IROKASHI 8

Tsinaneegi mutakovageigakeririra Jeso

1 Impogini iatake Jeso itimageigira matsigenkaegi yapatoitasanotara ontiri aikiro itimageigira terira intovaigasanoige, ikenkitsatimoigakeri maganiro ikamantaigakerira tyara inkantakempa Tasorintsi irogavisaakoigakerira maganiro kematsaigakerinerira impegakempara Igoveenkariegite. Itentaiganaari iritigankaneegi naigatsirira 12. 2 Aikiro ogiaiganakeri tsinaneegi yoneaganontaigakarira itimaguigavetakarora kamagarini, ontiri aikiro yovegaigakerira omantsigaigakera. Ario onake Maria Magarena yoneaganontakarira itimaguigavetakarora 7 kamagarini. 3 Otentaigakaro aikiro Sosana ontiri aikiro Joana, itsinanetsite Kosa inampina Erorishi neagetiniririra magatiro. Oaigake aikiro pashini tsinaneegi. Iroroegi onti mutakovageigiririra Jeso opaigirira koriki kameti impunaventaigakera tatarika ikogakogeigaka.

Jeso ikantakotakerora okenkitsataganira Iriniane Tasorintsi

(Mt 13.1-9; Mr 4.1-9)

4 Impogini inakera Jeso kara parikoti iatashiigakeri tovaini matsigenkaegi yapatoventaiganakarityo. Impo irirori ikantakotantake ikantaigiri maganiro: 5 “Iatake paniro matsigenka impankivagetakera turigoki. Iokagisetanakero pakarara pakarara itsotenkavagetanakero. Okonogagarantaka oparigigetanake avotsiku, impo agatitinatunkani. Impo iparigashiigakero tsimeri yogaigakarora. 6 Pashini okonogagarantaka oparigigetanake mapuseku, shintsi oshivokavetanaka kantankicha oroganake okamai, orovatsataketari kipatsi. 7 Okonogaka pashini oparigigetanake okitagigetakara okitsoki tovaseri timatsirira otsei. Impo oshivokavetanaka turigo ogenanekyatyo oshivokutanaka tovaseri irorori asaganakero okamai, tera ontime okitsoki. 8 Pashini okonogaka oparigigetanake okametipatsatakera kipatsi. Irorori pinkante oshivokanake okimotanake otimanake tovaiti okitsoki, okonogaka otimake 100.”

Iroro ikantakera Jeso maika inianake ikimoenkatanake ikanti: “¡Pikemaigakenarika maika atsi suretasanoigemparotyo nokantaigakempirira!”

Jeso yogotagaigakerira irogamereegi tyara okantaka ikantakogetakerora magatiro

(Mt 13.10-17; Mr 4.10-12)

9 Impogini yogaegiri irogamereegi ikantaigiri:

—¿Tatatyo oitara pikantakotake inkaara?

10 Irirori ikantaigiri:

—Pairani tera ogovetenkani tyara inkantaigakeri Tasorintsi matsigenkaegi irogavisaakoigakerira kameti impegakempara Igoveenkariegite. Maikari maika ikogake pogoigakerora viroegi. Antari nogotagaigirira pashinipage onti nokantakogetakero magatiro kametiniri

‘ineaigavetakempatyo kantankicha impegaiganakempa kañomataka tenirikatyo ineaige.

Inkemaigavetakempa aikiro, kantankicha onti onkomutapitsaigakempari.’

Jeso ikamantaigakerira irogamereegi ikantakotakerira inkaara

(Mt 13.18-23; Mr 4.13-20)

