1 —Dacuëdenda —queshumbic ëbi tantiamenuen abuc isquin Esusën Nuquin Papa chuipondash. —Nuqui tantiactedi ëbi naimeta, Papa. Ëbi naimetanquin comapenen tantiaquin ëbi bëdambo icmeta. Aden mimbi bëdambo icmiac mibitsen bëdambo icmendambi, Papa. 2 Ëndenquimboshë mimbi ëbi chiondac naden chuiquin. “Nuqui matses uaidon abitedishun Icbo mibi nec, Mado,” quequin mimbi ëbi chiondac. Mimbi adondaid icquin mimbi tantiactedi matses nuquibëd tabadtequido icmendambi, Papa. 3 Matsesën nadosho adoendambi. “Abipadquid utsi nibëdnuc Nuquin Papa iquec. Ambi chomiondaidquio Esus nec,” quequin tantiasho nuquibëd tabadtequido icmendambi, Papa. 4 Mimbi chiacpadomboen naquin nëbimbobimbi nainec. Ëmbi adoacsho isash matses: “Ambi chomiaid tantiasho Nuquin Papan nuqui bëdamboen isec. Nuquin Papa bëdamboshë iquec,” quependac, Papa. 5 Nuqui tantiactedi ëmbi nainacsho mibi yacno nidmeshun mibëdi ëbi tabadmeoata nuqui matses uabi tabadtenecpadembi. “Nuquibi abitedimbo namenuna,” ëbi cata, Papa —quepondash Esus Nuquin Papa chiec.

6 Adshumbic Esusën abëd icquido ëbitedi chuiquin aton Papa chuioapondash. —Mimbi tantiactedi mimbi ëbi tantiaquid icmiacsho mimbi bëdamboen iste chuibanombi. Aden mimbi chiaidquio chiac: “Ai, adotiadquio iquebi,” quiosh, Papa. 7 Adembidi aidon: “Nuquin Papan namiaidquio nec. Ambembi nainquio iquec,” quequin ëbi tantiaposh. 8 Mimbi chiaid ëmbi chuisho tantiashun mimbi comapenen tantiaquin nabamiaid nasho isun: “Ma Nuquin Papan chomiaidquio nepayoc,” caposhi ëbëd icquidon, Papa. 9 Ëbi tantienquio icquido mibi chienquio iquembi, Papa. Ëbi tantiaquidouidtsëqui mibi chiec nebi. Mibi tantiaquido icsho mimbi tantiamiac ëbitsen tantiec aidon. 10 Adsho isun: “Nuqui tantiaquido nec,” caimbi, Papa. Aidon: “Mibi bëdambo iqueque. Con Icbo mibi canu. Mimbi chiacpadec bëdamboec tabadtiadquio iquebi,” quequin bëdambo icmioshi, Papa. 11 Mibi bëdamboshë iqueque. Ëbi mibi yacno nidan ëbi tantiaquido dayun uata, Papa. Ëbi chieshënquidon chieshtomenushe. Nëido bëdamboen dayun uata. Mimbi ëbi icmiacpadquidbidi comapenen tantiaquid mibi neque. Ma nuqui tantiananquiacpadquiec ma ëbi tantiaquido tantiananu. Nëido bëdamboen dayun uata, Papa. 12 Aidobëd icquin mimbi chiaidquio bëdamboen chuibanquin chieshtomiambo iccombi. Aden bëdamboen dayun uaquin ëbi tantiaquido cudasënquin Satanas yuamiambo iccombi. Udas abentsëquien Satanasën yuatsaccosh. Mimbi chiaid matsesën dada uapampicpadomboen ëbi bedmenuen Satanasën Udas yuaccosh. Adoac ëbi bedmequid yanash mimbi cuidtequid iquendac.

