Cautera aban ká aban
AMƏ IBƏRU Mǝncau Cauterǝa aban ká a ban Amǝ Ibǝru ka à gìlǝì aban ká aban amǝ kpata Kǝrǝsti, nggeamurǝmi ka amǝ Yahudi, mana à kum ɓamuria aɓa ká-mǝɓane mala vwaki buia arǝ paɓamuru malea ka. Ceì kania sǝm ama, Yesu mana Muna mala Ɓakuli na ka, kàni okiru mǝɓafoe aban Ɓakuli Tárrú a njar mala nutanni; sǝ yi ka kútì apǝris, andǝ amǝ'ɓangnǝa, andǝ amǝturonjar mala Ɓakuli kat nǝ gulo. Dobuno-pǝris male ka málá male pà kàm ɗang. Agir-nkila andǝ aɓoro mǝnana à pākia a nza mala Kùrcau Mǝ'e ka, ayilǝmi gir na, mala lǝmdǝ lú mala Yesu, mana nda njar mǝɓafoe mala amsǝban mǝnana Ɓakuli angŋa dǝmba kànìna, twal a share ɓanza ka. Yiu mala Yesu ka nda yinǝ Bǝsa Kùrcau mǝnana ɓoaro kutibani ka. Nǝ pàɓamuru aban Yesu ka, ɓwa nǝ̀ kum àwá a bu cauɓikea, andǝ ɓangciu, andǝ lú. À kwarkir amǝkwaɗi ɓǝà dumnǝ mǝsǝcau aɓa paɓamuru malea kàngkàng. Ɓǝà soa mǝsǝia arǝ Yesu, sǝ ɓǝà shakminǝia arǝ atanni andǝ apatanni mǝnana à nǝ̀ yipià wia ka. Agir mǝnana a ɓālǝi ka Ɓakuli lǝmdǝ rǝì nǝban Kǝrǝsti1:1--3:19 Gulo kutibanì mala Kǝrǝsti amur amǝturonjar1:4--2:18 Gulo kutibanì mala Kǝrǝsti amur Musa andǝ Jesǝwa3:1--4:13 Gulo kutibanì mala dobuno-pǝris mala Kǝrǝsti4:14--7:28 Gulo kutibanì mala kùrcau mala Kǝrǝsti8:1--9:22 Gulo kutibanì mala pa gir'nkila mala Kǝrǝsti9:23--10:39 Do nggeamurǝmi mala paɓamuru aban Ɓakuli11:1--12:29 Pwasǝbum Ɓakuli13:1-19 Hiwi ace gircau13:20-21 Masǝlǝata acau13:22-25
1Ɓakuli nacau nǝ mburkun
amǝ'ɓangnǝa male 1 A pwarian ngga, Ɓakuli nacau nǝ aká sǝm kusǝ pas arǝ anjargula ɗàngɗáng, nǝ mburkun amǝ'ɓangnǝa male. 2 Sǝ a masǝlǝata nza man ngga, yi nacau nǝ sǝm, nǝ mburkun Muni, mǝnana twali ɓǝ̀ yì duk mǝliɓala na amur girbunda kat, sǝ nǝ́ yi sǝ pusǝ kuli andǝ nzali ka. 3 Yì Muna mala Ɓakuli ka, nda tǎlaban mala ɓoarɓwa mala Ɓakuli, andǝ purban male yì Ɓakuli. Nǝ́ cau male mǝ'rǝcandǝe sǝ bwal agirbunda kat a banɓwáná. Anzǝm mana yi langŋǝna acauɓikea ma'sǝm ngga, pǝlǝa do a kùli a bù-mǝlì mala Ɓakuli mǝnana Karban kat ka.4 Anggo sǝ Muna mala Ɓakuli ka yi kum gulo kútì amǝturonjar, kǝla mǝnana lullǝu mana Tárrí pe wi ka, kútì malea ka.
Gulo mala Yesu amur amǝturonjar 5 Yana ɗe atà amǝturonjar mala Ɓakuli, mǝnana Ɓakuli ne wi àkǝ̀ pwari ama, <<A nda Munem, yalung ngga, ǝn dumǝna Tárró>> ka?[a] Ko báng gbal amur ɓekǝ mǝturonjar ama, <<Mǝ nǝ duk Tárrí, sǝ yì ka, nǝ̀ duk Munem>> ngga[b]? 6 Ɗǝm ngga, mǝnana Ɓakuli yinǝ Muna-dǝmba male a ɓanza ka, na ama, <<Amǝturonjar mala Ɓakuli kat ka, ɓǝà peri a baní.>>[c] 7 Aɓa cau male amur amǝturonjar ka, Ɓakuli bang ama, <<Kǝ tsǝk amǝturonjar male ɓǝà pǝlǝ gung, sǝ amǝtúró male ka, lasǝ bǝsa.>>[d] 8 Sǝama amur Muni ka, bang ama, <<Domurǝm mo, we Ɓakuli ka, masǝlǝate pà kàm ɗang, sǝ gara-murǝm mala domurǝm mò ka, nda do amur mǝsǝcau. 9 We ka, a earce ɓealɓoarna, sǝ a ɓinǝce ɓealɓikea; ace mani ka, Ɓakuli, yì Ɓakuli mo, loasǝo cio amur aɓio yì mǝnana yí ɗārǝo nǝ mùrú mala bumpwasǝa ka.>>[e] 10 Nyar ɗǝm na ama, <<We Mǝtalabangŋo, a tite ka, a nda a kwakita ɓanza, sǝ a pak kùli nǝ abuo ka. 11 Yia ka, tea nǝ̀ twalo, sǝ We ka, a nda àkǝ̀ banì, a pà nǝ gǝshi ɗang; yia ka, à nǝ̀ tsǝuri kǝla eakǝna lagir. 12 We ka, a nǝ kàrria kǝla kàr lagir; à nǝ̀ nggáɗiǎ kǝla nggubyau. Sǝ mo ka, a pà nǝ nggaɗi ɗang, apǝlǝa mo pà nǝ̀ mal ɗang.>>[f] 13 Ata amǝturonjar ka, yana Ɓakuli ne wi àkǝ̀ pwari ama, <<Do a buam-mǝlì, she ɓǝ̀ ǝn nyesǝna aɓio amǝbura à pǝlǝna buno-tsǝk kusǝu a ɓakusǝo ka?>>[g] 14 Nggearǝ amǝturonjar kat ka, abangŋo na mǝnana à pàkkiyi túró, à kǝ túriá ɓǝà kǝ ɗenyinǝ aɓwana mǝnana à nǝ̀ kum amsǝban ngga re?
Amǝ Ibǝru 2 ->
amǝ'ɓangnǝa male
4 Anggo sǝ Muna mala Ɓakuli ka yi kum gulo kútì amǝturonjar, kǝla mǝnana lullǝu mana Tárrí pe wi ka, kútì malea ka.