Mateyon Dada uaid 25

Chido 10tedshun cainaid

chiaid

1 Adshumbic Esusën ompoacbimboen chuiquin abi chote ushë tantienquio icte chuipondash. —Tantia. Mibi chuinu. Nuquin matses isadaidbon nacpadomboen chido bednuequid aton chido bedtanec inchëshëmbi chosho aton matsesën bëquedtanquid. Bëquedtanec choec shubun puduedash cuishonquec aidbëd pec tabadquid. Adquido icpac caondash. Chido 10tedishun: “Champi bedtanec choquid bëquedtanu,” queshun aton tabote bëchin taboadquid icbo-icboen buanuen sanambededpac caondash. 2 Aid chido 5tedi tantienquio icquido icnubi 5tedbidi bëdamboen tantiaquido icpac caondash. 3 Tantienquio icquidon: “Tabote bëchi naimëdsho cushtonon buanu,” quenquio icquin bëchi uesadbudtsaid taboteuidtsëqui sananquin caimpac caondash. 4 Padnuen bëdamboen tantiaquidon naimëdsho cushtonoequin tabotebëdta sedunten cushtoaid bëchi sananquin caimpac caondash. 5 Aden cainaqui: “Chido bedtanu,” quianec nidboed choenquio icsho isash abitedi ushcastoash ushcuededpac caondash. 6 Inchësh poctsemboen: “Choeque. Bëquednu. Nid,” cac 7 isucunshun chidobon tabonoen tabote dëbedpac caondash. Adoshon bëdamboen tantiaquidon ambi bëboed bëchi cushtonobien 8 icsamboen tantiaquidon: “Bëchi beccho. Con na naimëdeque,” caquien bëchi bëboedën 9 bëdamboen tantiaquidon: “Padi. Mibi meniac con na uesadtsiash. Aid uesadan shubun puduedabi nuquitedi inchështsiac. Piucquid menequin bëchi cushtoquid baded cushtometan,” capac caondash. 10 Adoac bëchi bedec nidnubien chido bedtanec dada chopac caondash. Chosho bëdamboen tantiaquidon aton tabote taboshon chido bedtanec choquid bëquedtampac caondash. Adtanec abëdi choash puduedshun bëtashte puduedtiapimbo icnuc bëdamboen bëtashpac caondash. 11 Adnubien bëdamboen tantienquio icquido bëchi bedtanec chopac caondash. Choshon shëcuë bëtashacsho isun: “Shëcuë shëcne, buchi. Ëbitsen puduednu,” 12 caquien chido bedquid: “Padi. Ëmbi tantiacmaido mibi nec,” quepac caondash.

13 Ëmbi chuiboed tantiashun chido icsamboen tantiaquido tanenda. Bëdamboen nabi icsho: “Ëmbi tantiacmaid mibi neque. Puduedenda,” aido cacbimboen ëmbitsen Nuquin Papa yacno puduedmenquio icquin cacumechitomane. Ëbi chote ushë tantiadenquio icnuc: “¿Nëbida con Icbo chopeba?” quequin ëbi bëdamboen tantiec ëmbi chiacpadec bëdamboec tabadta —quepondash Esus abëd icquido chiec.

Icbon piucquid daëd uaid chiaid

(Duc 19.11-27)

14 Adshumbic abi tantiaquidon ambi chiacpadomboen nate Esusën ompoacbimboen chuioapondash. Ënapen nidnun aton piucquid dadpen dayun uaquidën aton yuabo: “Ëbi piucquid daëd uashunta,” quequin chuipac caondash. 15 “Nëidën bëdamboen tantiaquidquio icquin con piucquid ëbi daëd uashuntsiash,” queshun aton yua piucquid 5tedi meniac caondash. Adshumbic: “Nëidëntsen bëdamboen tantiaquin adembidi con piucquid ëbi daëd uashuntsiash,” queshun utsitsen 2tedi menepac caondash. Adshumbic: “Nëidëntsen bëdiactsëc tantiatsëcquin adembidi ëbi con piucquid daëd uashuntsëctsiash,” queshun utsitsen piucquid abentsëcquiobi menetsac caondash. Adanec nidpac caondash icbo. 16 Adnubien piucquid 5tedi bedboedën aton matsesën nacpadomboen piucquid daëd uanuen utsibo menequin yuecshun ambi meneboed udictsëc dëniacquin bedoapac caondash. Sincoted icboedi 5tedbidi bedoapac caondash 10ted icnuc. 17 Adembidi piucquid 2ted meneboedën 2bidi daëd uapac caondash 4tedi icnuc. 18 Padnuen abentsëc meneboedën chieshquin aid daëd uainquio icquin ambi uëdëshcaboed shëcuë anantsëcquin piucquid abentsëqui ompopac caondash.

