1 Menge kedowa ko, biyasa kaw tepad te menge punù te gobirno, aw yan netegahan niyo te keilangan tomolò se otaw te punù te gobirno taman olò te pegkematay din. Meneng aw matay se otaw, eked den keleges tomolò. 2 Yan eked todà pengognan se bayi doen esawa singed aw matay se esawa din, so yan se punù te gobirno. Meneng aw matay se esawa te bayi, mepakay aw mengognan todà, so wedad den labut din te punù sìyan. 3 Meneng aw tomaking se bayi te doma meama te eked pa kematay se esawa din, yan mekelakad. Meneng aw matay se meama aw todà mengognan se esawa din, eked pekelakad so wedad kelebutan te punù te gobirno tepad te monà esawa din.

4 Menge kedowa ko, iling kidon heman kenyan, so pegkematay i Cristo, iling te nematay kidon heman doma kandin. So nematay kidon, eked kidon den keleges tomolò te menge punù ingkeliwat i Moises, meneng mepakay aw tomaking kidon den ki Cristo inantay te Timanem lekat te nematay, amon tomolò kidon te ibeg te Timanem. 5 Kedengan dalem te pegtaking tadon te ibeg te pedowan tadon, doen medaet ibeg tadon nekeboyo kenitadon pineokit te menge punù ingkeliwat i Moises. Yan se doun te detengan kidon peden te kemetayun, so gayed kidon mig-inang te salà. 6 Meneng so iling te nematay kidon den, eked kidon keleges tomolò te menge punù ingkeliwat i Moises, so impelowà kidon den te Timanem lekat te pegkeallang tadon kenyan. Kedengan te pegtaking tadon te menge punù insolat i Moises, wedà kidon peketolò te ibeg te Timanem. Meneng songkani, mekebatog kidon den tomolò te ibeg te Timanem so egtabang se Espiritu Santo kenitadon.

7 Nayan, doen besi menge otaw meg-aneng-aneng den te medaet se punù ingkeliwat i Moises. Meneng kenà iyan medaet, so pineokit te punù ingkeliwat i Moises, netegahan ko den aw eden se salà. Simpana wedad punù megsagda te peg-ingà, eked ko ketegahi te medaet se peg-ingà. 8 Meneng pegketaga-taga ko te punù te Timanem tepad te peg-ingà, labi a pa gayed eg-ingà so medaet se ibeg te pedowan ko. Simpana wedad punù, wedà ko ketegahi aw eden se salà. 9 Kedengan te wedà ko ontò ketegahi aw eden se impunù te Timanem, eden ko aw mèpiya se pedowan ko. Meneng pegketaga-taga ko te kebenalan tepad te menge punù, netegahan ko den te nelegeb se pedowan ko te salà, aw detengan a te kemetayun wedad temanan. 10 Pengkey doen kaling pedowan wedad temanan impakang diyà te otaw ontò tomolò te menge punù te Timanem, meneng netegahan ko te detengan a te kemetayun tandà te peglàpang ko te punù din. 11 Neekalan a te salà, so pengkey mèpiya peden se pinelimanan ko tandà te pegtolò ko te menge punù, meneng detengan a te kemetayun wedad temanan tandà te peglàpang ko te punù te Timanem.

12 Wedad palos kemalì diyà te menge punù ingkeliwat i Moises. Lekat te Timanem se teg sebad-sebad punù sìyan, aw ontò iyan metòlid aw ontò mèpiya. 13 Meneng ikà niyo eg-aneng-aneng te mèpiya punù te Timanem se linekatan te kemetayun ko. Kenà iyan, so detengan a te kemetayun tandà te peglàpang ko te mèpiya punù sìyan, amon metaga-taga a te medaet se salà ininang ko. Pineokit te mèpiya punù te Timanem, impetaga-taga a te ontò medaet se salà ininang ko.

14 Netegahan tadon te mèpiya se punù te Timanem so lekat iyan kandin. Meneng doen pa medaet ibeg te pedowan ko. Iling a te allang so eg-inang a te salà. 15 Nepela a te eg-inangen ko, so pengkey meibeg a meg-inang te mèpiya, meneng eked ko iyan keinang. Pengkey eked a keibeg meg-inang te medaet, meneng yan se egkeinang ko. 16 Nayan, aw eked a keibeg meg-inang te medaet eg-inangen ko, yan se pengilala te netegahan ko te metòlid se punù te Timanem. 17 Yan kenà siaken se eg-inang te medaet, meneng lekat iyan te medaet ibeg te tapay pedowan ko. 18 Netegahan ko te wedad palos mèpiya kidoen te tapay pedowan ko, so pengkey meibeg a meg-inang te mèpiya, meneng eked ko iyan keinang. 19 Yan se doun te eked ko keinang se mèpiya inangen ko peden. Meneng gayed ko egkeinang se medaet eked ko peden inangi. 20 Aw egkeinang ko se eked ko peden inangi, yan kenà siaken se eg-inang te medaet, meneng lekat iyan te medaet ibeg te tapay pedowan ko.

21 Seini se gayed ko meinang. Aw meibeg a meg-inang te mèpiya, medaet se inangen ko. 22 Pengkey didalem te pedowan ko, ibeg ko tomolò a te ibeg te Timanem, 23 meneng netegahan ko te sebad se ibeg te lawa ko. Iling te egbolaw se ibeg te lawa ko aw aneng-aneng ko. Yan neallang a diyà te medaet ibeg te lawa ko. 24 Ontò melima se pegkesawol ko sìyan. Sinu se megpelowà kanak lekat te pegkeallang ko diyà te medaet ibeg te pedowan ko detengan te kemetayun? 25 Yan egpesiontong a diyà te Timanem, so impelowà a din den pineokit te Pengolo tadon si Jesu Cristo.

Yan mig-indan a den kenyo te kelimahan ko. Pengkey ibeg ko tomolò a te ibeg te Timanem, meneng egpekeinang a pa te medaet so doen pa medaet ibeg te pedowan ko.

<- Roma 6Roma 8 ->