Filipos

Seini se solat day te kedita niyo menge sakop te Timanem kidoen te lonsod te Filipos. Simolat kay heman te menge egpengibing kenyo aw menge doma opisyal te simbahan.

2 Ibeg ko, begayan kaw te tabang aw kelinaw te pedowan lekat te Timanem Amay tadon, aw lekat te Pengolo tadon si Jesu Cristo.

3 Gayed a egpesiontong diyà te Timanem te kelikit ko eg-aneng-aneng kenyo. 4 Gayed neluba se pedowan ko te kelikit ko egtawal-tawal diyà te Timanem tepad te kedita niyo. 5 Neluba a so lekat te aldaw te pegpemenal niyo ki Cristo lamig songkani, gayed dakel se tabang niyo kanak te pegtoladà ko te Mèpiya Indan tepad ki Cristo. 6 Netegahan ko te migtebò se Timanem mig-inang te mèpiya kidoen te pedowan niyo, aw gayed din iyan inangen lamig melingeb iyan te aldaw te peglikò i Jesu Cristo. 7 Mèpiya se eg-eneng-enengen ko tepad te kedita niyo, so gayed dakel se pedowan ko kenyo. Tinebangan kaw te Timanem aw tinebangan a din heman, pengkey te pegkeleboso kanak, aw pegpetaga-taga ko te benal se Mèpiya Indan tepad ki Cristo. 8 Netaga-taga se Timanem te benal dakel se pedowan ko te kedita niyo, onawa te kedakel te pedowan i Jesu Cristo kenyo.

9 Egtawal-tawal a diyà te Timanem tepad kenyo, amon gayed din pedekelen se pedowan niyo, aw amon labi kaw pa megkebiyasa te kebenalan aw metòlid se aneng-aneng niyo, 10 amon metaga-taga kaw aw eden se ontò mèpiya inangen niyo. Aw metoman iyan, eked kaw peg-inang te salà, aw wedad otaw mekesila kenyo, meneng meketagad kaw te aldaw te peglikò i Cristo. 11 Ibeg ko, olò metòlid se inangen niyo pineokit te tabang i Jesu Cristo kenyo. Yan ipelangkaw aw iduyun se Timanem.

12 Menge kedowa ko, ibeg ko metaga-taga kaw te pengkey nelimahan a dini te keleboso, meneng pineokit kenyan, labi pa nedengeg se Mèpiya Indan tepad ki Cristo, 13 so netegahan den te keditaan te sondalo te gobirnador aw kedita te doma otaw te kineleboso a tandà te pegtaking ko ki Cristo. 14 Lekat te pegkeleboso kanak, labi den egsalig se keditaan te otaw egpemenal diyà te Pengolo tadon. Labi den migkagsen se ibeg dan megtoladà te kagi te Timanem, so wedad den lamit dan.

15 Pengkey doen otaw egtoladà tepad ki Cristo eg-ingà kanak aw meibeg domaeg kanak, meneng mèpiya se tod te menge doma otaw egtoladà. 16 Dakel se pedowan dan kanak, so netegahan dan te pinemallì a te Timanem meg-indan te Mèpiya Indan tepad ki Cristo. 17 Meneng sìyan menge doma otaw, egtoladà dan tepad ki Cristo amon megkelangkaw dan. Kenà mèpiya se tod dan, so ibeg dan labi pa medaet se kelimahan ko dini te keleboso.

18 Meneng aw den iyan, so pengkey medaet aw mèpiya se tod dan, meneng egkeluba a kenyan aw yan se peokit te pegtoladà tepad ki Cristo. Gayed a meluba lekat seini, 19 so netegahan ko te pengkey nelimahan a, meneng ipelowà a kwani pineokit te pegtawal-tawal niyo, aw pineokit te tabang te Espiritu i Jesu Cristo. 20 Ibeg ko, gayed ko inangen se kedita insalig te Timanem diyà kanak. Wedà a palos kelemitan te pegtoladà ko, labi den te aldaw songkani, amon gayed iduyun si Cristo pineokit kanak pengkey imetayan a aw eked a imetayi. 21 Dalem te peg-ogpà ko dini lanto te tanà, si Cristo se ontò meelagà kanak. Meneng aw matay a, labi pa mèpiya se ontong ko so megdoma a kandin. 22 Aw menamay pa se pegkematay ko, doen pa dakel mebatog ko inangen ki Cristo. Meneng wedà ko ketegahi aw eden se mèpiya pemellien ko. 23 Ontò egdowa-dowa se aneng-aneng ko tepad kenyan. Doen ibeg te pedowan ko domoton a te langit, so labi pa mèpiya aw meg-ogpà a doton doma ki Cristo. 24 Meneng amon meketabang a kenyo, keilangan meg-ogpà a pa dini te tanà. 25 So netegahan ko iyan, aneng-aneng ko eked a pa kematay, meneng meg-ogpà a pa doma niyo dini te tanà amon ketebangan ko se pegtaking niyo ki Cristo, aw amon ontò kaw meluba tandà te pegpemenal niyo kandin. 26 Yan, aw eked a pa kematay, ontò kaw heman domuyun ki Jesu Cristo so mekelikò a doton kenyo.

27 Nayan, pengkey eden se domateng kanak, keilangan onawa se inangen niyo diyà te Mèpiya Indan tepad ki Cristo intoladà kenyo. Yan pengkey domoton a kenyo, aw olò a indanan tepad kenyo, ketegahan ko te wedà kealin se pegsalig niyo diyà ki Cristo, aw sebad se pedowan niyo se egpetebangay te pegtoladà niyo te Mèpiya Indan tepad ki Cristo pinemenalan niyo. 28 Ibeg ko heman metaga-taga a te eked kaw palos kelemitan te menge otaw egpoon kenyo, pengkey eden se medaet inangen dan kenyo. Aw eked kaw kelemitan kandan, yan se pengilala te ipelumun dan kwani te Timanem, meneng ipelowà kaw din lekat te pelumun. Yan se pengilala ipekità te Timanem diyà kandan. 29 Pinemallì kaw din kenà olò amon memenal kaw ki Cristo, meneng pinemallì kaw din heman amon pemilangen kaw tandà te pegtaking niyo kandin. 30 Kinità niyo te pinemilang a kedengan, aw dinineg niyo heman te egpemilangen a pa lamig songkani. Se kelimahan eg-okitan niyo, yan se onawa te kelimahan eg-okitan ko tepad ki Cristo.

Filipos 2 ->