11 “Maika nonkamantaigakempi tatoita nokantakotake inkaara. Ogari turigoki onti nokantakotake okenkitsataganira Iriniane Tasorintsi. 12 Ogari parigigetankitsirira avotsiku inti nokantakoigake matsigenka kemisantaigavetakarorira Iriniane Tasorintsi, kantankicha igenanekyatyo ipokashiigakeri kamagarini imagisantakagaigakeri magatiro ganiri ikematsaigi kameti ganiri yogavisaakotagani. 13 Ogari parigigetankitsirira mapuseku inti nokantakoigake kemisantaigavetakarorira Iriniane Tasorintsi ishineventaigavetavakaro, kantankicha tera inkematsatasanoigero. Impogini opokashitakeri tsipereagantsi oga ikenaigake yapakuaiganairo ikañoiganaara okyara tekyara inkematsatumaige. 14 Ogari parigigetankitsirira okitagigetakara okitsoki tovaseri inti nokantakoigake kemisantaigakerorira Iriniane Tasorintsi ikemaigavetavakaro, kantankicha impogini isuretakoiganakaro tatarika oita yovankinaventaiganakaro. Ishineventaiganakari koriki ontiri tatarika ikogageigakerira irirori ovashi tyampa inkantaigakempa inkematsatasanoigakera. 15 Kantankicha ogari parigigetankitsirira okametipatsatakera kipatsi inti nokantakoigake suretakoigarorira kametiripage. Iriroegi ikemisantaigakero Iriniane Tasorintsi ikematsatasanoigakero impo ariompatyo ikematsatasanoiganakerori.

Ikantakotakerora Jeso magatiro manakovetankicharira

(Mr 4.21-25)

16 “Antari yogimataganira mechero tera ario intatakotenkani kovitiku. Aikiro teratyo ario irovirinitakotenkani otapinaku menkotsi omagantaganirira. Ontityo yovitakotagani menkotsiku kameti inkoneagitetakoigakeniri maganiro pitaigankitsirira kara. 17 Ario okañotaka tatarika oita managetankicharira maika impoginityo ogikoneatakenkani. Aikiro tatarika oita terira ogotenkani maika impoginityo ogotakenkani, ganigetari omanumataa. 18 Irorotari maika kemisantasanoigena nonkantaigakempira. Yogari kemavakerorira Iriniane Tasorintsi irirori irogotagakeri ariompaniri inkemasanotanakerori. Irirokya terira inkoge inkemavakerora ariompatyo imagisantanaerori magatiro ikemavetakarira, tesakonatari irogotasanotenika.”

Tyani impegaigake Jeso iitaneegi

(Mt 12.46-50; Mr 3.31-35)

19 Impogini opokake iriniro Jeso intiegiri irirentiegi pankotsiku inakera irirori, kantankicha tera inkiaige tsompogi onti inaigapaake sotsi, itikaigakeritari tovaini matsigenka. 20 Impo ikamantunkani Jeso ikantagani:

—Pokake piniro intiegiri pirentiegi aiño inaigake kara sotsi ikogaigake ineaigakempira.

21 Kantankicha irirori ikanti:

—Yogari kemisantaigakerorira Iriniane Tasorintsi aikiro itsatagaigakero, iriroegi pinkante nopegaigake ina intiri aikiro igeegi.

Okematsatakerira Jeso tampia ontiri inkaare

(Mt 8.23-27; Mr 4.35-41)

22 Impogini itentaiganakari Jeso irogamereegi iaigakera inkaareku yomateiganaka pitotsiku ikantaigiri:

—Tsame intati.

Impo iaiganake. 23 Antari yamaatakoiganakera imaganake Jeso. Impo otampiamatanaketyo omaranerikatyo tampia kara jiriririri ogatyo okenake ovoresekantanake oshatekaatanaka nia pitotsiku panikyatyo ontsitiganake. 24 Ishigateigamatanakarityo Jeso yogireaigutarityo ikantaigakerira:

—¡Gotagantatsiriraa! ¡Gotagantatsiriraa! ¡Atake atsitigakoiganake!

Itinaamatanakatyo Jeso inianakerora tampia ikantiro:

—¡Peganaempa, intaga pitampiati!

Iniiro aikiro inkaare ikantiro:

—¡Maireatanae!

Ogatyo okenake opeganaa tampia, ario okañotaka inkaare irorori omaireatanai. 25 Impo ikantaigutarityo irogamereegi:

—¿Tyatirityo maika pikematsaigakenara pogoigakenara nagaveavagetira?

