1 Adash Nuquin Papa tabadte shubu uashunaid daquënë uacno tabadanec nidequi Esusbëd icquido Nuquin Papa tabadte shubu uashunaid caic: —En is, Icbo. Nëid shubu bëdamboen nacnenaidquio neque —quepondash. 2 Adsho tantiashun Esusën: —Mimbi isboedquio cuënote bëdamboen nacnenaid matses utsibon cuënote chic-chiquendac nibëdquiecnuc —capondash.

3 Adanec nidequi macuësh dapa Odibos caidën pudundoec poctsebi tabadtuidshun abëd icquidon utsibo tantiamenquio icquin Esus chuipondash. —En mibi chote chui. Tantianu. “Nëbi choec,” quequin mibi chote ¿mitsipadembimbi tantiape? Adecbidi ¿atotsi isashini: “Nuquin Papan cuidte nëbi nec,” quepe? —capondash abëd icquidon. 4 Adoaquien Esusën naden chuipondash: —Tantia. Mibi chuinu. Muaquidoba choendac. Aidon chuisho tantiash: “Abimboen chuichitec,” quenda. 5 Adquido choshon: “Nuquin Papan chomiaidquio Quidistu caid nebi,” quequin muaquin chiaqui dadpenshun: “Ai, abimboen mimbi caic,” capendac.

6 Ëbi choabi icnuc: “Matses dadpenquio cuesnan-cuesnanac caosh,” quecuededendac. Adsho tantiash dacuëdenda. Nuquin Papan matses abitedi cuidte ushë choabi icnuc ambi tantiacpadec matses adonanendac. 7 Adec matses utsi dadpen icquido matses utsibobëd cuesnanendac. Nidaid utsi-utsiec yacno pete nibëdquiec icted-ictedendac. Nidaid utsi-utsiec yacno nidaidquiobi comapenec uëdëquedenendac. 8 Adsho isash chido bacuë nëncuenacsho isun: “Nëbien tishchitec,” quequin tantiacbimboen tantiata. “Nuquin Papan abitedi cuidte nëbi nec,” quequin tantiata —quepondash Esus.

9 Adashic abi onquec: —Ëmbi chiacpadquio icnuc chieshëmënquidon ëbi tantiaquido bedshun chieshënquin utsi-utsien cuesendac. Utsi-utsien unës uaindac. Aden nidaid utsi-utsiec yacno tabadquidon dadpenshun ëbi tantiaquido chieshënquiendac. 10 Adoac ëbi tantiatsëcboedëmbi chieshtoshon ëbi tantienquio yanendac. Aidëmbi ëbi tantiaquid ompodacsho istuidmeshun mëyamendac. Adashic abipadquid utsibobëd chieshënanendac.

11 Padnuen muaquido: “Nuquin Papan chuiboedquio chuinu. Tantia,” quependac dadpen. Adsho tantiashun dadpenshun: “Ai, abimboen mimbi chiec,” caindac. 12 Matses dadpenquio icsamboecshë tabadsho isun ëbi tantiatsëcboedëmbi ëbi tantienquio yanendac. 13 Padnuembi ëbi choabi icshobi ënenquio icquin ëbi tantiaquido Nuquin Papa yacno tabadmendac.

14 Ëbi choabi icnuc: “Ma matses abitedishun Nuquin Papabëd tabadte tantianu,” queshun ëbi tantiaquidon nidaid utsi-utsiec yacno nidshun chuiben-chuibenendac. Matses abitedi chuibenequin nainambi choaindabi —quepondash Esus.

15 Adashic abi onquec: —Ëbi chote ushë nëbi yanuc matses icsamboshë icquid Nuquin Papa tabadte shubu uashunaid dapa icsa uanuec puduedshun: “Mimbi Nuquin Papa caid tantienda. Ëmbi chiacpadomboenuidi nata,” quequin Nuquin Papa chieshënquin chiendac. Ëndenquimbo nuquin tsusedpa Danied caidën aden icsa uate chuiquin Nuquin Papan chiaid dada uapampic. Aidën dada uampid mimbi isaidquio nec. 16 Aden: “Nuquin Papa tabadte shubu uashunaid dapa icsa uanuec puduedosh,” quesho tantiash Udeya yacnocquido macuësh dapa yacno ompodec cuenac bëdambo ictsiash.

