1 Ascashon nannori ua yoifain Diosin Yoshin Sharapan ahuara futsa ua oinmanaino nan namapan oian un huaa. Ascashon un oian Upa Diosin icaria caincaiti nan un oinyaino nan oi un nicaquin tau huaa nanrifi un afanan nica. Nan manuti nicatsa achacoin. Ascano ua yoiquin isca huaa, —Nuri uqui ohuu. Ahuarafo chipo ahuuscara aashquiai cuscan un mia oinmayoiran, —ishon ua yoia. 2 Ua yoitapaiyaino samamashta Diosin Yoshin Sharapan ua shinanmatana. Ascashon ua iquipaiyai cuscan ua iquina. Ascatari nan oi un nica ari ua iyoa. Nanno niaifoan tsaoti uhuapa shara un oian. Nocon Ifo Diosin tsaoan.
3 Nan nocon Ifo fasi sharashtacoin iscara un oian. Toquiri rafutan aton anu jaspe yafi cornalina nan rafu sharashtacoin faca facaitsa rafu. Nan jaspe oshoshara. Ascan cornalina oshin chushushara. Nanscarifiai nocon Ifo sharashtacoin faca facaitsa ointsa. Nahuan fai tonan shara cuscaraton a tsaoano tarati huaa. 4 Nannori nocon Ifon tsaoano veinte cuatro nocofunufo tsaoti tarati huashu tsaonifo. Nan nocofunufoan Jesús tanamisifo. Nanfoan icoinra huafo aton cushumisi ipaoni. Sahuuti oshopa sharashta sahuufain maiti oro faca facaitsa sharashta maiafo.
5 Ascatan nocon Ifo tsaoano canan facaiqui ointsa icain turuica nicatsari un nica. Nanscara nicaquin non tapitiro Diosin ahuamamishti huatiro. Tsoa futsacai ahuun curush cuscarama. Ascatan nan Upa Diosin tsaoano siete lamparina uruaiton un oian. Nanfo uruai cuscan huaquin Diosin Yoshin Sharapan nan siete icoinra huafo ichananti pushufoti murannoafoan futsafo tapimafain oinmatirofo ahuu cuscaramain Diosiqui arifi tapinonfo. 6 Nannori un oian ununhuan ointsa tsosi sharacoin. Ascano nocon Ifoan ahuun tsaoti anori nan onihuani rafu non rafuri niafo. Furo ichapaya. Fusoqui yafi puchihuuri furo ichapaya.
7 Futsarifi masharo ointsa icaino futsa moi funu ointsa ica. Ascano futsan ahuun fusori nan nocofunun fuso ointsa icain futsari nan tutumanhuan noyai ointsa ica. 8-10 Nan cuatro putao ya seis putao ya. Nan ato putao ocuma rafu furo ichapayari. Shafatisho yafi yamutishori nan rafu non rafuri fanainquin isca fafaincani,
icashu nan rafu non rafuri fanainriacani. Ascashon yoiafori isca huaquin,
“Nocon Ifon Diosin mirus fusti min nocon Ifocoin. Tsoa futsacai mia cuscara sharama. Min isharapacunaca. Ascacufin non mia fasi noiquin aicho huai. Min noco shara huafafaini,”
ishon nan rafu non rafuriton yoiriaifoanno nan icoinra huafo cushumisifo veinte cuatrofain nocon Ifo Diosin ahuun tsaoti camaqui tsaoa naman fuoshopacufoan aton maiti oro ointsa sharashtacoin nocon Ifo tsaoa afofori nannosi huacashon yoiafo isca huaquin,
“Nocon Ifo Diosin min noco maiti inan cuscan non mia afanan nasoin. Man min noco inanfiacun non mia fasi noicoinquin noco maitifo non mia afanan nasoin. Ascan mirus fustifin min noco iquitiroquin. Min nocon Numamisi. Ascashu mirus fusti min nocon Ifocoin. 11 Ascan minfin isharamisiquin. Ascacun mihuunoa fusti non yoitiro isca huaquin. Min nocon Ifocoin. Min nocon Dios. Tsoa futsacai mia cuscara sharama. Min isharapacunaca. Ascacufin non mia fasi noicoinquin. Ascan minfin min shinanpasi ahuamamishti huatiroquin. Min nantifi ahuamamishti onihuani. Min apaiyai cuscan fusti nantifi min onihuani. Ascacun minhuunoashu fusti nitiroforan,”
