9
Upa Diosin Israelifo catonni ahuun yorafo inonfo
1-3 Uhuun yoramishtichin un Cristohuunshon iconquin un mato yoi. Un muai cuscan mun tapia uncai mato paraima. Un mato iconquin yoi. Diospan Yoshin Sharan ua shinanmanai cuscan un iconquin yoicain. Uhuun caifo Israelifoancai nocon Numamisi icoinra huafoma. Ascacun uhuun nomuran un atohuunoashu omitsiscacaini. Un ato fasi shinancoinmisi. Uhuun caifo uhuun nomuran un ato shinanmisi isca huaquin, —Upa Diosin uhuun yora Israelifo un ato numapai mifu nipanonfo. Ascano ato Cristomaqui omitsiscapanacafo muran potatamarocon uacai potahuu un ato numanon, —ishon un anori shinanfiainocai Upa Diosin ascatiroma.
4 Upa Diosin ato catonni ahuun yorafo inonfo. Ato fu iyoshon ato ismapaoni ahuu cuscaramain aaquin. Ato shara huapaiyai cuscan ato yoiyoni. Ascashon ato yononi isharanonfo. Ato yosini ahuuscashomain ichananshon cufitirofoquin. Ascarifi atan ahuara sharacoin ato ashoain cuscan yoiyoni.
5 Maton shunifofoan Upa Dios tanasharafafainpaonifo. Nocon Ifo Cristo arifi Israeliri ini. Nocon shuni Abraham non Isaac non Jacobori aton funa. Aafin natian nantifiton aton ifoquin ato iquina. Ascan Upa Dios fasi shararan non huapanon. Amen.
6 Upa Diosin noco yoisharayoni cuscan uhuun caifo Israelifoan icoinra huayamafiaifoan ahuun tsain iconcoin. Ahuun yorafo yoiyoni cuscan ashquiquin. Ahuun yorafo shara huafiainocai atirifi Israelifo Diospan yorama. 7 Nanscarifi aquicain Abraham acai cuscan ahuun funa atirifoan icoinra huamisima. Afocai Diospan yorama. —Abraham ahuun facu futsafoyafiacun Diospan tsain cununi cuscan ahuun facu Isaac yafi ahuun funafo nanfosi Upa Diosin yoiyoni cuscan fitiroran, —ishon cununi.
8 Ascano non tapitiro atirifi Abraham funafocai Diospan yorama. Diosin Abraham yoiyoni ahuun facu chipo cainshquiain. Yoiyoni cuscan Abraham icoinra huani. Nan icoinra huafosi Diospan yoraquin. Abraham facu cuscarafo. 9 Abraham ahuin Sarapan facu nanuataima Upan Diosin yoiyoni isca huaquin, —Fari futsan un miqui nasoshquin. Nantianri min ahuin Sarapan facu furonanfacu cainshquiran, —ishon yoini.
10-13 Ascano man fari ichapa finontan Sarapan facu Isaac ahuin Rebeca rafanacani. Caiantaima Upa Diosin yoini isca huaquin, —Min facu Esaú cain taui. Afu rafanaca Jacob. Chipocuton oinmati cuscara iyoa ishquiran, —ishon yoini. Caiantaimacai ahua chaca huafain shara huatian inima. Ascafian Diosin yoiquin, —Jacob un noiquin un ashoin. Un iyoa Esaucai un noiquin asca huaima, —ishon Diospan tsain cununi. Ascano non tapitiro Diosin inonpacoai shinanyoni cuscan atiroquin. Esaú futan Jacob amisifo cuscacai shinanyonima. Aafin apaiyai cuscan yoiyoni.
14 ¿Ascano Upa Diosin shinancoinmamun? Ma. Anoricai non shinantiroma. 15 Upa Diosin yoini isca huaquin,
“Nan un noipaiyaifin un noitiroquin. Nanscarifiai nan un ahuun ramapaiyaihuurifi un ramapaitiroquin,”
ishon Upa Diosin Moisés yoini.
16 Ascano non tapitiro futsan shinanquin, —Diosin ua shara huashopainon, —ishon shinantiro iyamarai, —Un Upa Dios yonoshosharatiro ahuun rafanan ua inansharatiroran, —ishon non shinanfiatirocai anorima. Upa Diosin afin nocohuun ramapaiquin noco catontiro non ahuun yorafo non inon noco inansharashquin. 17 Ascano Upa Diosin Egipciofo aton niaifo yoini, —Un mia niaifo imashquin nantifi manifoti anoafoan un ahuamamishti huatiro minhuunshon tapinonfo, —ishon yoini. 18 Ascacun non tapitiro Upa Diosin futsa ahuun ramapaiyaihuunri ramapaitiroquin. Nanscarifi aquin futsan chaca huafafaina cuscan shatuamashu ointi mutocoin imatiro.
