1 Adshumbic aid mayan bëdan padpiden ismeoaposhi. Adoac Nuquin Papa abided cuidadec unësaid aton Madobëdquio tsadte dapan tabadacnuësh matses unëstiapimbo icmetequid acte bëdambo icquid nushan nibëdquidquio chëuëdsho ispombi. 2 Nuquin Papa yacnuëshquio choec chëuëdec ambo tabadquido Esus tantiaquido tabadaid shubu nënantanquio chëuëdposh. Aid cuëmambi matses unëstiapimbo icmetequid cuëtetsen icposh. Baded-badedquiec bacuëquidquio niosh. Inchëshën ushë choan-choanquiec badedquio bacuëquid niosh. Aid cuëte podo nidaid utsi-utsiec yacno tabadquido bëdambo icmetequid niosh. —Aton Mado abided cuidadec unësaid tantiaquido abëdi tabadmequin Nuquin Papan unëstiapimbo icquid icmendac —camenuen aid acte ismeposhi. —Matses utsi-utsiec Esus tantiaquid icsho abëdi tabadmequin Nuquin Papan daicsabudtiapimbo icquid icmendac —camenuen cuëte aton podobëdta ismeposhi. 3 Aden abitedi bëdambo icmiac cuidtequido nibëdquio iquendac. Icsambo icquido nibëdnuc Nuquin Papa aton Mado Esusbëd tabadacnoshon aid daëdi tantiaquiec Esus tantiaquido tabadendac. 4 Adec: —Con bacuëbo nec —quequin Nuquin Papan abi cuëmëdquid dada uaquin bësiaidon Nuquin Papambo bëisquiec tabadendac. —Nidaidën tabadec bëdamboec tabadquido Nuquin Papabëd tabadec abipadquio bëdamboshë yanendac —camenuen aden ismeposhi. 5 Ambo bëdambouidquio yec inchëshenquio iquendac. Nuquin Papa bëchamauanquiecquidëmbi ushëmbouidquio iquendac inchëshaid tantiadenquio yec. —Aden abi tantiaquido bëdamboen isquin ënenquio icquin bëdamboshë icmendac. Chuiquid dapabo icmiac Esusbëdtambi ënenquio icquin namendac —quequin ismeposhi.

6 Adshumbic mayan bëdan chuioaposhi. —Tantia. Mibi chuinu. Nuquin Papan Mayanën tantiamiac: “Yuecash adquid iquendac,” quequin min tsusedpabo isadaidbon abimbo chuiquin dada uapampic. Adembidi aton Mayanën namiaid icquin abimbo chuiquin mibi dadpen ismebanombi. “Nëbi adquid iquendac. Utsi yuecash iquendac,” quequin mibi tantiamenuen ismebanombi —queposh Nuquin Papan abi yacnoshon uaid mayan bëda.

7 Adnubini Esusënquio naden chuiposh. —Chieshtoenquio icquin ëbi tantiata. Nëbimbobi nidaidën choec budebique. Nëid dada uaid isquin ëbi tantiaquiota. Adsho mibi bëdambo icmendambi —caposhi Esusën.

8 Uan nebi. Abimbo chuiquin nëid dada uaombi. Aden mayan bëdan chuibanquin ismeposhi. Aden ënquimbi ismiaquini: —Nuquin Papapadquidien nechitec —quetanec danëshën tinquebuduidpoc ëbi ismequid mayan bëda ismenuec. 9 Adshobini: —Padi. Aden ëbi ismenda. Mibipadquid Nuquin Papan yuabidi nebique. Ëndenquimboshë Nuquin Papan tantiamiac min tsusedpabo isadaidbon ambi chiaidquio dada uapampic. Nëbi ëmbi ismeboed tantiaquin Nuquin Papan chiacpadomboen naquido aton yuabobidi nec. Adquidbidi nebi aton yuambo. Nuquin Papauidtsëqui tantiaquin aden ismeta —caposhi mayan bëdan.

10 Adashic padpidec: —Ëmbi chuibamboedbëdta ëmbi ismeboedtedi chuiquin dada uata. “Nëid dada uaid isec onquequin ma Esus tantiaquidon tantianu. Nëbi adquid yanushe. Chieshtoenquio icquin Esus tantiec ma tabadnu,” queshun dada uata. 11 Nëbimbobi Esus chonoc Esus tantiesabo badedquio bëdamboec tabadcuentiapimbo iquendac. Abi icsaid badedquio ëntiapimbo iquendac. Esus tantiaquido abi bëdamboec tabadacpadquiecbidi bëdamboec tabadpashun —queposh mayan bëda.