Kantankicha iriroegi itsarogavageiganaketyo yogaiganakera kavako ikantavakagaiganakara:

—¿Tyanimpatyora yoga, iniimatakerora tampia ontiri nia okematsatakeri?

Jeso intiri itimagutakerira kamagarini

(Mt 8.28-34; Mr 5.1-20)

26 Impo yogonkeigamataka Jerasaku katinkasanotyo ontatikyatakera Garirea. 27 Iroro yaguivetanakara Jeso ineiri ikenapaake paniro surari timatsirira kara. Itimagutakeri kamagarini yapatoventaigakarityo kara ishiriagakogematatyo. Tera irogagutempa, aikiro tera intime pankotsiku onti itimi imperitanakiku yogantaganirira igamaga. 28-29 Otimake kutagiteri ipigatagagematirityo kara. Yaganavetunkanityo yogusotantanavetunkani karenatsa irakoku ontiri igitiku ipampogiasanotunkani, kantankicha teratyo iragaveenkani, ontityo itimpatuagematirotyo kara, impo yogari kamagarini ishigakagagematanakarityo anta parikoti terira intime matsigenka. Irorotyo ineavakerira Jeso itigeroaventamatanakarityo ikaemanakera:

—Virori vinti Jeso Itomi Tasorintsisanorira timatsirira enoku. ¿Tyara pinkantakenara? Atsi garatyo patsipereakagana. ¡Tsarogakagavagetenakario!

Ikantantakaririra maika matakatari ikantakeri Jeso kamagarini inkontetanaera iokanaerira. 30 Impo ikantiri Jeso:

—¿Tyara pipaita?

Ikanti irirori:

—Onti nopaita Tovainirira.

Ikantantakarira maika, tovainitari inaigake timaguigakeririra. 31 Iriroegi ikantaigakeri Jeso ganiri itigankaigiri savipatsaku. 32 Ario inaigake shintori kara otishiku isekatavageigakara itovaigavagetiratyo kara. Impo yogari kamagarini inianiaiganakeri Jeso ikantaigakerira intigankaigakerira intimaguigakerira shintori. Irirori ikantaigirityo:

—Nanityo piaige.

33 Igenanekyatyo ikonteigapanuti iokaiganairi itimaguigavetakarira irirokya iatashiigavetaka shintori. Iroro itimaguigavetapaakarira ogatyo ikenaigake ishigaiganaka otseraaku yanonkaiganaka iokaavioigaka pokorom pokorom pokorom, ipogereaigakatyo maganiro.

34 Iroro ineaigavakerira sentaigiririra itsarogavageiganaketyo kara ishigaiganaka iaigai ikamantantaigapaakera anta itimaigira itsotenkavageiganakerotyo, ikemakotantaigavakaririra timaigatsirira kara intiegiri aikiro timageigatsirira parikotipageku. 35 Ikemakoigakerira maganirotyo iaigake inkamosoiguterira. Impo yogonkeigapaakara inakera Jeso ineaigapaakeri itimaguvetakarira kamagarini pirinitake inampinaku ikemisantakerira. Gagutaka manchakintsi kañotasanovagetaatyo ikyara. Iroro ineaigakerira itsarogavageiganaketyo kara. 36 Maganiro neaigakeririra yoneaganontakarira ikamantageigavakeri tyara ikantakeri yoneagaigakarira timaguigavetakaririra. 37 Impo maganiro timaigatsirira Jerasaku ipinkaiganakerityo Jeso ikantantaigakaririra:

—Nokogaigavetaka piataera parikoti.

Ovashi yomatetanaa pitotsiku iriataera. 38 Impo yogari itimaguvetakarira kamagarini ineavakerira iatanaira ikogavetaka irogiatanakerimera ikantiri:

—Nompoke naro.

Kantankicha irirori ikantiri:

39 —Gara pipoki. Ariompa piatae pivankoku pinkamantantapaakera tyara ikantakempi Tasorintsi itsarogakagakempira.

Irirori iatai ikamantageigapaakeri maganiro timaigatsirira kara itsarogakagakarira Jeso yoneagaigaarira kamagarini timaguigavetakaririra.

