1 Nuquin Papan bacuëbo yec 2 tantiananec tabadteneta. Nuquin Papan chiampicpadquiec Esuquidistu nuqui tantiaquin nuqui icsaid bedshunash abided cuidadec unëspanëdash. Adquidquio icsho isun Nuquin Papan bëdamboen isaidquio Esuquidistu icpanëdash.
3 Esuquidistu tantiaquid yec, Mimbi inacmaid isec chudnu, quesambo icta, dada. Adecbidi, Ëbi inesa chudmenu, quesambo icta, chido. Opabimboec iquenda. Adecbidi, utsin na isash, Bednu, quesambo icoata. Esuquidistu tantiaquid nebi, quequin adoenda. 4 Adecbidi, Esuquidistu tantiaquid yec tsienbëdta shui icsamboen chiec onqueboedi adec mibi onquiaid ënta. Adecbidi, utsi icsamboen oncaisambo icta. Adecbidi, bëdamboec onquequid utsi uain chuiquin mamënshunesambo icta. 5 Chudtemaid chudnu, quequinuidi chudquid yec opabimboecuidi tabadquid Nuquin Papa yacno Esuquidistun shubun icquid ictiapimbo iquec. Adecbidi, Bednu, quequinuidi bedquid yec Nuquin Papa yacno Esuquidistun shubun icquid ictiapimbo iquec. Aden nabanquid Nuquin Papabëd Esuquidistu con icbo nec, quetiapimbo icoaic. 6 Ambembi chiec onquiaid tantiesa icta. Adquid Nuquin Papan chiacpadomboen naisa nec. Adquid Nuquin Papan comapenen cuidendac. 7 Adquidbëd icsainda.
8 Ënden Esuquidistu tantiesa icquin inchëshquiocnoc isacbimboen tantienquio icboedi nëbi Esuquidistu tantiaquid mibitedi yansho ambi tantiamebaniaido icquin badiadnuc isucunacbimboen tantiaquiota. Aden tantiec Nuquin Papan bacuëbo yec Nuquin Papan tantiamiacpadquiec bëdamboec tabadteneta. 9 Esuquidistun ambi tantiacpadomboen pausunac abi yacpadquiec nuqui bëdamboec tabadtenendac. Adembidi aid yacpadomboen abimbo chuidenequid icta. 10 ¿Nadec tabadshodabi Nuquin Papan bëdamboen istsiashe? Tanu, quequin adomboen nabanec tabadteneta. 11 Utsibëd icsainda. Utsi icsadenenubi mibi bëdamboec tabadtenesho isun abi icsaid utsin ëmpec. 12 Icsaquidën ompoquin naid chuitemaid nec. 13 Adquidën Esuquidistu tantiaquid bëdamboec tabadtenesho isun, Icsambocquid nebi, queshun Esuquidistu tantiabempec. 14 Bëdamboec tabadquin ismedeniac icsambocboedëmbi bëdamboen tantiabentsiash. Esuquidistu tantiaquido chuiquin dada uaid nad iqueque. Tantia. Chuinu.
19 Adec icsate bunenquiocquin Esuquidistu tantiaquid utsibobëdtan Nuquin Papan chiaid chuiquinc, chuiquid dapa Dabidën dada uampid sadmo caid utsi-utsien chuiquinc, cuëdënte utsi chuiquinc cain chiec cuëdënteneta. Adec cuëdënquin Nuquin Icbon naid chuideneta. 20 Esuquidistu tantiaquid icsho Edoenën Nuquin Papan bëdambo icmiaidtedi yec aidën naid chiec onquedeneta.
22 Adembidi Esuquidistun chiacpadomboen dadan inaidën min bënën chiacpadomboen nabanta. 23 Adembidi abi tantiaquidtedi chuiquidquio Esuquidistu nec. Abi yacno indoshon ënëdenquio yec icsainquiocnoc tabadmendac. Adembidi aton chido chuiquidbidi aton bënë nec. 24 Esuquidistun chiacpadomboen abi tantiaquidon nabanacpadomboen aton bënën chiaid naquidquio aton chido neoaic.
25 Esuquidistu abuc tabadboedi abi abuc bëdamboec tabadtequid tantienquio yec unës uanushe quenquio yec matses tantiec nidaidënshun tishaid yec matses icsaid bedshunash abided cuidadec unëspanëdash. Abuc ëbëdi abentsëc yacbimboecnuc tabadmenu, quec unëspanëdash. 26 Adecbidi, Ëbi tantiaquido icsaisa icmenu, quiash abided cuidadec unëspanëdash. 27 Adecbidi, icsaid nibëdquid bëdaidquio abi tantiaquido icmeshun Nuquin Papa yacno yuedshun, Ëmbi yuedboed min shubun ictequid nendac, quequin ismembi, quec Esus unëspanëdash. 28 Adomboembidi chido inquidën abibi tantiadacpadomboen ma con chido tantiaquin, Bëdambocquid icmenu, quequin nashundeniash ma aidbëdi bëdambocquid icsho Nuquin Papa yacno Esuquidistun yuedpanuna. Aton chido tantiaquid abibi tantiadquidbidi nec. Aidbëdi abentsëc yacbimboecquid neoaic. 29 Abibi chieshëmëdesa dada nec. Bunquioquin peshun aquec. Adembidi iquenquin cuëte cuëec. Esuquidistun abi tantiaquido abëd icquido icsho aido tantiaquin nabanacbimboen 30 dadan abëd icquid aton chido icsho aidi tantiaquin nashunquid. Dadaba uashun aidën shictodobi chicshun chido uapampic. Adoshon dadan nami aton canitebëdta chido uashun daëd uac abentsëc yacbimboec aid daëdi yanac. 31 Nuquin Papan ënden dada uampid nad iqueque. Tantia. Chuinu. “Aidbëd icnu, queshun bedash aton papa aton titabëdta nianacbimboec daëdash aton chidobëdi abentsëc yacbimboec tabadtenec.” 32 Adec dada aton chidobëd daëdash abentsëc yacbimboecnuc ambi icmiampicpadec Esuquidistu tantiaquido aton shubun icquido abentsëc yacbimboec tabadendac, quequin chiec. 33 Nëbi adomboembidi chido inquid ambi inaidbëdta chuioaimbique. Tantiata. Mibibi tantiadacpadomboen min chido bëdamboen tantiata dadan. Con bënë ëbi chuiquid nec, quequin aidën chiaid tantiata chidon.
<- Epeso yacnocquidon Iste 4Epeso yacnocquidon Iste 6 ->