17 Adec cuenec shubu dayun icquido puduedenquio yec: “Con na bednu,” quenquio yec umanucuëshi cuenac bëdambo ictsiash. 18 Adecbidi badedquio cuenuen tied nantan icquidon aton dashcute utsi aton shubuno beduanenquio yac bëdambo ictsiash. 19 Nidequi bacuë usunquid yec bacuë chishmequid yec quec badedquio cuentiapimbo yec mëyadquiendac. 20 Adec cuente tantiec: “Ue sequenumbo cuemenquio icpashuni,” queta. “Pete bedmianenquio icnushe,” quiash “Chonoadenquio icte ushënquio cuemenquio icpashuni,” queoata. 21 Aden Nuquin Papa tabadte shubu uashunaid dapa icsa uate bunquid icsamboshë icquid choan matses dadpenquio natiambo chieshëmënquiec tabadendac. Nuquin Papan tauamboen matses uac adec tabadenquio ictenec. Nëbi adec tabadenquio iquec. Aido icsamboecshë tabadquido nibëdanambic utsibo adquidpenquio yanoaindac. 22 Adec icsamboecshë tabadte tantiaquin Nuquin Papan: “Ëmbi Esus tantiaquid icmiaido uesquin cuesun sianushe. Matses abitedi nibëdanushe,” queshun yuenquio icsamboen tabadmenquio icquin ënëdmendac —quepondash Esus.

23 Nuquin Papan aden ënëdmiabi yac icsamboecshë tabadec utsibo: “Is. Nëid Nuquin Papan chomiaidquio Quidistu neque,” quependac. Utsibic: “Is. Nëidquien Nuquin Papan chomiaidquio Quidistu caid neque,” quequin icsamboen chuioaindac. Adsho tantiashun: “Nuquin Icbo Esus choashien nec,” cainda.

24 Adec muaquidoba choendac. “Nuquin Papan chomiaidquio nebique. Is,” quequin comapenen tantiaquin nabanquin ismendac. Utsibontsen: “Nuquin Papan oncamiaid nebique. Is,” quequin nadatiambo icquin nabanquin ismendac. Adsho isun dadpenshun: “Ai, abimbo caic,” caindac. Padnuen Nuquin Papan: “Muambo nec,” quequin tantiamiabi yac ëbi tantiaquidontsen: “Ai, abimbo caic,” catsempendac. Nuquin Papan bëdamboen tantiamiaido yec adtiapimbo iquendac. 25 “ ‘Chieshëmënquido iquendac,’ quequin tantienquio icquidën ëbi tantienquio yanushe,” queshun: “Aden ëbi tantiaquido chieshënquiendac,” quequin chiombi —quepondash Esus.

26 Adashic padpidec onquec: —Ëmbi aden chuiboed tantiashun utsibo muasho tantienda. Ëbi caic: “Utsibo ismenquio yec matses nibëdacno choac caoshe. Isnu. Nid,” cac istanenda. Adembidi: “Choash nëid shubun puduedac caoshe. Isnu. Nid,” cac adembidi istanenda. Muambo neque. 27 Ëbimbo padpidec choquimbimbi abitedimbo ismendac. Abu ushëmbo yec bed-bedquetanesho ¿ada matsesën abitedishunquio isenquio icpadic? Ai, isec. Adembidi ëbi choasho matses abitedishunquio isendac. 28 Adec choendabi. ¿Ada edeste pisen chec budenquio icpadic? Ai, budec. Adecbidi Nuquin Papan cuidte ushë chonoc choendabi —quepondash Esus.

29 Adashic padpiden chiec: —Aden matses icsamboshë icquidon ëbi tantiaquido natiamenubi ushë chënquenquio yanendac. Inchëshën ushëtsen chënquenquio yanendac. Uispa chedo paëdbudnendac. Uispabimboecquid abitedimbo uëdëquendac. 30 Adnubini abitedishun Icbo yec dacuëdampambo yec abucuësh choendac. Ëbi nadatiambo icquin nabanquidquio yec chosho isash cuidadtequido abitedimbo dacuëdec natiaic shubiquiendac. 31 Adnuc nua shoncanubimbi Nuquin Papan abi yacnoshon uaido mayan bëdabo: “Bedtan,” caindac. Adoac nidaid utsi-utsiec yacno nidshun ëbi tantiaquido abitedimbo bedtanendac.

32 Ëmbi chuibocpadquiec yansho isun: “Esus chote nëbi nec,” quequin tantiata. ¿Mitsipaden: “Seta taëec,” quequin tantiapec? Suc seccuduquiaid isun: “Nëbi seta taëec,” quequin tantiaquid. 33 Adembidi ëmbi chuiboed isun: “Nëbimbobi Esus choec,” quequin tantiata. 34 ¿Muectabi nedi? Ëmbi chuibocpadquio iquendac. Ëmbi chiacpadec yanabi matses abitedi nibëdantiapimbo iquendac. 35 Abimbo caimbi. Abu nibëdanendac. Nidaidtsen nibëdanendac. Padnuen ëmbi chuiboedquio nibëdantiapimbo iquendac. Bënudenquio iquendac. Ucudtiapimbo iquendac. Ëmbi chuibocpadquio iquendac —quepondash Esus abëd icquido chiec.

