1 Adyan ngga muna, yì Samuyila ka, ndarǝ pakkì Yahweh túró a ɓadǝm Eli. [a]Arǝ abákú mǝno ka, Yahweh kǝ nacau nǝ aɓwana tùtù ɗang; sǝ sǝna ka làkkì ɗàng.

2 A ɓè dù, Eli mǝnana amǝsǝì kǝ sǝnban ɗǝm pepè raka, ndaban nongŋo a ban mǝnana nonggiyi kam ngga, 3 sǝ pitǝla mala Ɓakuli ka,[b] à malaká limi ɗàng. Sǝ Samuyila ka, ndaban nongŋo a ndà mala Yahweh, a ban mǝnana Akwati mala Ɓakuli pàk kàm ngga.

4 Pǝlǝa Yahweh tunǝ Samuyila, sǝ Samuyila ear ama, <<Mǝ ndya ka!>>

5 Pǝlǝa ɓangŋa wari aban Eli sǝ ne wi ama, <<Mǝ ndya ka, a tunǝam.>>

Sǝ Eli banggi wi ama, <<Ən tunǝo ɗàng. Nyare kya nongnǝ-nongŋo.>> Nda nyare nongnǝ-nongŋo ka.

6 Yahweh nyare tunǝban ama, <<Samuyila!>> Sǝ Samuyila lo wari aban Eli sǝ ne wi ama, <<Mǝ ndya ka, a tunǝam.>>

Sǝ Eli banggi wi ama, <<Ən tunǝo ɗàng, munem; nyare kya nongnǝ-nongŋo.>>

7 Samuyila ka sǝlǝ ama Yahweh na kǝ tunǝi ka ɗàng, acemǝnana cau mala Yahweh malaká yiu a baní akǝ fara anggo ɗàng.

8 Pǝlǝa Yahweh tunǝ Samuyila ɗǝm tàruia tunǝban. Samuyila lo wari aban Eli sǝ ne wi ama, <<Mǝ ndya ka, a tunǝam!>>

Nda Eli yi sǝlǝa ama Yahweh na kǝ tunǝ mune ka. 9 Acemani ka, Eli banggi Samuyila ama, <<Nyare kya nongnǝ-nongŋo, sǝ ɓǝ̀ tunǝno ɗǝm ngga, ne wi ama, <Nacau, Yahweh, guro mò na kǝ ueo ka.> >> Nda Samuyila nyare wario kya nongnǝ-nongŋo a ban nongŋo male ka.

10 Sǝ Yahweh yiu yi came, sǝ tunǝban kǝla mana a dǝmbe ka, ama, <<Samuyila! Samuyila!>>

Samuyila pǝlǝa ear ama, <<Nacau, guro mò na kǝ ueo ka!>>

11 Pǝlǝa Yahweh banggi Samuyila ama, <<Sǝni, Mǝ ndo mǝ nǝ pàk ɓegìr a Isǝrayila; ɓwa mana kat okce ka, nǝ̀ gǝggǝli. 12 A pwari mǝno ka, mǝ nǝ̀ lùmsǝ cau mǝnana ǝn ne amúr Eli andǝ ɓala male ka, twal a tite aban ká masǝlǝate. 13 Ən bangŋǝni wi nǝma mǝ ndo mǝ nǝ ɓashì ɓala male tàtǝ́k, ace cauɓikea mǝnana sǝlǝce ka, acemǝnana amuni [c]bang caukyauwikiban amur Ɓakuli, sǝ gimbia ɗàng. 14 Acemani ka, ǝn kángìr aban ɓala mala Eli ama, <Cauɓikea mala ɓala mala Eli ka, à pa nǝ̀ shawuɗi nǝ gìr'nkila ko pàɓoro ɗàng tàtǝ́k.> >>

15 Nda Samuyila nongŋo bà dǝmbari. Pǝlǝa mǝngi akúnda mala ɓala mala Yahweh. Sǝ Samuyila ka ɓangciu pàkki wi arǝ ne Eli mǝno yì sǝna ka. 16 Sǝ Eli tunǝ Samuyila ama, <<Samuyila, munem!>>

Sǝ Samuyila eari wi ama, <<Mǝ ndya ka.>>

17 Eli ɗì ama, <<Mana Yahweh banggo? Ida, kǝa sǝmbǝ́rǝàmì ɗàng. Ɓakuli nǝ̀ ɓashio kǝ̀rkǝ́r yi mǝnana ɓǝ̀ a sǝmbǝ́rǝàm kǝcau mana banggo ka!>> 18 Nda Samuyila ne wi cê kat ka. Sǝmbǝrǝi wi kǝ cau ɗàng. Eli pǝlǝa bang ama, <<Yì nda Yahweh. Ɓǝ̀ pàk gìr mǝnana sǝni nda mǝɓoarne a mǝsǝì ka.>>

19 Samuyila lidǝmba nǝ̀ gulo, sǝ Yahweh na atè. Kǝ cau male kpa a nzali ɗàng. 20 Amǝ Isǝrayila puppup, twal a Dan aban ká Biyasheba yi sǝlǝa ama, Samuyila ka, mǝɓangnǝa mala Yahweh na nǝ mǝsǝcau. 21 Yahweh lidǝmba nǝ pusǝrǝi a Shilo; lǝmdǝrǝì a Shilo aban Samuyila nǝ cau male.

<- 1 Samuyila 21 Samuyila 4 ->