1 Ato yosiainfoanno yora ichapafoan icoinra huacashon Jesús tanamisicoinfo inifo. Yora ichapafoan icoinra huariapaonifo. Nantianri nanno Israelifo Griego tsainman inifo. Shoco futsafo Israeli tsainmansi inifo. Nan Griego tsain yoimisifoan tsain chipunifo. —Nocon caifo aton tsain fusti yoimisifoan shafatifi tushu pashcanan huacashon aton ainfo funuomafo inain cuscacai nocon ainfo funuomafo atori ati inanmaran, —ishon tsain chipunifo. 2 Ato nicacani Jesús fu rafumisifo doce nantifi Jesús tanamisifo ichanancashon ato yoinonfo. —Non mato Diospan tsain yoifafaini. Noncai unutiroma mato tushu pashcashoshquin.

3 Ascan nocon yoramishtichin, maton murannoa nocofunufo siete catoncahuun mato tushu pashcanan huanonfo. Man tapia ratofomain Diospan Yoshin Shara fu rafucain shinansharamisiquin. Nan cuscarafo catonhuun non ato yononon mato tushu pashcanan shara huanonfo. 4 Ascan nonfin shafatifi Upa Dios cufifafainicain ahuun tsainri yoishquin, —ishon yoinifo.

5 Nicacani nantifi unimanifo. Ascashon Esteban catonnifo. Nanton fasi icoinra huamisi. Diospan Yoshin Sharapan a iquina ini. Felipe non Prócoro non Nicanor non Timón non Parmenas non Nicolás afo catonnifo. Nan Nicolás Israelifomafiashon nanfoan Diosin icoinra huaa cuscan arifi anorisi acaifo cuscan shinanni. Antioquía anoashu cainni. 6 Aton catoncashon Jesús fu rafumisifo ano iyonifo. Ascan nan doce ato manmancashon Upa Dios cufishonifo.

7 Ascatan Diosin tsain mai futsafoanriri yoifoanfafainifo. Jerusalén anoshon samamashta icoinra huanifo Jesús tanamisifo ica ini. Israelifoan aton yorafohuunshon Dios cufimisifo ichapafoanri Jesús icoinra huacashon ahuun tsain nicacoinnifo.

8 Esteban Upa Diosin shinanmasharani ahuun curushu inanni. Ascan ahuunshon ahuamamishti yora atiroma cuscan ato ismani. 9 Ascano Israelifoan aton ichananti pushu futsa nanno ichananshon ato anunifo. —Apaiyai cuscan huatiroforan, —ishon atohuunoa yoimisifo. Nanfocai afanan oinmatifoma. Nanfoan aton mai Cirene anoashu non Alejandría anoashu non Cilicia anoashu non Asia anoafori. Nanfo Esteban fu fochismanantanannifo. 10 Fochismanantanapaifiaifoan Diospan Yoshin Shara Esteban shinansharamani. Cayacaficoin ato yoiaino tsoan cumanima.

11 Ascano fustirasi yoinanpacunifo. Tsoa futsa nicanonma. —Estebanhuunoa tsain chaca yoitacahuun. Nanton Moisés yafi Diosqui tsain chaca huaaran, —ishon ato yoitacahuun. Estebanhuunoa chani yoinifo.

12 Ascan ahuunoa chani nicacani yorahuanrasi Estebanqui fiishquinifoqui. Ascano niaifo patasharifo non Moisés tsain tapimamisifoanri Esteban achinifo niaifofo ano iyoshcaquin. 13 Ahuunoa chani yoinifo, —Na nocofunun nocon Dios fu tsainti pushuhuunoa yafi Moisés noco yononi cuscahuunoari tsain chaca huariai. 14 Man non nicamisi yoiaiton, “Jesús Nazaret anoaton nocon Dios fu tsainti pushu paoanshquin. Moisés noco yononi cuscari fiananan huairan,” —ishon chani yoinifo.

15 Ahuunoa chani yoicashon niaifofoan fuiscaquin oianfo ahuun fuso. Diospan oinmati afu nai muran ica ointsa fupishtacoin ini.

<- Hechos 5Hechos 7 ->