1 Nayan, doen besi menge otaw meg-aneng-aneng te mèpiya aw gayed kidon meg-inang te salà amon labi pa dakel se keido te Timanem kenitadon. 2 Meneng eked iyan kepakay. Pegpesakop tadon diyà ki Cristo, iling kidon te otaw nematay so eked kidon den keibeg te salà. Yan eked den heman kepakay aw meg-inang kidon te salà. 3 Netegahan niyo den te pegpebonyag te kedita tadon migpesakop diyà ki Jesu Cristo, migsebad kidon diyà te kemetayun din kidoen te kros. 4 Pineokit te pegpebonyag tadon, iling te nematay kidon doma kandin, aw iling te inlebeng kidon heman doma kandin. Neinang iyan amon begayan kidon te Timanem te kaling pedowan, iling te peg-antay din ki Cristo lekat te nematay pineokit te tolos din.

5 So migsebad kidon den diyà ki Cristo te pegkematay tadon iling kandin, yan megsebad kidon heman diyà kandin te pegkeantay tadon iling te pegkeantay din. 6 Netegahan tadon te peglansang ki Jesus doton te kros amon matay, iling te inlansang heman se tapay pedowan tadon doma kandin doton te kros, amon eked kidon den keibeg meg-inang te salà, aw amon eked kidon den keallang te salà, 7 so aw matay se otaw, eked sikandin peg-inang te salà. 8 So iling te nematay kidon den doma ki Cristo te pegpemenal tadon kandin, yan netegahan tadon te binegayan kidon heman te kaling pedowan wedad temanan iling kandin. 9 Netegahan tadon den te inantay si Cristo lekat te nematay, aw eked palos sikandin todà kematay. Dinaeg din den se eneg te kemetayun. 10 Mekesebad olò sikandin kematay, aw eked palos sikandin todà kematay. Pineokit te pegkematay din, dinaeg din se eneg te salà. Neantay den sikandin lekat te nematay, aw gayed den ipegduyun se Timanem pineokit te eg-inangen din. 11 Iling heman kenyan, keilangan eneng-enengen niyo te iling kaw den te otaw nematay so eked kaw den keibeg te salà. Pineokit te pegpesakop niyo diyà ki Jesu Cristo, binegayan kaw den te kaling pedowan, aw yan keilangan iduyun heman se Timanem pineokit te eg-inangen niyo.

12 Yan eked den kepakay aw beyà-beyaan kaw te salà. Eked den kepakay aw tomolò kaw te medaet ibeg te pedowan niyo. 13 Ikà niyo eglegamit te lawa niyo meg-inang te salà. Meneng keilangan ipelowan niyo se Timanem diyà kenyo, so impelowà kaw din lekat te kemetayun aw binegayan kaw din den te kaling pedowan. Begayi niyo se lawa niyo diyà te Timanem amon gemiten din iyan meg-inang te metòlid. 14 Eked kaw den keleges meg-inang te salà, so nekelowà kaw den kenà pineokit te menge punù ingkeliwat i Moises, meneng pineokit te keido aw tabang te Timanem.

15 Nayan, pengkey eneng-enengen te Timanem te metòlid kidon kenà pineokit te pegtolò tadon te menge punù ingkeliwat i Moises meneng pineokit te keido din, ikà niyo eg-aneng-aneng te mepakay aw meg-inang kidon te salà. Ikà niyo eg-aneng-aneng iling kenyan. 16 Netegahan niyo den, aw megpeallang kaw diyà te doma otaw, keilangan tomolò kaw kandin. Iling heman kenyan, aw meallang se otaw diyà te salà, detengan sikandin te kemetayun wedad temanan. Meneng aw tomolò se otaw te Timanem, eneng-enengen te Timanem te metòlid sikandin. 17 Kedengan, neallang kaw te salà. Meneng ontò a den egpesiontong diyà te Timanem, so nelobos den se pedowan niyo egtolò te kebenalan intoladà kenyo tepad te Timanem pinesekopan niyo. 18 So impelowà kaw den lekat te salà, keilangan metòlid se eg-inangen niyo. 19 Kenà medalem se kagi ko kenyo seini, so ibeg ko mekelabet kaw te toladà ko kenyo. Kedengan, neallang kaw te salà, aw ginamit niyo se lawa niyo mig-inang te salà, aw gayed niyo pigdogangan se salà. Meneng songkani, keilangan gemiten niyo se lawa niyo meg-inang te metòlid amon benal kaw egpenimanem.

20 Kedengan te pegkeallang niyo te salà, wedà kaw peg-aneng-aneng tepad te metòlid ibeg te Timanem. 21 Meneng wedad ontong niyo lekat te ininang niyo kedengan, sìyan medaet egkeyèyaan niyo den songkani, so detengan te kemetayun wedad temanan se otaw eg-inang te salà iling kenyan. 22 Meneng so impelowà kaw den te Timanem lekat te salà aw migpesakop kaw den diyà kandin, doen den ontong niyo, so ininang kaw din egpenimanem, aw yan begayan kaw din te kaling pedowan wedad temanan. 23 Detengan te kemetayun wedad temanan se otaw eg-inang te salà. Meneng se ibowang te Timanem, yan se kaling pedowan wedad temanan pineokit te pegpemenal tadon te Pengolo tadon si Jesu Cristo.

<- Roma 5Roma 7 ->