Sǝna mala Yohana 12

Ɓwama ɓǝl muna sǝ
Dǝragon ama nǝ̀ wal-luí

1 Pǝlǝa ɓè nggea gir'lǝmdǝa mǝ'pa ndali pusǝrǝi a kùli. Ɓè ɓwama na oasǝ pwari arǝì nda agir-nggūrǝu male, sǝ tamsǝ akusǝi amur zongŋo. À oasǝi wi jeko[a] a ɓamúrí mǝnana ndanǝ anlero lum-nong-ɓari arǝì ka. 2 Ɓwame gongŋǝna, malanǝ̀ gbáshí, sǝ kwanban andǝ tanni mala gbáshí ka, tsǝì kǝ ɓua.[b]

3 Nyare ɓè gir'pandali mǝgule pusǝrǝi a kùli. Kaɓa ɓè nggea Dǝragon mǝbangŋe na, ndanǝ aɓamuri tongno-nong-ɓari andǝ anjawe lum, sǝ amur koya ɓamúrí ka ndanǝ sukuru-murǝm kàm.[c] 4 Yì Dǝragon ngga, wuli nggilate pwan banì mwashat aɓalǝ agauwe tàrú mala anlero mǝnana a kùli ka, rangsǝia a ɓanza. Sǝ yi came a ɓadǝm ɓwama mǝno kǝ gbashí ka, ace mǝnana ɓǝ̀ gbashína ani ka nǝ̀ shak muni.[d] 5 Ɓwame gbáshí muna-ɓwabura mǝnana nǝ̀ yál aɓwana kat a ɓanza nǝ gara bolo ka. Sǝ muna ka, Ɓakuli fwê, twali um nǝi a baní, kya dumsǝi atè amur buno-murǝm male.[e] 6 Ɓwame ɓangŋa, o a ɓabondo, a ban mǝnana Ɓakuli gilǝkini wi nǝ̀ tsǝkiri kàm aɓalǝ anonggio á-mwashat nǝ́ gbǝman-ɓari nǝ́ lumi-tongno-nong-mwashat ka [1,260].

Makel lo munǝo arǝ Dǝragon

7 Pǝlǝa munǝo lo a kùli. Ɓè gbani mǝturonjar mala Ɓakuli, yì Makel ka, lo andǝ amǝturonjar mǝnana atè ka sǝ à soa munǝo arǝ Dǝragon; sǝ Dǝragon andǝ amǝturonjar male gbal ka, à oa munǝo a rǝia[f]. 8 Sǝ Dǝragon ngga munǝo gandǝi. Yì andǝ amǝturonjar male ka, à ɗwanyi bancame malea a kùli. 9 Nda à ramta mǝnia yì nggea kaɓǝne Dǝragon, mǝno yì share n'yau mǝnana à tunǝki ama Mǝɓealɓikea sǝ Shetan, mǝnana kǝ swarkita aɓwana kat aɓa ɓanza ka. Yì Dǝragon andǝ amǝturonjar male kat ka, à ramtea a kùli à yì kpa a nzali a ɓanza![g]

10 Pǝlǝa ǝn ok ɓeɓwa a kùli loasǝ gi kǝ̀rkǝ́r bang cau ama:

<<Adyan ngga, amsǝban

andǝ rǝcandǝa,

andǝ Domurǝm mala

Ɓakuli ma'sǝm,

andǝ gara-murǝm mala

Kǝrǝsti male ka, à yina!

Acemǝnana mǝ'yinǝ

acauɓashi

amur amǝ'eam sǝm,

mǝnana kǝ oasǝkimuria,

a ɓadǝm Ɓakuli ma'sǝm,

du andǝ pwari ka,

à ramǝna tè a ɓanza![h]

11 À limurǝm amurí

nǝ nkila mala Mǝgam,

andǝ nakún malea

nǝ mǝsǝcau

amur Mǝgam

a ɓadǝmbǝ aɓwana;

yia ka à eare

à pa yilǝmia,

à nyar nǝ tea ɗàng

yi pur a lú malea.

12 Ace mǝno ka,

pak banɓoarnado,

We kùli!

Sǝ wun mǝnana kat

wu do a kùli ka,

wu pak banɓoarnado!

Sǝ mala nzali andǝ

nggeamùr ka,

gìr'mur'mwana amur wun,

acemana Mǝɓealɓikea,

yì Shetan ngga,

sulǝna a ban wun.

Lùmsǝ nǝ bumlulla kǝ̀rkǝ́r,

acemǝnana sǝlǝna ama

pwari ueki wi bǝti.>>[i]

13 Lang Dǝragon sǝni à ramna tè kpana a ɓanza ka, pǝlǝa lo pǝrta ɓwama mǝno, mǝnana ɓǝl muna-ɓwabura ka. 14 Sǝ ɓwama ka, Ɓakuli pe wi abu-nyál ɓari mala nggea nkwang mǝgule ɓǝ̀ yàle ɓǝ̀ o a ban mǝnana à gilǝki wi a ɓabondo ka; akanó ka, à nǝ̀ tsǝkiri pǝlǝa tàrú nǝ tsùrú, Dǝragon pà nǝ̀ gandǝ kumi ɗang.[j] 15 Dǝragon pǝlǝa mǝn kúni polǝ mùr-gùla atà ɓwama ace mǝnana ɓǝ̀ mùr ɓǝ̀ kya pwani ɓǝ̀ um nǝi ka. 16 Sǝ nzali ka bwalì ɓwama kàm; nzali mǝn kúni sonzǝ mùr nggeasala mǝnana Dǝragon polǝi ka. 17 Gìr mǝnia ka pè Dǝragon bumlulla kǝ̀rkǝ́r arǝ ɓwama man. Nda nyare o nǝ̀ ká munǝo arǝ cili amuna mala ɓwame, yia aɓwana mǝnana kat à kǝ kpata anzongcau mala Ɓakuli, sǝ à duk amǝ nakún Yesu nǝ mǝsǝcau ka. 18 [Dǝragon pǝlǝa yi came a sala a kun nggeamùr.]

<- Sǝna mala Yohana 11 Sǝna mala Yohana 13 ->