1 Penga niyan, inabat te Karniro se ikepito pengilala diyà te solat linolon. Penga te peg-abat din kenyan, ontò netinep se kedita kidoen te langit taman te tengà te oras. 2 Penga niyan, kinità ko se pito anghil egtelaban te Timanem, aw doen pito bodyong imbegay kandan. 3 Doen heman sebad anghil nengibing te depolan ininang te bolawan. Migpedapag sikandin diyà te sonoganan, aw doen metinadeg imbegay kandin. Sinonog din iyan kidoen te depolan amon tebangan se pegtawal-tawal te kedita te sakop te Timanem kidoen te sonoganan ininang te bolawan medapag te onsedanan te peglowan. 4 Minebel se metinadeg sinonog kidoen te depolan inewidan te anghil minasdang diyà te onsedanan, aw nekesanged se ebel diyà te intawal-tawal te menge sakop te Timanem. 5 Penga niyan, inipenò te anghil se depolan te baga inabat din lekat te sonoganan. Penga niyan, imbontog din iyan lekat te langit kidoen te tanà. Penga niyan, migkilat, aw dakel se logo-logo, aw simiblat se kilem, aw miglinog.

6 Penga niyan, neketagad se pito anghil amon meg-edop dan te pito bodyong.

7 Mig-edop se tagnà anghil te bodyong din. Penga niyan, doen nedagdag diyà te tanà, dedakel odan netikbolò aw megenaw, aw nedagdag heman se apoy doen sanged dipanog. Yan se doun te nesonog se iketelo ketengà te tanà. Nesonog heman se iketelo ketengà te kedita te kayo. Nesonog heman se kedakel te sagbet.

8 Mig-edop se ikedowa anghil te bodyong din, aw penga niyan, doen nedagdag diyà te dagat iling te ontò dakel bontod limegdeg. Yan se doun te neinang dipanog se iketelo ketengà te dagat, 9 aw nematay se iketelo ketengà te kedita te ikan, aw nebàtan heman se iketelo ketengà te menge sekeyanan kidoen te dagat.

10 Mig-edop se iketelo anghil te bodyong din, aw nedagdag se dakel bitoen lekat te langit limegdeg iling te solò. Nedagdag iyan diyà te iketelo ketengà te wayeg te baog aw selep. 11 Ngadan te bitoen sìyan Kepait. Migkepait heman se iketelo ketengà te wayeg, aw medita se otaw nematay so mininem dan te wayeg mepait.

12 Mig-edop se ikeepat sogounun te Timanem te bodyong din. Penga niyan, nebàtan se iketelo ketengà te aldaw, aw nebàtan heman se iketelo ketengà te bolan, aw nebàtan se iketelo ketengà te menge bitoen, aw yan se doun te neabat se iketelo ketengà te senang dan. Ontò migkengitngit so wedad palos simenang te iketelo ketengà te oras te kelikit te aldaw aw delem.

13 Penga niyan, kinità ko se banog limayang kidoen te tengà-tengà te langit aw tanà. Dinineg ko se kagi niyan, so timawal iyan te meketelo te dakel se kagi din, “Ontò mekelelayò se otaw eg-ogpà kidoen te tanà.”

Minikagi iyan heman, “Ontò medaet se puluk domateng kandan, so agpet den meg-edop se telo mendad anghil te bodyong.”

<- Impekità 7Impekità 9 ->