19 Man futsan ua yoiraca isca huaquin, —Ascacun non chaca huaiton noco shatumanama nocon ointi mutocoin imashquin. ¿Ascafia ahuuscain Upa Diosin nocohuun nuamun? Afin apaiyai cuscacai tsoan atima huatiroma, —itsairaca amaquiri yoiquin. 20 Ma. Asca huayamacahuun. ¿Ahuuscain min Upa Dios tafipaimun? Minfin nocofunuquin. Aafin Diosiquin. Ahuara onihuamuatocai yoiqui isca huatiroma, —¿Ahuuscain mian iscara onihuamun? —huatiroma. 21 Cutin onihuamisiton mapo nan apaiyai cuscara shara cutin huatiro. Futsa amuran ahuara chaca nanuti huafain futsa amuran ahuara shara nanuti huatiro.
22 Nanscarifiai Upa Diosin nantifi yora onihuafiacun atirifoan ahuun tsain nicacasmamisifo. Funainquimashta ato yoiyofiaiton nicayamacaiyaifoan inoncai atoqui sinaquin. Ato potatiro chacani fustisi tapiaifoan. Asca huaquin ato ismatiro ahuamamishti huatiro cuscan. 23-24 Ascafiacai non ato cuscarama. Nocohuun ramapaiquin noco tapimamisi. Ascatari noco itisharamai unimacoincai non afu ipanon. Noco Israeli fusti catonnima non afu ipanon. Mani futsafori catonni. 25 Oseas nan inonpacoai yoimisiton Diosin tsain cununi isca huaquin,
“Futsafo Israelifomari un catonshquin uhuun yorafori inon. Tsoancai ato noiyomisimafiacun un ato yoishquin. Un mato noiran,”
ishon Upa Diosin yoini cuscan Oseas cununi. 26 Afanan ato yoini iscahuaquin,
“ ‘Mancai uhuun yoramaran,’ ishon Diosin mato yoiaran, huanifo. Ascafia chipo atohuunoa yoishcaquin, ‘Upa Diosin niaton man ahuun facuforan,’ ishon yoishquicani.”
27 Isaías nocon caifo Israelifohuunoa yoini,
“Israelifo ichaparasi ishquicani tsoan ato tanan huatiromafiashu fustirasiton icoinra huashquicani Upa Dios fu ipashcaquin. 28 Yoini cuscan iconcoin. Yoiyoni cuscan manifoti anoafoan nan icoinra huafoma nocon Ifoan ato onaintimariscashquin. Afanan ato manashquima,”
ishon Isaías cununi. 29 Ascashon Isaías afanan yoiyoni cuscan nanscacoiain. Isca huaquin,
“Upa Diosin ahuamamishti huatiro. Nocon caifo Israelifo fustirasi numani atifi cuyononfoma. Asca huayamaino non Sodoma yafi Gomorra cuscarafo icuana. Nonrifi non cuyocuanaran,”
ishon Isaías cununi.
Israelifo yafi nan tsain shara Jesushuunoa
30 ¿Ascano afohuunoa non raquiri yoitiromun? Nan Israelifoanmacai aton chaca shatucasmamisima Upa Diosin icoinra huashquin aton chaca soashonon. Ascafia natian atirifoan Jesús icoinra huaifoan Upa Diosin aton chaca soashona a cuscara shara inonfo.
31 Ascafia uhuun caifon Israelifoan Upa Diosin Moiséshuunshon ato yononi cuscan sharapaicaquin. Ascafiacai Moisés yononi cuscahuunoashu shara inonfoma.
32 ¿Ahuuscain iscaimun? Un mato yoinon. Nanfoancai Diospan Furun Jesús icoinra huaafoma aton chaca soanon. Ascatamarocon Moisés ato yononi cuscahuunoashu isharapaiafo aton chaca soashquin. Un mato ahuara futsa nicamapai. Toquiri fasi uhuapa fai naqui raca finonpai aqui oroshcomutiro.
33 Nanscarifi aquin Jesús finonpaiyaifoancai icoinra huacanima nipashcaquin. Nannori inonpacoai cuscan Isaías Diospan tsain cunuyoni isca huaquin,
“Un Israelifo aton fai naqui toquirininhuan ratain. Ahuunoashu yorafo pacunonfo,”
ishon cununi.
“Nanscarifi aquin Upa Diosin Jesús Israelifoqui nichini tsoan icoinra huayamashu funocoincani nipashcaquima,”
ishon cununi isca huaquin,
“Ascafia tsoan icoinra huacoinshon shinanchacanacamaran,”
ishon Diospan tsain Isaías cununi.
<- Romanos 8 Romanos 10 ->
ReflectTheSON aims to make the Bible available worldwide, especially in nations that declare the Bible illegal.
