1 Ëbitedi dacuëdcuededsho isashien Esus: —Dacuëdenda. “Ëbi dayun uaquid nec,” quequin mimbi Nuquin Papa tantiacpadomboen ëbitsen tantiaquiota. 2 Mimbi tantiacpadquio Nuquin Papan shubu iquec. Quënë dadpenquioshë iquec. Tsucustiapimbo iquec. Adpenquio icsho mibi aden chienquio ictsiambi. Adquid tantiaquin: “Ëbi tantiaquido ëbëdi tabadmendambi,” quequin chiombi. 3 “Adquid iquec,” quiash ëbia nidshun con Pa chiendambi. “Ëbi tantiaquido neque. Nuquibëdi tabadmenuna,” quequin chiendambi. Adashic ëbi yacno mibi buanuec choaindabi. 4 Ëbi nidan ëbi nidacno nidte mimbi tantiec —quepondash Esus.

5 Adsho tantiashun Tomasëntsen: —¿Mitsimbo nide, Icbo? Tantiambo iccombi. Podqued tantienquio iquembique. Ëbi chui —caquien 6 Esus: —Nuquin Papa yacno nidte tantiamequidquio nebi. Nuquin Papan chiaiduidtsëqui chiec muesambo nebi. Adquid icquin ëbi tantiaquid Nuquin Papabëd tabadmendambi. Ëbi tantiesan Nuquin Papa tantiatiapimbo ictsiash. Ëbi tantiaquidënuidtsëqui Nuquin Papa tantiatsiash. 7 Ëbi caic: “Nuquin Papan Mado nec,” quequin mimbi Nuquin Papatsen tantiendac. Nëbi abipadquid ëbi icsho isun Nuquin Papambo isacbimboen mimbi tantiendac —quepondash Esus.

8 Adshobien Uedipentsen: —Nuquin Papa ëbi isme, Icbo. Nuquin Papa iste bunebique. Aid isash bëdambo ictsiabi —caquien 9 aidtsen Esusën: —¿Tantienquioda ique, Uedipe? Yuec mibëdi tabadobi. ¿Mimbi isacmaidtabi nedi? ¿Mibi chianenquiodambi ictio? Nuquin Papapadquidquiobidini nec. Ëbi adquid icsho isun: “ ‘Adquidquiobidi Nuquin Papa iquec,’ quequin Nuquin Papatsen mimbi tantiendac,” quequin mibi chiombi. ¿Atotsi quequimbini: “Nuquin Papa ëbi isme,” cai? 10 “Nuquin Papapadquidquio nebi,” ëbi quesho tantiash: “Ai, abimbo caic,” ¿quenquioda icco? Ëmbembi chienquio iccombi. Con Pan chiaidquio chiequini nec. Adembidi ëmbembi nabanenquio iccombi. Ëbëd tëshnanenquio icquin con Pan namiaquimbi naoc. Ëmbembi nainquio iccombi. 11 “Con Papadquidquio nebi,” ëbi quesho tantiashun: “Ai, abimbo caic,” cata. Ëmbi chiaid tantiatiapimbo icquin ëmbi comapenen tantiaquin dadpen nabamboedquio tantiata. Aden ëmbi nabamboed tantiaquin: “Nuquin Papan chomiaidënuidtsëquien adotsiash,” quequin tantiata. 12 Tantia. Mibi chuinu. Ëmbi nacpadomboen ëbi tantiaquidontsen comapenen tantiaquin nabanendac. Ëmbi chuibanac daëdpactsëcshun ëbi tantiabentsëccosh. Con Pa yacno nidshun ëmbi chomiaidën con Mayanën namiac mibipadquidën ëbi chuibanac dadpenshun ëbi tantiabenendac. 13 Ëmbi chiacpadomboen naquidën: “Ëbi nashunta, Icbo,” quesho tantiashun ambi chiacpadomboen nashunendambi. “Nuquin Papa bëdamboshë iquec,” camenuen 14 ëbi tantiaquidën chiacpadomboen nashunendambi —quepondash Esus abëd icquido chiec.

