Filemon

4 Kedowa ko, Filemon, gayed a egpesiontong diyà te Timanem tepad kamno te kelikit te pegtawal-tawal ko, 5 so dinineg ko tepad te kedakel te pedowan no te kedita te sakop te Timanem, aw tepad te pegsalig no diyà te Pengolo tadon si Jesus. 6 Egtawal-tawal a te pineokit te pegsebad tadon te pegpemenal, kedogangan se ketaga-taga no tepad te kedita te kèpiya imbegay i Cristo kenitadon tandà te pegpesakop tadon diyà kandin. 7 Ontò neluba se pedowan ko tandà te kedakel te pedowan no te menge doma otaw. Neantag se pedowan ko, so pineokit kamno neluba se kedita te otaw migpesakop diyà te Timanem.

8 Doun niyan, doen ibeg ko kamno. So insogò a i Cristo, mepakay aw somogò a kamno meg-inang te metòlid. 9 Meneng so dakel se pedowan ko kamno, eked a sogò kamno. Pengkey siaken, si Pablo, se sebad sogounun i Jesu Cristo, aw pengkey nekeleboso a songkani tandà te pegtaking ko kandin, meneng memoyò a olò diyà kamno. 10 Doen pemoyoen ko diyà kamno tepad ki Onesimo. So nemenal den sikandin ki Cristo, iling den sikandin te ontò batà ko, so pineokit kanak nemenal sikandin dini te keleboso. 11 Kedengan wedad nael ontong no kandin, meneng songkani doen dakel ontong ta kandin.

12 Ipeolì ko den sikandin doton kamno pengkey ontò dakel se pedowan ko kandin. 13 Ibeg ko, temengan ko peden sikandin amon meketabang ka kanak pineokit kandin dalem te dini a pa te keleboso tandà te pegtoladà ko te Mèpiya Indan tepad ki Cristo. 14 Meneng eked ko sikandin temengi, so eked a keibeg aw meleges se tabang no kanak. Labi pa mèpiya aw lekat iyan te keagka te pedowan nikaw. Yan eked ko tomani se ontò ibeg ko singed aw mepakay iyan diyà kamno.

15 Lekat besi te ibeg te Timanem se pegkesayo i Onesimo lekat kamno te wedà kenamay amon todà no meabat te wedad temanan. 16 Lekat seini kenà den sikandin olò allang no, meneng labi den sikandin meelagà diyà te allang, so kedowa no den sikandin tandà te pegpemenal din ki Cristo. Ontò sikandin meelagà kanak, meneng labi pa meelagà kamno, kenà olò so allang no sikandin, meneng meelagà so kedowa no den sikandin tandà te pegpemenal din te Pengolo tadon.

17 Nayan, so siak se sigalak nikaw, liyagi sikandin iling te siak se liyagan nikaw. 18 Aw doen kemalì ininang din kamno, aw doen salà din kamno te kwarta, listahi iyan diyà te kanak ngadan. 19 Siak se simolat te kagi seini. Siaken, Pablo, se mayad kenyan. Meneng netegahan no den te dakel se ontong no kanak, so pineokit kanak neabat no se kaling pedowan wedad temanan. 20 Doun niyan, Elew, keidowi a bag so sakop ki te Pengolo tadon. Tomani se ibeg ko amon meluba se pedowan ko so telekedowa ki tandà te pegpemenal ta ki Cristo.

21 Dalem te pegsolat ko kani, netegahan ko te egkeseligan ka tomoman te pinemoyò ko kamno, aw labi pa heman dakel se inangen nikaw. 22 Doen pa pemoyoen ko kamno seini. Petegadi a te ibetanan doton kamno, so nemenal a te ipelowà a lekat dini tandà te pegtawal-tawal niyo diyà te Timanem tepad kanak amon mekedoton a kenyo.

23 Se doma ko si Epapras kineleboso heman tandà te pegtaking din ki Jesu Cristo, ibeg din metaga-taga ka te eg-aneng-aneng sikandin kamno. 24 Iling heman kenyan se inikagi te menge doma otaw egtelaban kanak dini, si Marcos, si Aristarco, si Demas, aw si Lucas.

25 Ibeg ko megtabang se Pengolo tadon si Jesu Cristo te kedita niyo.