Wəhebʉrə̂ 8

Yésus jɨ wúsʉ́ Ajəlácɨ á ofada sɔ̧ á gúgwáan dɨ̂

1 [a]Lúú ciyá á isâ sə́ ŋgə́ cɨ ínɨ wúsə nə́: mbií Ajəlácɨ á ofada shé bʉ́sə nə ndɨ́ wə́ nɨ; nyɔɔŋg nyə á mə́ kə ji jiya gúmə́d joŋ dɨ́, mbwə̂ məncwûm mə́ Zɛmbî á ŋkul nyɛ̂sh dɨ́ yɛ́, 2 [b]nyɔɔŋg ŋgə́ sá isɛ́y í fada fwámɛ́ kʉ́l Zɛmbî njúl yí, fwámɛ́ banda *mə́túnʉga dɨ́ yɛ́. Dâŋ banda mə́túnʉga, Cwámba wə́ nyə a lwɔ̧́, kú bə múúd.

3 Bwə́ dʉ tə̂l Ajəlácɨ á ofada nə́ a dʉ́g kala ísâ búúd bwə́ yə́ Zɛmbî yí, a dʉ nə́mə́ sá mə́túnʉga. Í á jɨɨ nə́ wúsʉ́ Ajəlácɨ á ofada bə́g nə́mə́ nə jé sâ á kálá Zɛmbî yí. 4 A mbə̂m bə shí gaád ɨɨ́, a kú bə fada. Mbɔ̂! A kú bə, nəcé ofada bwə́ ŋgə́ kala Zɛmbî isâ wá bʉ́sə, bwə́ ŋgə sɛ̂y nda Mə́cɛ̧ɛ̧ mə́ Moyîz mə́ ŋgə́ cɨ nə́. 5 [c]Wáŋ yə́lə bwə́ ŋgə́ yə Zɛmbî gúmə́ yí wúsə njɨ yuug á fwámɛ́ gúmə́ jɨ́ joŋ dɨ́ yí, sə́ jee nə́mə́ cɨ nə́ jísə shishîm á fwámɛ́ ísɛ́y byɔɔŋg. Nəcé, ja Moyîz nyə a lwɔ̧̂ banda mə́túnʉga yí, Zɛmbî nyə á cɨ nə nyə nə́: «Dʉgɨ́, wo ɔ bá sá sâ jɛ̂sh bɛ̧ yuug mə́ á lwó wo mbʉ́ŋʉ́d yí.» 6 [d]Njɨ, jaá ga dɨ, isɛ́y Yésus nyə a lə́g yí í bul bə fwámɛ́ ísɛ́y, jɨ́ ntɔ́ nəcé nyə wə́ jɨ́ lɨ́ɨ́-njɨ mpə́dʉ́gá sə́nɔ̂ŋ Zɛmbî shú sɔ̧ í ntɔ̧́ yí. Sɔ̧ jɔɔŋg í ntɔ̧ nəcé məŋkaagə́ mɛ́ mə́ ntɔ̧́ mɔɔŋg mâ sɔ̧ áshúshwóógʉ̂.

7 Sɔ̧ áshúshwóógʉ́[e] í á mbə̂m bə kú nə sá á jumʉ́g ɨɨ́, í á shígɛ́ nywá nyiŋgə jɨɨ nə́ sɔ̧ ábɛɛ̂ í zə́g sɨ̂y, zə cɛ́nd gwo. 8 [f]Njɨ, Zɛmbî nyə á jum kúl búúd jé, nyə nə́:

Fwála í zag, mə Cwámba mə ŋgə cɨ ntɔ́.

Fwála mə́ bá sá sɔ̧ ágúgwáan yí.

Mə bá sá sɔ̧ jɔɔŋgʉ́ nə kúl búúd Izʉrəyɛ̂l,

nə kúl búúd Yúda.

9 Jâŋ sɔ̧ í ábʉ́lɛ́ bə nda jɔɔŋg

mə́ á sá nə osɔ́ɔ́ŋgʉ́ báŋ

jwɔ́w mə́ á bii bwo mbwə́d

wú nə bwo Igîpten yí.

Nda bwə́ á shígɛ́ baagʉlə jâŋ sɔ̧ nə́,

mə á shígɛ́ ná nə́mə́ ŋgə bísh bwo.

Mə Cwámba mə mə́ cɨ ntɔ́.

10 Sɔ̧ mə́ bá sá nə kúl búúd *Izʉrəyɛ̂l yí, í bá bə nə́,

ja mwɔ̂w mɔɔŋg mə́ bá cɔ̧́ yí,

mə bá wá bwo məcɛ̧ɛ̧ mâm mítə́dʉ́gád,

mə cilə bwo mwo mílámʉ́d.

Mə Cwámba mə mə́ cɨ ntɔ́

mə bá bə Zɛmbî wáŋ,

bwə́ bə kúl búúd jâm.

11 Muud nyə abʉ́lɛ ná nyiŋgə

jɨ́ɨ́gʉli múúd jɨ́ nyə kúnə́-kúnə yɛ́,

ŋkí *mínyɔŋʉ̂ yé nə́:

«Í jɨɨ nə́ wo mpúg Cwámba».

Nəcé bɛ̂sh bwə́ bá mpu mə,

bɛ̂sh, tɛ́ɛ́d nə mwántombú kala nə cúmbá muud.

12 Mə bá juu bwo nə olɨ́lɨŋgɨ̂ báŋ,

mə yîl *mísə́m myáŋ mə́dɨ́ tə́dʉ́gád.

13 [g]Ja Zɛmbî ŋgə́ lás lə́sʉ́ sɔ̧ á gúgwáan yí, a mə́ ŋwa nə́ sɔ̧ áshúshwóógʉ́ dɛ́ fwála í á mə́ ntɔ̧. Sâ jísə́ nə́ dɛ́ fwála í á mə́ ntɔ̧ yí, í mú sâ acwúlû, jâŋ í wál bá zə kəndɔw koogʉ́.

<- Wəhebʉrə̂ 7 Wəhebʉrə̂ 9 ->