13 Nëbi mibi yacno nidendabi, Papa. “Ëbi nidan dacuëdec ëbi tantiaquido chieshtonoshe,” queshun mibi otacquio chienquio iquembi. “Ëmbi abi dayun uate chuisho tantiash ëbi yacpadec ma cuishonquenu,” quequin mibi otacquio chienquio iquembi, Papa. 14 Mimbi chiaidquio nëido chuibanombi. Adoac ëbi tantiaquido yansho ëbi chieshënquidon nëidotsen chieshëmpec. Ëbi yacpadec mimbi chiaid niac-niacte bunenquio icshobidi nëido chieshënquiec, Papa. 15 Aden tantiash: “Ëbi tantienquio icquidobëdi ëbi tantiaquido tabadmenda,” ¿quectabi ique? Padenquio. “Ëbi tantiaquido chieshtomenda,” caimbi, Papa. Satanasën yuanushe. Bëdamboen dayun uaquin chieshtomenda, Papa. 16 Ëbi tantiesabo tabadacpadec tabadenquio icquin ëmbi nabocpadomboen natiadquio iqueque. 17 Mimbi chiaidquio pausunquioquin bëdamboen tabadme, Papa. 18 Mimbi ëbi: “Matses chiec nid,” caondacpadomboen aido: “Ëbi chuibeneta,” caindambi. Adoac nëidon ëbi chuibenendac, Papa. 19 Nëido tantiaquiec nëbimbobini mimbi chiacpadec ëbided cuidadec unësendac. “Adomboembidi ëbi tantiaquidon ma Nuquin Papan chiacpadomboen nanu,” quiash ëbi tantiaquido min yuabombo icmenuec adebi, Papa —quepondash Esus aton Papa chiec.

20 Adashic padpiden Nuquin Papa chiec Esus: —Ëbëd icquido mibi chuishumbic nëbi aidobëdta ëbi tantiaquid utsibotsen mibi chuinu, Papa. Ëmbi chiaidbëdta ëmbi naidtedi ëbëd icquidon utsibo chuibanac aidotsen ëbi tantiaquido yanendac. Adec ëbi tantiaquido dadpenquio yanendac. Ëbi tantiaquidotedi tantiaquin mibi chiec nebi, Papa. 21 Nuqui tëshnanenquio yacpadequi nuquibëd tëshnanenquio icquid icmeta, Papa. Nuqui tantiananquiacpadec ëbi tantiaquidotedi shubu abentsëquën tabadacbimboecnuc tantianameta, Papa. Adsho isash nuqui tantienquio icquido nadtsiash. “Esus tantiec bëdambo iquec. Aden Nuquin Papanuidtsëqui bëdambo icmetsiash. Nuquin Papan chomiaidquien Esus nechitec,” quetsiash. 22 “Mibëd ëbi tantiananquiacpadquiec ma ëbi tantiaquido tantiananquiono. Ma chieshënanenquio icnu,” quequin mimbi ëbi namiacpadomboen ëbi tantiaquido namiombi, Papa. 23 Nuqui tëshnanenquio yacpadec aidobëd tëshnanenquio iquendabi. “Chieshënanenquio yec tantiananquiec ma bëdamboec tabadnu,” quec aidobëd tëshnanenquio iquendabi, Papa. Adec ëbi tantiaquido bëdamboec tantianansho isun matsesën naden tantiatsiash. “Ambi chiacpadquid Nuquin Papan chomenëdaid icquin Esusën abi tantiaquido aden bëdamboen tabadmec. Ambi chomenëdaid aton Mado tantiaquiacpadomboen Nuquin Papan aid tantiaquido tantiaquiec,” quequin matsesën tantiatsiash, Papa. 24 Mimbi ëbi tantiaquido icmiaido nuqui tabadacnombo tabadmeta. “Nuqui matses uabi icquin mimbi: ‘Ëmbi tantiaidquio mibi neque. Nuquibi nanuna, Mado,’ cac nuqui bëdamboshë yec tabadtenecpadequi nuqui tabadsho ma ëbi tantiaquidon isnu,” queshun mibi: “Nuqui yacno tabadmeta, Papa,” caimbi. 25 Icsaisambo mibi icsho icsambo icquidon mibi tantiatiapimbo icnubimbi mibi tantiaquiec. Mibi yacnuësh choquid icshobini ëbëd icquidon: “Ai, Nuquin Papa yacnuësh choquidien nec,” quequin tantiaposh, Papa. 26 Aden tantiamenuen yuec ëbëd icquidobëd tabadquin mimbi naid chuibanombi. Ëbi nidan ëmbi chomiaidën con Mayanën adembidi ëbëd icquido tantiamendac. “Mimbi ëbi tantiaquiacpadomboen ma nuqui daëdi tantiaquiash ma tantiananquiono,” queshun con Mayan aidobëd tabadmendambi. Adoac ëbëd icacbimboec con Mayan tantiadendac, Papa —quepondash Esus Nuquin Papa chiec.

<- Uanën Dada uaid 16Uanën Dada uaid 18 ->