Jeso yoganiairora irishinto Jairo

(Mt 9.18-26; Mr 5.21-43)

40 Impogini ipiganaa Jeso imonteanaa intati. Maganirotyo yagaigavairi ishineventaigavaarira, igantagatari yogiaigairira. 41 Impo ikenapaake paniro jorio ipaita Jairo. Irirori inti tinkamitatsirira pankotsiku yapatoitantaigarira jorioegi. Iroro ineapaakerira Jeso itsatimatashitapaakerityo yompatakaventapaakarira ikantakerira iriatakera ivankoku, 42 omantsigavagetanaketari panirosanorira irishinto panikya onkamanake.

Antari iatanakera Jeso yogiaiganakerityo tovaini matsigenkaegi itsaiseventanakarityo kara panikyatyo inkanaroaiganakeri. 43 Ario onake aikiro kara paniro tsinane mantsigavagetankitsirira oseriintevagetanityo pairani ogatyo onakotanake 12 shiriagarini. Yogavintanaigavetakarotyo gavintantaigatsirira teratyo ovegaempa ariompatyo oatiri, niganki otsonkatasanotanakeri ogorikite ogasanotakatyo noganiro. 44 Irorori opokake okenashitapaakeri Jeso itishitaku otsagatakotapaakeri okaratsaiku imanchaki. Irorotyo otsagatakotakerira ogatyo okenake okaraagapagenityo oriraa. 45 Inianake Jeso ikanti:

—¿Tyani tsagatakotakena nomanchakiku?

Ikantaiganaketyo maganiro:

—Tera tyani tsagatakotempine.

Kantankicha iniamatanaketyo Perero intiegiri itentaigarira ikantaigi:

—Gotagantatsirira, pineavetakarityo yavinaavioiganakempira itatsinkanaiganakempira kara.

46 Kantankicha Jeso ariompatyo inianakeri ikanti:

—Aiño tsagatakotakenarira, noneakatari novegantaarora nagaveane.

47 Irorori oneakera yogotakerora okenamatapaaketyo iriroku oshigekanakera shige shige shige ompatakaventapaakarira okamantakerira tatoita otsagavitakeri, aikiro okamantakeri okanti:

—Irorotyo notsagatakotakempira ogatyo okenake okaraagapagenityo noriraa.

48 Irirori ikantiro:

—Noshinto, maika pogotaketari nagaveakera novegaempira, nerotyo povegantaarira. Maikari maika piatae pishinetakempara gara pikenkisureaa.

49 Impo aiñokyara iniiro ikenapaake pashini iponiaka ivankoku Jairo ikantiri:

—Matakaniroro kamake pishinto, intagati poveraanatiri Gotagantatsirira.

50 Kantankicha Jeso ikantiri Jairo:

—Gara pitsarogi, nagaveaketari noganiaerora pishinto. Pinkematsatakenarika nokantakempira maika anianaetyo.

51 Impo antari yogonketapaakara ivankoku Jairo ikanti gara tyani kiimatatsi pashini. Intagani itentaiganaka Perero, Joan, Santiago, Jairo ontiri itsinanetsite ikiaiganakera tsompogi. 52 Ineaigapaakeri maganiro iragatsikaigaririra igamaga iragaigamataka kaemavaimataketyo kara, kantankicha Jeso ikantaigapaakeri:

—Gara piragaiga, tera ario onkame, onti omagake.

53 Kantankicha iriroegi ogatyo ikenaigake ikavakavaimatanaketyo ikaavintsanaiganakerira, ineaigakerotari mataka kamasanotake. 54 Impo yogari Jeso ikatsavakotakero ikimoenkatanake ikantiro:

—¡Ananeki, tinaanae!

55 Oga okenake anianai otinaanaa. Impo ikantake Jeso ompakenkanira osekatakempara. 56 Yogari iri ontiri iniro yogavageiganaketyo kavako, kantankicha Jeso ikantaigiri:

—Gara tyani pikamantaigi noganiairora pishinto.

<- IROKASHI 7 IROKASHI 9 ->