19 Yuecquio ictaneshumbien icbon choshon ambi piucquid meniondaido chuituidpac caondash. “¿Atotsi nao?” cac 20 sincoted meniondaidën: “Is, icbo. Mimbi ëbi meniondaidtedbidi daëd uaombi. Nëbi mitsana 10tedi iquec,” caquien 21 icbon: “Ai, con na daëdpactsëc icboedi daëd uaquin mimbi bëdamboen nac. Nëbi ëbëdtan chuiquid dapa icta. Ëbëd cuishonquec tabadec cho,” capac caondash. 22 Adnubien piucquid 2tedi meniondaidën: “Is, icbo. Mimbi meniondaid 2ted icboedi daëd uaondambique. Nëbi mitsana 4tedi iquec,” caquien 23 icbon: “Ai, ëmbi chiacpadomboen mimbi con na daëd uac. Nëbi ëbëdtan chuiquid icta. Mibitsen ëbëd cuishonquec tabadec cho,” capac caondash.

24 Adnubien piucquid abentsëcquiobi meniondaidën chieshquidëntsen: “Mimbi ancaidon nidtsinaid peteuidi bedquid mibi nec, icbo. Mimbi chiacpadomboen nainquio icsho isash chushcanquidquio mibi nec. 25 Adec dacuëdampambo icquid icsho mibi dacuëdënquin mimbi meniondaid piucquid ompoquin chococaondambi. Në mimbi meniondaiduidtsëqui ictsec,” caquien 26 icbon: “Chieshquiec mibi icsac. Ëmbi chiacpadomboen nambo mimbi iquec. Ëbi caic: ‘Ancanquid icquin ëbi chushcanushe,’ queshun 27 nuquin matsesën nacpadomboen utsibo meneshun piucquid daëd uaquin mimbi bedtsempac. Adoacsho aid daëd uaquin bedtsenombi. Chieshquin mimbi icsamboen nac,” 28 quepac caondash. Adshun aton yua utsi caic: “Chieshquidën na bedshunshun piucquid 10ted dayun uatsëcboed mene,” cac meniac 10ted icboedi 11ted yanac caondash. Adshumbic chieshquid comapenen cuidpac caondash. 29 Adembidi naindambi. Ëbi tantiaquin ëmbi chiacpadomboen naquid adembidi namequin bëdamboen tantiamendambi. Ëbi tantiesabo ëmbi chiaid niacquid bëdamboen tantiamenquio iquendambi. 30 Aid yua icsambo icquid cuidacbimboen Nuquin Papan ëbi tantiesabo cuidquiendac. Ambi icsaido cuidquiacno nësecac natiaic shubiquiendac —quepondash Esus abëd icquido chiec.

