Goti Iqueqä Kukŋuä Qänakŋä Iqueqä

Yätamäkqä kukŋuä hiŋuiqäŋä iquvi

Bukä tque, Goti Iqueqä Kukŋuä Qänakŋä Iqueyi. Jisasi Iqu qua buta ävautä, qäukuä yätuŋqä aŋgi yqaŋgqetaŋi, Goti Iqu Iqueqä ämaqä iquauŋi, kukŋuä tä äqäpŋqä äwikqe. Jisasi Iqu qua täuŋqä maquvepqä änä itaŋga, Goti Iqu, Iqueqä Kukŋuä Kiŋganäŋä Ique, Mosisi iquesä, hiŋuä-tqä iquautä, äqäpŋqä äwikqe. Iqu, ämaqä-qune Iqueqä suqeŋqätä, äwiŋqeŋqätä, wäuŋuä eeqänäŋä Iqu imäkkqeŋqätä, näqŋqä äŋguä metuŋquä änätapkqe. Iiŋqe ne Iqueŋi, “Äŋguiqä” ätuätanä, Iqueqä yoqe haqeu mamäutuŋquänänji.

 

Goti Iqu kukŋuä tä Iqueqä ämaqä iquau kiŋganä vqaŋga, iqua Grikä iquauqä aŋä-kukŋuä du äqäkuwi. Quvokuä hui ae äpäwqaŋga, kukŋuä äma ikämiŋuwä iqua, qokä-apäkä kuapänäŋi Grikä iquauqä aŋä-kukŋuiŋqä maqŋqä etaŋgä äqumbiyi, aŋä-kukŋuä hui-mända äkunmäkpŋqä ipäqäkuwi. Itaŋga wiyä-kukŋui, quväukuä 1382 iuŋi, Goti Iqueqä kukŋui Iŋglisi-mända äkunmäkkuwi. Ga 1989 iuŋi, kukŋuä Tok Pisinqä iu-mända äkunmäkkuwi. Itaŋi 2016 iuŋi, ne Goti Iqueqä yätamäkqä dutanä, Iqueqä Kukŋuä Qänakŋä Iqu, aŋä-kukŋuä Menya iu-mända qäpu äkunmäkkque. Ne kukŋuä Grikä iutä, wiyä-kukŋuä iquaqutä a ätäutanä, kukŋuä iqueqä quatiŋqä ämenitaŋi, aŋä-kukŋuä Menyä iu-mända äkunmäkmiŋque. Iiŋqä-pqe ne Goti Iqueŋi, “Äŋguiqä” ätuätanä, Iqueqä yoqe haqeu mamäutuŋquänänji.

 

Mosisi iqu äpäkonätŋqä itä, Israitqä iquauŋi, Goti Iqueqä kukŋuä-suqä aŋgi ätuätäqäŋgaŋi, tii ätukqe.

 

He Israitqä iquenä, qätä äŋguänä nyipu! Neqä Naqä Goti Hanjuwä Iqu, Kiqä-kiuänänji. Iŋi si tqä Goti Hanjuwä Naqä Iqueŋi, äwqetä, qeqä-quuvqetä, yäŋänäqŋqetä Ique äwinyätnä, Iquenyqänä kuapänä kiŋguätŋqeqä. Itaŋga kukŋuä täŋga etqäqe, si hui mimäuqä, kŋuä yqänä kiyätaŋguti pmettŋqänänji. Tqä ymeqä iquauŋi, kukŋuä iiŋiŋqe yäŋänäqŋqä motquatŋqänänji. Ga tqä aŋä äpmanä iu, qaŋä äwätnä iu, hiqaqä äwitnä, pämä ävautŋnäŋgaŋä-pqe, kukŋuä iiŋä iquauŋqä tquätŋqänänji.

(Kukŋuä-suqä 6:4-7)

 

Aŋä-kukŋuä Menya tqä iqune Goti Iquenyqä tääqe, Iqueqä Dŋä Äŋguä Iqu, bukä tquesa, yäŋänäqŋqä nemäktŋqä ätuätqäŋu. Iutaŋi ne Iquenyqä quuvqä eqiyätanä, Iqu suqä ikikinyäŋinä imäkätŋqä-pa, imäkätanä, ga Iqueŋi yeeqä iwimäkatuŋquänäyi.