዳዑዋሴ፤ ዬይ ቦኦኮላሢ ዬሱስ ኪሪስቶሴታሢሮኬ። 12 ዬያ ቦኦኮላሢዳ ዎርቄና ማዔቴያ ቢራ ዓንጊና ሃሣ ኮሺ'' ሚዛጲ ሹቺናኣ ማዖም ሚሢና ሃሣ ማኣቲና ማዔቴያ ሃውሊ''ና ማዣይ ዓኣቶ፦ 13 ፔቴ'' ፔቴ''ሢ ዓይጎና ማዤቴያ ዔርታንዳ ዎጌ ኬሊ'' ሙካንዳኔ፤ ዬና ኬላ'' ፔቴ'' ፔቴ'' ዓሳ ማኣሮ ማዤሢ ዓይጎናታቴያ ታሚዳ ዓጊንቲ ዛጊንታንዳሢሮ ዱማዺ ዔርታንዳኔ። 14 ማኣሮ ማዤ ዓሢኮ ማዻ'' ታሞና ሙይንቱዋዖ ዶዲ ዓቴቴ ዬይ ዓሢ ፔ ማዾ'' ዛሎ'' ዒንጎ ባኮ ዔካንዳኔ። 15 ማዻ'' ታሚና ሙይንቲ ባይቄ ዓሢ ጋዓንቴ ማዻ ዛሎ'' ዒንጎንዶ ባኮይዳፓ ዓታንዳኔ፤ ዬይ ያዺ ማዔቴያ ዓሢ ታማ'' ጋውሌንቴ ዓቴያጉዲ ማዒ ዻቃንዳኔ።

16 ዒንሢ ዒንሢ ቶኦኪና ፆኦሲኮ ጌኤሺ ማኣሪ ሃሣ ፆኦሲኮ ዓያና ዒንሢዳ ናንጋያታሢ ዒንሢ ዔሩዋዓዳ? [d] 17 ዓካሪ ዓሲ ፆኦሲኮ ጌኤዦ ማኣሮ ሻሄቴ ፆኦሲ ዒዛ ዓሢ ባይዛንዳኔ፤ ዓይጎሮ ጌዔቴ ፆኦሲኮ ጌኤዦ ማኣራ ዒዛም ዱማዼያታሢሮኬ፤ ዬይ ጌኤዦ፥ ዱማዼ ማኣራ ዒንሢኬ።

18 ዖኦኒያ ፔና ጌሾፓ፤ ሃያ ዓጮ'' ዔራቶ ጎይፆና ዔራ ማሂ ፔና ዛጋ ዓሲ ዓኣቶ ፆኦሲኮ ጎኔ ዔራቶ ዴንቃኒ ፔና ዔኤያ ማሂ ዛጎንጎ። 19 ዓይጎሮ ጌዔቴ ሃያ ዓጮ'' ዔራታ'' ፆኦሲ ቤርታ ዔኤያቶታሢሮኬ፤ ዬይያ፦