1 ኪሪስቶሴ ጉሙርቃ ዓሶም ኬሲ''ንታ ሚኢሾ ዛሎ''ኮ ጋላቲያ ዓጫ'' ዓኣ፥ ኪሪስቶሴ ጉሙርቃ ዓሶም ታ ዓይሤ ጎይፆ፥ ዒንሢያ ያዺ ማዹዋቴ። [a] 2 ታኣኒ ሙኬም ዒንሢ ሚኢሾ ኬሱ''ዋጉዲ፤ ቃልሾ ኬሎ'' ጋራ ቢያ ዉዴ ዉዴ ፔቴ'' ፔቴ''ሢ ሚኢሾ ዴንቃ ጎይፆ ሚኢሻፓ ፔኤኮ ዱማሲ ኬሲ'' ኬሲ'' ጌሦንጎ። 3 ታኣኒ ዒንሢ ኮይላ'' ሙካዖ ዒንሢ ዶኦራንዳ ዓሳ፥ ሚኢሾ ዬሩሳላሜ ዔኪ ዓኣዻንዳጉዲ ዋርቃታ ፃኣፒ ዔያቶና ዳካንዳኔ። 4 ታ ዓኣዻንዳያ ኮይሳያ ማዔቴ ታኣና ዎላ'' ዔያታ ዓኣዻንዳኔ።

5 ሜቄዶኒያ ጊዴና ጌዒ ዓኣዻኒ ታ ማሌሢሮ ዒኢና ዓኣዻዖ ዒንሢ ኮይላ'' ታ ሙካንዳኔ። [b] 6 ታኣኒ ዴንዳ ቤዞ ቢያኮ ጎይፆም ማዓ ማኣዶ ዒንሢ ታኣም ማዻንዳጉዲ ጎዖንቴ ታ ዒንሢ ኮራ ዴዒ፥ ባርጎዋ ታ ዒኢካ ዓኣሣንዳያ ናንዳኔ፤ 7 ሓሢ ዴንዶ ዴንዳዖ ታ ዒንሢ ዻካ''ና ዛጋኒቱዋንቴ ጎዳ ጌዔቴ ዻካ'' ዖዶሲ ዎዴ ታ ዒንሢና ዴዓንዳኔ ጌዒ ሃጊ ማዓንዳ ዎዛ ታ ጌሣኔ። 8 ጋዓንቴ ጴንፄቆስፄ ጌይንታ ቦንቾ ኬሎ'' ሄላ''ንዳኣና ዔፕሶኔይዳ ታ ዴዓንዳኔ። [c] 9 ዓይጎሮ ጌዔቴ ሚርጌ ማዾኮ ካራ ታኣም ቡሊ''ንቴኔ፤ ታና ዒፂ ማካ ዓሳ ጋዓንቴ ሚርጌኬ። [d]

10 ፂሞቴዎሴ ዒንሢ ኮይላ'' ሙኬቴ ሂርጋ ባኣያ ዒንሢ ኮይላ'' ዒ ዴዓንዳጉዲ ዒዛ ማኣዱ''ዋቴ፤ ዓይጎሮ ጌዔቴ ዒዚ ታጉዲ ጎዳ ዬሱሴ ዓይሤ ማዾ'' ማዻያታሢሮኬ። [e] 11 ዬያሮ ዖኦኒያ ዒዛ ቦሁዋጉዲ፤ ዒዚ ዒሾንሢና ዎላ'' ታ ኮራ ማዒ ሙካንዳኔ ጌዒ ታ ካፓያታሢሮ፥ ታ ኮይላ'' ዒ ኮሺና ሙካንዳጉዲ ጎይፆኮ ዒዛም ኮይሳ ባኣዚ'' ማኣዲ''ሢና ዎዛሲ ዳኩዋቴ።

12 ኑ ዒሻሢ ዓጲሎሴ፥ ሜሌ'' ዒሾንሢና ዎላ'' ዒንሢ ኮይላ'' ዓኣዻንዳጉዲ ሚርጌና ታ ሺኢቄንቴ ዒዚ ሃሢ ዒንሢ ኮይላ'' ሙካኒ ዳንዳዒባኣሴ፤ ዒዛም ጊኢጌ ዎዴና ጋዓንቴ ዒንሢ ኮይላ'' ዒ ሙካንዳኔ።

13 ጴጩዋቴ፤ ጉቤ ዒናፓ ኪሪስቶሴ ጉሙርቁዋቴ፤ ዶዱዋቴ፤ 14 ዒንሢ ማዻ ባኮ ቢያ ናሹሞና ማዹዋቴ።

15 ታ ዒሾንሦ! ታ ሚሾንሦ! ዒስፂፓኖሴ ማኣሮ ዓሳ ዓካይያይዳ ቤርታሲ ኪሪስቶሴ ጉሙርቃ ዓሲ ማዔሢና ፆኦሲ ዓሶ ማኣዳ''ኒ ዒናፓ ናሽካያ ማዔሢ ዒንሢ ዔራኔ። [f] 16 ዬያቶጉዴ ዓሶና ዔያቶና ዎላ'' ማዺ ማዺ ላባዞ''ንሢም ቢያ ዒንሢ ዓይሢንታንዳጉዲ ታ ኬኤዛኔ።

17 ዒስፂፓኖሴንታ ፔርዶናፆሴንታ ዓካይቆሴንታ ታ ኮራ ሙኬሢሮ ታ ኮሺ'' ዎዛዼኔ፤ ዓይጎሮ ጌዔቴ ዒንሢ ታ ኮይላ'' ባኣያ ማዒፆና ታኣም ፓጬ ባኮ ዔያታ ኩንሤኔ። 18 ዔያታ ታናንታ ዒንሢንታኮ ዒኖ ሃውሺሴኔ። ዬያሮ ዬኖጉዴ ዓሳ ጋዓ ባኮ ዋይዙዋቴ።

19 ዒሲያ ዓጮ''ይዳ ዓኣ፥ ኪሪስቶሴ ጉሙርቃ ዓሳ ዒንሢ «ኮሺዳ?» ጋዓኔ፤ ሃሣ ዓቂላና ጲሪስቂላና ዬያጉዲ ዔያቶ ማኣራ ቡኪንታ፥ ኪሪስቶሴ ጉሙርቃ ዓሳ ቢያ ጎዳ ዬሱሴ ሱ'ንፆና ሚርጌና ዒንሢ «ኮሺዳ?» ጌዔኔ። [g] 20 ሓይካ ዓኣ፥ ኪሪስቶሴ ጉሙርቃ ዓሳኣ ቢያ ዒንሢ «ኮሺዳ?» ጋዓኔ፤ ዎሊኮ ጌርሲንሢጉዲ፥ ናሹሞና ሄርቂ ሄርቂ ዎሊ ዔኤሉ''ዋቴ።

21 ታኣኒ፥ ጳውሎሴ ሓያ ሳራሢፆ ኪኢቶ'' ዒንሢም ታ ኩቻ ፃኣፔያኬ።

22 ጎዳ ናሽኩዋ ዓሲ ዓኣቶ ጋዳንቂንቴያ ማዖንጎ፤ ኑ ጎዳሢዮ፥ ሙኬ![h]

23 ጎዳ ዬሱሴኮ ኮሹማ ዒንሢና ዎላ'' ማዖንጎ።

24 ዬሱስ ኪሪስቶሴ ሱ'ንፆና ዒንሢ ቢያሢ ታ ናሽካኔ።

<- ቆሮንቶሴ ዓሶም 1 15