15 Adashic abëd icquido padpiden chiec Esus: —Ëbi abimbo tantiaquidën ëmbi chiacpadomboen natiadquio iquendac. 16 Adotiadquio icsho isun con Pabëd icquin con Pa chiendambi naden. “Nuqui tantiaquido bëdamboen tantiamenuen nuquin Mayan aidobëd tabadmenuna, Papa,” ëmbi cac Nuquin Papan con Mayan mibëdi tabadmendac. 17 Adoac mibi nianenquio yec mibëdi tëshnanenquio iquendac. Mibëd icquin ëbi chuiquin mibi abimbo tantiamendac. Aid isadenquio icsho ëbi tantiesabon aid tantiatiapimbo iquec. Mimbien aid tantiec. Con Pan ëbëd icmiaidquio nec. Ambi namiaid ëbi icsho aid tantiashumbimboen mimbi tantiec. Ëbi nidan choash mibëdi tëshnanenquio yec tabadendac con Mayan. 18 ¿Shiadimpi mëyadacbitsec icnudambi mibi niampe? Padenquio. Nuquin Papan Mayan con Mayambi nec. Mibëd aid icnuc ëbëd yacbimboequi con Mayan tantiadendac. 19 Nëbi ëbi nidacsho ëbi tantiesabon ëbi isenquio icnuc mimbi ëbi isendac uincuenacsho. Adec uincuenaid icquin con Mayan mibëd tabadmequin mibi unësacsho uincuemeshun ëbëdi tabadmendambi. 20 Ëbi uincuenaid ushëmbi mimbi naden tantiendac. “Esusën Nuquin Papa tantiaquiec aidbëd tëshnanenquio icquin aidën chiacpadomboenuidi naindac. Adecbidi Esusbëd tantiananquiec aidbëd tëshnanenquio icquin aidën chiacpadomboen natiadquio yec tabadebi,” quequin mimbi tantiendac. 21 Ëmbi chiacpadomboen naquid ëbi tantiaquidquio nec. Ëbi tantiaquidquio mibi icsho con Pabëdtan mibi tantiaquioquin: “Adquio aton Papabëd Esus iquec,” camequin mibi bëdamboen tantiamendambi —quepondash Esus.

22 Adsho tantiashun Udas utsin abi bedmequidënpenquio: —“Nuquin Papa yacnuësh choash con matses chuiquidquio yanshun abitedi ismequin tantiamendac,” quequin Nuquin Papan chiaid nuquin tsusedpabon dada uapampic. Nuquin Papa yacnuësh choquid icquin ¿atotsieshun ëbiuidtsëqui tantiame, Icbo? —caquien 23 Esus padpidec: —Ëbi tantiaquiduidtsëqui naden tantiamendambi. Ëbi tantiaquid ëmbi chiacpadomboen naquid nec. Aden nasho con Pabëdtan tantiaquioquin aidbëdi con Mayan tabadmendambi. Adoac con Mayanën tantiamiac ëbëd iquec con Pabëd iquec quiacbimboec tantiadendac. 24 Ëbi tantienquio icquidoen ëmbi chiaid niac-niacquido nendac. ¿Ëmbiuidtsëqui chiaidta adquidën niac-niacpadic? Mambi Nuquin Papan chiaidquio chuiboc. Aidën chiaidquio adquidën niac-niaquec —quepondash Esus abëd icquido chiec.

25 Adashic padpidec Esus onquiondash. —Mibi bëdiactsëc tantiamequin mibëd icquin con Pan chiaid chuibanombi. 26 Con Pa yacno nidshun ëmbi: “Nuquin Mayan aidobëdi tabadmenuna, Papa,” cac con Pan con Mayan matsesbëd tabadmendac. Adoac ëmbi naidbëdta ëmbi chiondaidtedimbo mibi bëdamboen tantiamendac. 27 Con Pa yacno nidshun con Mayan mibëdi tabadmequin dacuëdenquio icquid mibi icmendambi. Adoac dacuëdenquio yec bëdamboec tabadta. Ëbi tantiesabo dacuëdacbimboec dacuëdenda. Comapenec dacuëdtanec uinte paëdtanec aido tabadnubi mibi dacuëdenquio yec bëdamboec tabadta. 28 “Nëbimbobini con Pa yacno nidendac. Adtanequic choaindabi,” quepobi mibi chiec. Ëbi adsho tantiash ëbi tantiaquidombo cuishonquetsiash. “Esus abi namequid aton Papabëd tabadec nidec,” quiash ëbi tantiec cuishonquetsiash. 29 Nidnumbi mibi chiec nebi. “Unësash uincuenendabi. Adashic con Pa yacno nidendabi,” quiobi. “Ëmbi chiacpadec ëbi adsho isun ma nëidon: ‘Esusën abimboshenda capondash. Ambi chiondacpadquid Nuquin Papan Madombo nec,’ quequin tantianu,” quiash adobi. 30 Nëbi ënquimbi chuinu. Ëbi tantiesabon icbo Satanas ëbi unës uamenuec choec. Ambembi aidën ëbi unës uametiapimbo iquec. 31 Con Pan tantiacpadequini unësendac. Ëbi adec unëso isash: “ ‘Nuquin Papa tantiaquin ambi chiacpadomboen naic abided cuidadec Esus unësac,’ quequin ma matses abitedishun tantianu,” quiash adebi. Nëbimbobimbi naique. Nidec nidnu. Nid —quepondash Esus.

<- Uanën Dada uaid 13Uanën Dada uaid 15 ->