1-2 Uquian Pablo un mia cunu fomai. Uhuun yorahuan Filemón un fasi mia shinancoin. Man min tapia un Jesucristohuunoa yoifafaini. Ascacun ua cunu muran iquimanifo. Nocon yora Timoteo ufu ica. Arifi mia tsain fomapai. Ascan minfin no futan Jesucristo yonoshomisiquin. Nan Jesús icoinra huafo min pushu muran ichananmisifo ua atori yoishohuun. Nocon shafo Apia yafi Arquipori nan Arquipo arifi noco futan Jesucristohuunoa yonoshomisi nan rafuri non ato tsain fomai. 3 Diosin matohuun ramapaiquin. Maton ointi unimamanon. Upa Diosin futan Furumun nocon Ifo Jesucristo mato asca huashonon.
4-5 Un nica min nocon Ifo Jesús icoinra huacoinfain min ahuun noicoin. Nantifi ahuun yorafori min atohuun noicoiainton un nicaquin un cufiaitian Dios un yoimisi isca huaquin, —¡Aicho! Upa Diosin, Filemón mia tanasharacoianran, —ishon un mihuunoa cufimisi. 6 Ascashon un mia cufishomisiri min Jesús icoinra huaa cuscan mirifi min futsafo tapimanaiton arifi icoinra huanonfo. Min asca huaquifin finonmafain Cristohuunoa non aya cuscan min tapitiroquin. Nannori un mia cufishona. 7 Uhuun yorashtan min ua noiai cuscan un unimacai unrifi mua uhuun nomuran un fasi unimacoinni. Ascashon min Diospan yorafori shara huafafaini mihuunshon arifi ato nomuran unimanonfo. ¡Aicho!
Pablonun Onesimohuunoa Filemón yocani
8 Min Cristohuunoashu uhuun yorahua. Ascacufin ahuunshon un mia yoipaiyai cuscan ranotama un mia yonotiro. 9 Ascafiaquicai un mia yonomapaima. Un fasi minhuun noicoinquin mia yonotamarocon un mia yocai. Ufin Pabloqui natian un anifo. Un Cristohuunoa yoimisicun ua cunu muran iquimanifo. 10 Ascacun un mia Onesimohuunoa yocai. Nanrifi uhuun facucoin cuscaraquin. Un nuno cunu muranshon un Onésimo Jesús icoinra huamani. Ascashon natian Jesushuunoashu un ahuun upa cuscara.
11 Ascashon nantocai mia yonoshosharapaonima. Ascafia natian mia yafi ua shara huatiroquin. 12-13 Un Onésimo nitun huanpai ufu inon. Un fasi ahuun noi. Ascashon nichiqui un fasi shinanshquin. Ascan mincai ufu itiroma nan tsain shara Jesushuunoa futsafo yoishquin. Un nuno cunu muranshon un shinan Onésimo mihuun rafanan ufu itiro u futan yonosharashquin. 14 Ascafia un mia yocayoataimacai un ahuara huapaima. Ascashon min ahuara ua shara huashoain cuscacai un mia curushcain yonotiroma mianmain min apaiyai cuscan fusti min acaitonfin. 15 Itsairaca Onésimo mimaqui pashcayoni. Ascashu afanan chipo mifu ipashquin. 16 Un mia yoia cuscan un fasi ahuun noi. Ascano min finacoinquin ahuun noitiro. Ascafia natiancai min yonomati fustisi ishquima. Nanto arifi man Cristo icoinra huaa. Ascacun natian min ahuun yoracoin cuscara.
17 Ascashon min shinan un mifu Jesushuunoashu rafumisi. Ascacun Onésimo miqui nococun min ua shara huacuana nanrifi nanscarifi huaquin shara huahuu. 18 Mia chaca huacun iyamarai mia nificun ua tapimahuu un mia inanon. 19 Ascan natian uficoin un mia cunushoni. Unquian Pablo Onésimo mia nifian cuscan un mia inanshquin. Ascafia man min tapia un mia Jesús icoinra huamani uhuunoashu min Jesús fu nipanon. Ascashu min nifian shinantsa aquin. 20 Uhuun yorashtan un mia yoca cuscan ua ashopun. Min Onésimo shara huaa cuscan urifi uhuun nomuran un unimashquin. Jesushuunshon nanscacoin ua huashopun.
21 Man min tapia un mia yoca cuscan huafain mian ashoshquin. Paratama min ua ashoshquin. Ascan mia cunushquiain mun tapia min ashquiain cuscan. 22 Tsain futsari un mia cunushoni min tapinon. Min ua Upa Dios cufishomisi afanan un miqui nocoshquinon. Ascacun min pushu ano ua cunu futsa itishara huashohuun. Ascan mian cufishona cuscan Diosin nica. Ascashon miqui ua nichishquin. Ascapainon.
Pablonun ahuun tsain unutaquin ato yoisharani
23 U fu rafumisi nuno cunu muran nan Epafras mia yoisharai. Nanto arifi Jesucristohuunoa yoiaiton cunu muran iquimanifo. 24 Ascano Marcos non Aristarco non Demas non Lucas nanfoan u futan Jesús yonoshomisifo. Ascashon nanfoan mia tsain shara fomapai.
25 Nocon Ifo Jesucristo mia cashman shara huashofafainon. Nanti.