36 Adashic abi onquec Esus: —Ëbi chote tantienquio iquembi. “Aid ushënquio choendabi,” quetiapimbo iquebi. Adembidi mayan bëdabon tantienquio iquec. Ëmbibi Nuquin Papan Madonquiobi tantienquio iquembi. Nuquin Papanuidtsëquien tantiec. 37 Matses ëbi caic: “Nëbi choec,” quetiapimbo icnuc choendabi. Noen cano nacnenubi ¿mitsipaden aton matses icsambo icquidon tantiapampic? 38 Nidaid abichobi mauanabi icnuc: “Nuquin Papan nuqui cuidendac,” quequin tantienquio icquin peshun acquinc aton chido bedquinc aton champi bedmequinc capampic. Adnubien Noe Nuquin Papan chiacpadomboen cano dapa anshubu uaquin nacnenash puduedpampic. 39 Aton matses: “Nëbimbobini Nuquin Papan cuidchitec,” quenquio icnubi ue dapambo choec mauanquidën matses abitedimbo unësbudnepampic Noe ambi cano anshubu uaidën nuadtonobi. Adecbidi Nuquin Papan cuidtequido ëbi caic: “Choec,” quenquio icnubini choendac.

40 Choquin Nuquin Papa yacno tabadmenuen beduamendambi. Ëmbi: “Bedtan,” cac tied nantan dada daëd icsho istuidshun ëbi tantiaquid abentsëc icsho beduanendac. Utsibic ëbi tantiesa icsho nianendac. 41 Adembidi Nuquin Papa yacno tabadmenuen chido daëdshun macueso istuidshun abentsëc ëbi tantiaquid icsho aid abentsëc beduanendac. Chido utsibic ëbi tantiesa icsho nianendac.

42 Aden ëmbi chuiboed tantiashun: “¿Nëbida con Icbo chopeba?” quequin ënenquio icquin tantiata. Ëbi chote mimbi tantienquio iquec. 43 ¿“Nëbi ampequidën ampec,” quequinda tantiapadic? Padenquio. Tantiaquidënquien aid ushënquio aton na bëdamboen isquin ampemenquio ictsiash. Aden tantienquio icquin: “Ampesho isnu,” quequin ënenquio icquin isquid. 44 Adembidi ëbi chote ushë mimbi tantienquio ye. ¿“Nëbida nuquin Icbo chopeba?” quec Nuquin Papabëd tabadte bunec bëdamboec tabadta. Matses dadpen: “Nëbien chochitec,” quenquio icnubini choendac —quepondash Esus abëd icquido chiec.

45 Adshumbic abi bëdamboen cainte Esusën chuipondash. —Tantia. Aton icbo tantiaquin yua bëdambo icquidën naid mibi chuinu. Icbon: “Ëbi nidan mibëdta yuaido pete sandoaid musucshun ëmbi chiacpadën ëmbi chiacpadënquien menianeta,” cac yua bëdambo icquidën adotsiash. 46 Adnubien icbon choshon ambi chiacpadomboen yuan nasho isun bëdamboen istsiash. 47 Adshumbic aton yua chuitsiash. “Bëdamboen tantiaquid mibi neque. Con yua utsibo namequin con natedi dayun uata,” catsiash icbon yua bëdambo icquid caquin. 48 Padnuen yua icsambo icquid: “Ëndenquimbo con icbo nidondash. Choenquien icchitec. Con nauidi nanu,” 49 quiampatsiash. Adshumbic chieshtoshon abëdta yuaido cuesanetsiash. Adashic icsambo icquidobëdi icsamboec tabadtsiash. 50 Adec: “¿Nëbida con icbo chopeba?” quenquio icnubien aton icbo chotsiash. 51 Choshon ambi chiacpadomboen nainquio icsho istuidshumbic: “Icsambo iquec,” queshun comapenen cuesquin cuesunetsiash. Adembidi Nuquin Papan icsambo icquido cuidendac. Bëdambo icquid damianquido cuidacno icsamboshë yacno nidmendac. Adoac natiaic shubiquiendac —quequin abi bëdamboen cainte Esusën chuipondash.