Matses nashunesa cuidte chiaid

31 Adshumbic Esusën padpiden chuipondash. —Nuquin Papan abi yacnoshon uaido mayan bëdabobëd choec: “Abitedishun Icbomboeni nec,” quiash bëchamauampamboec dacuëdampamboec choequi chuiquid dapan tsadten tsadtoquin abitedi ismendambi. 32 Adshumbic matses abitedimbo cho-chomequin tsidadmendambi. Adshumbic icbon aton nauidquio tsinacacbimboen ëbi tantiaquido naden chiendambi. 33 “Ëbëd tabadtequido mibi neque. Nëmbo con abiuc tabadec cho,” caindambi. Adshumbic ëbi tantiesabo chuiquin: “Ëbi tantiesabo cuidadtequido mibi neque. Con copioc tabadec cho,” caindambi. 34 Adshumbic ëbi tantiaquido padpiden chuioaindambi. “Ëbëdi tabadec cho. Matses uaquin tauabi ëndenquimboshë mibi caic: ‘Aido ëbi tantiaquido icmeshun ëbëdi tabadmendambi,’ quequin Nuquin Papan tantiaidombo yec ëbëdi bëdamboec tabadec cho. 35 Mimbi ëbi nashundenec. Bundoacsho mimbi ëbi pemedenec. Acte bundoacsho adembidi mimbi ëbi acmedenec. Mimbi isacmaidquio icsho mimbi ëbi yuedtenec. 36 Con dashcute nibëdsho mimbi ëbi dashcute menedenec. Daicsabudtsash unëstiadtsëcquio icsho ëbi tantiec mibi datsadtenec. Quënën nauedacsho mimbi ëbi isuan-isuandenec,” caindambi. 37 Adoaquien bëdamboec tabadquido: “Tantiadenquio icnuc mimbi chuipec, icbo. ¿Bundoacshodambi mibi pemedionda? Mambi mibi pemiambo yoc. Mambi mibi acte bundoacsho acmiambo yoc. 38 ¿Ëmbi isacmaidquio icshodambi mibi yuedtionda? Mambi padambo yoc. ¿Dashcute nibëdshodambi mibi dashcute menepacti? Mambi padambo yoc. 39 Mibi daicsacsho datsadambo iquebi. Quënën nauedacsho mibi istaniambo iquembi. Mimbi tantiadenquio icnuc chuipec,” ëbi caindac. 40 Adoac naden chiendambi. “Tantia. Mibi chuinu. Ëmbi chiacpadomboen ëbi tantiaquido utsibo bëdamboen isquin mimbi nashundenec. Aden ëbibi nashunacbimboen mimbi utsibo nashundeneque. Ëbëdi tabadec cho,” caindambi.

41 Adoshombic ëbi tantiesabotsen chiendambi. “Nuquin Papan cuidtequido mibi neque. Mibi icsaid ënte bunenquio icquid mibi neque. Nuquin Papan Satanas aton yuabo podobitsi icsabobëdta ënenquio icquin cuidacno nid. 42 Ëmbi chiacpadomboen ëbi tantiaquido nashunesambo mibi icteneque. Bundoacsho mimbi ëbi pemenquio ictenec. Acte bundoacsho mimbi ëbi acmenquio ictenec. 43 Mimbi isacmaid icsho mimbi ëbi cacumedenec. Dashcute nibëdsho mimbi ëbi menenquio ictenec. Daicsacsho isash mibi ëbi datsadenquio ictenec. Quënën nauedacsho mimbi ëbi istanenquio ictenec,” caindambi. 44 Aden chiaquien: “Tantiadenquio icnuc mimbi chiec. ‘Pete bundopash,’ quequin tantienquio iccondambi. ‘Acte bundopash,’ quequin tantienquio iccondambi. Ëmbi isacmaid icsho mambi mibi isambo yoc. ¿Min dashcute nibëdshodambi mibi istionda? Mambi padambo yoc. Mambi mibi daicsacsho isambo yoc. Mibi quënën nauedaid tantiambo iccondambi. Tantiadenquio icnuc mimbi chuipec,” caindabi ëmbi chiacpadomboen naisabon. 45 Adoac naden chiendambi. “Ëbi tantiaquido nashunenquio icquin ëbibi nashunenquio yacbimboen ëmbi chiacpadomboen naisabo mibi neque. Nuquin Papan cuidacno nid,” caindambi. 46 Adoac icsamboec tabadquido ënenquio icquin cuidacnombo nidnubi bëdamboec tabadquido Nuquin Papa yacno ënëdenquio yec tabadendac —quequin Esusën chuipondash.

<- Mateyon Dada uaid 24 Mateyon Dada uaid 26 ->