12 Adnubini Esusën chuioaposh. —Chieshtoenquio icquin ëbi tantiata. Nëbimbobini choendac. Choshon matsesën naidtedi tantiaquin icsaido cuidquimbi ëbi tantiaquido ëbëdi tabadmendambi. 13 Nuquin Papapadquidquio nebi. Ëmbi tantiacmaid nibëdnuc abitedi comapenen tantiaquidquio nebi. Nidaid uabi yec ictenedi nëbi adquidquio yec nibëdantiapimbo icquid nebi. Adquid yec abitedishun Icbombo nebi.

14 Icsambo icboedon ëbi tantiasho icsaisabimboecnuc Nuquin Papan bëdamboen isendac. Adshun ëbi yacnombo puduedmequin unëstiapimbo icquido icmendac unëstiapimbo icmiantequid cuëte bacuë chemiacbimboen. 15 Padnuen ëbi tantiesabo bëdamboen isacmaido Nuquin Papa yacno puduedtiapimbo iquendac. Nadquid icsambo icquid caimbi. Nëidic nënëchoquidobëdi cuëte podo chodcashun unës uante bunquido. Nëidic dada cuididimbo. Nëidic chido chishpida. Nëidic aton chidopenquio chudquido. Nëidic aton bënëpenquio chudmequido. Nëidic cuesanquido. Nëidic papa quequin ambi nacnenaidi tantiaquido. Nëidic abi bunaiduidquio naic muauanquido. Aidtedi Nuquin Papa yacno puduedtiapimbo iquendac.

16 Ëmbi chiacpadomboen mayan bëdan mibi ismebamposh. “Ma ëbi tantiaquidon iste dada uanu,” quequin ëmbi chiacpadomboen mibi ismebamposh. Nuquin Papan dada uamiac matsesën: “Dabidën tsyuecquid yec abitedimbo chuiquid dapa iquendac,” quequin chuipampid nebi. Isadaidbon cainaidquio nebi. Utsin: “Dëniacnu,” cadtiapimbo icquid nebi. Adquid icquin matses abitedimbo namendambi —quequin chuiposhi Esusën.

17 Adsho tantiashun Nuquin Papan Mayanën tantiamiacpadomboen chuiquin: —Nëbimbobi Esus chonoshe. Aidquio tantiabenta —caindac Esus tantiaquidon Esus tantiesabo chuiquin. Ëmbi chuiboed tantiaquidtedishun: —Nëbimbobi chonoshe. Aidquio tantianuna —cac bëdambo ictsiash. Adsho tantiash Esus tantiesabo acte bunacbimboec Esus tantiate bunsho Nuquin Papan bëdamboen isendac. Nuquin Papa bëdamboen ismenuen menete nibëdnuc Esusuidi tantiasho Nuquin Papan bëdamboen isquin abëdi tabadmendac.

18 Tantia. Ëmbi chuiboed tantiaquido chuinu. Nuquin Papan: —Nadquid iquendac. Yuecash utsi iquendac —quequin ëbi ismeboedtedi dada uaombi. Ëmbi dada uaboed tsitënquin ambembi chiaid dada uainda. Ëmbi chuibocpadomboen Nuquin Papan mibi cuidtsiashe. 19 Adembidi ëmbi dada uaboed utsi uainquio icquin abimbo chuita. Ëmbi chuibocpadomboen Nuquin Papan mibi unëstiapimbo icquid icmenquio ictsiashe. Adembidi bëdamboshë yacno abëdi mibi tabadmenquio ictsiashe.

20 —Ma aidtedi tantianu —quequin Esusën chiacpadomboen mayan bëdan aidtedi ismeposhi. Ëmbi chuibocpadomboen Esusën: —Nëbimbobini choendac —caposhi. Adsho tantiashun: —Ai, nëbimbobi chota —capombi.

21 Mibitedi Esus tantiaquidotedi tantiaquin: —Ambi nabocpadomboen Nuquin Icbo Esusën bëdamboen isquin bëdambo icmepashun —caimbi. Padi. Aidtedi chuiquin dada uaombi.

<- Esusën Uan Ismiaid 21