1 Mig-indan heman si Jesus te tegdeyanan seini diyà te menge tinoledaan din, kagi din, “Doen otaw impetonggò te datò diyà te kedakel te keyemanan din. Nayan, dinineg te datò te pigbàtan te teletonggò se keyemanan din. 2 Penga niyan, tinawal te datò se otaw sìyan, aw minikagi, ‘Medaet se dinineg ko tepad kamno. Ibingi dini se kedita te libro tepad te kwarta insalig ko diyà kamno, so eked a den salig kamno.’ 3 Nayan, mig-aneng-aneng se sineligan, ‘Agpet den wedad otaw megtandan kanak. Megmeno a? So kenà botong se keseg ko amon meg-inang a te pawà, aw meyàyà a aw meinang a metipemoyò. 4 Na, netegahan ko den aw eden se inangen ko. Aw metoman iyan, pengkey ipekesayo a te amo ko, meneng medita pa se sigalak ko megsagman kanak kidoen te balay dan.’ 5 Penga niyan, tinawal din se kedita te otaw teg sebad-sebad doen salà dan diyà te amo din. Tinawal din se tagnà aw minikagi, ‘Pila lay se kedakel te salà no diyà te amo ko?’ 6 Timaba sikandin, ‘Sebad gatos lata se lana.’ Minikagi se sineligan, ‘Seini se papil tapay no pigpirmahan. Penenoo ka den aw solat ka te keliman olò lata. Kegaen ka.’ 7 Penga niyan, tinawal din se doma otaw, aw minikagi sikandin, ‘Pila lay se kedakel te salà nikaw?’ Timaba sikandin, ‘Sebad gatos sako se omay trigo.’ Minikagi se sineligan, ‘Seini se papil tapay no pigpirmahan. Solat ka den te kewelowan olò sako.’ 8 Nayan, pengkey migtostos se sineligan te salà te otaw diyà te amo din, meneng dimuyun se amo kandin, so biyasa sikandin miglalang te kèpiyaan. Pengkey biyasa se menge sakop te Timanem egpengabat te ontong, meneng labi pa biyasa egpengabat te ontong se menge otaw kenà egtaking te Timanem.”
9 Minikagi heman si Jesus, “Seini se punù ko diyà kenyo. Tebangi niyo se menge doma otaw te kwarta niyo dini te keneyonan. Yan aw meamin iyan, ipeogpà kaw te Timanem doton te langit aw matay kaw. 10 Aw keseligan se otaw pengkey deitek se isalig diyà kandin, keseligan heman sikandin aw dakel se isalig diyà kandin. Meneng aw eked keseligi se otaw aw deitek se isalig diyà kandin, eked heman sikandin keseligi te dakel. 11 Nayan, aw eked kaw keseligi dalem te pegpengibing niyo te kwarta dini te keneyonan, eked kaw heman keseligi te Timanem te ontò keyemanan doton te langit. 12 Aw eked kaw keseligi dalem te pegtonggò niyo te kedònan insalig te doma otaw diyà kenyo, eked kaw heman begayi te Timanem te ontong niyo doton te langit.
13 “Wedad sineligan meketolò te dowa amo din. Aw megpelenged sikandin diyà te sebad, eked sikandin tolò te sebad. Sebad olò se tekingan din, aw eked din segmani se sebad. Iling heman kenyan, eked pegsebad se pegpenimanem niyo aw pegpengewarta niyo.”
Menge doma toladà i Jesus
Luc. 16:14-18; Mat. 11:12-13; 5:31-32; Mar. 10:11-12
14 Nayan, pegdineg te menge Parisiyo te intoladà i Jesus, pigbàtan-bàtan dan sikandin, so egkeibegan dan se kwarta. 15 Meneng minikagi si Jesus, “Sikiyo se egpelingo-lingo te metòlid se eg-inangen niyo, meneng netaga-taga se Timanem te medaet se pedowan niyo. Pengkey megpelangkaw-langkaw kaw, meneng ontò iyan medaet diyà te Timanem.
16 “Te wedà pa pegtoladà si Juan Memonyagay, keilangan toloen se punù ingkeliwat i Moises aw menge telekeliwat te kagi te Timanem. Meneng lekat te pegtebò te pegtoladà i Juan lamig seini, gayed ipegtoladà se Mèpiya Indan tepad te peglowan te Timanem, aw medita se otaw ontò meibeg megpesakop diyà kandin. 17 Pengkey megkewedad se langit aw tanà, meneng eked palos pegkewedad se punù te Timanem te eked pa iyan ketoman.
18 “Aw somibwan se meama te esawa din, aw mengognan diyà te doma bayi, mekelakad sikandin. Aw mengognan se otaw diyà te bayi sinibwanan te esawa din, mekelakad heman sikandin.”
Otaw meyaman aw si Lazaro
19 “Doen otaw meyaman egpenaol te ontò meelagà, aw egpengaen te ontò mèpiya te kelikit te aldaw. 20 Doen heman otaw sagkep ngadan din si Lazaro. Nelegeb se lawa din te palì, aw gayed sikandin ipegpeibat kidoen te lowà te balay te otaw meyaman. 21 Ibeg din peden komaen olò te momò lekat te lemisa te otaw sìyan meyaman. Gayed heman egdilaan te menge toyang se menge palì din. 22 Nayan, nematay se otaw sagkep, aw inibing sikandin te menge anghil doton te tangkil te kemonaan din si Abraham kidoen te langit. Penga niyan, nematay heman se otaw meyaman aw inlebeng. 23 Inibing sikandin doton te ogpeanan te otaw nematay, aw ontò sikandin ineleg kidoen. Limengag sikandin aw timengteng diyà ki Abraham ontò mediyò aw kidoen si Lazaro te tangkil din. 24 Timawal sikandin, ‘Apò Abraham, keidowi a bag. Sogoi si Lazaro megbawog te intetodò din diyà te wayeg amon ipetedak diyà te dilà ko, so ontò a ineleg dini te apoy seini.’ 25 Meneng minikagi si Abraham, ‘Atò, eneng-enengi ini. Te wedà ka pa kematay, wedad palos lidò no so dakel se kedònan no mèpiya, meneng gayed doen kelimahan i Lazaro. Nayan, ontò den sikandin neluba dini, aw sikona den se ineleg kidoen. 26 Doen pa sebad mendad egpekeanggà. Doen medalem awang kidoen te tengà-tengà ta eked keokiti te otaw megpesalo peden doton kamno, aw wedad heman mekedini lekat kamno.’ 27 Minikagi se otaw meyaman, ‘Apò, aw eked no sogoi si Lazaro dini, sogoi sikandin doton te balay te menge kedowa ko. 28 Doen pa lima kedowa ko, aw ibeg ko indanan din dan te keilangan megselsel dan te salà, amon eked dan heman peibingi dini te kededàtan.’ 29 Meneng minikagi si Abraham, ‘Gayed doen punù ingkeliwat i Moises aw menge telekeliwat te kagi te Timanem egbesahen dan. Mèpiya aw menenalan dan kenyan.’ 30 Minikagi se otaw meyaman, ‘Apò, eked dan penenalan kenyan. Meneng aw doen otaw meantay lekat te nematay isogò no doton kandan, metoman dan megselsel te salà dan.’ 31 Minikagi si Abraham, ‘Aw eked dan penenalan te punù ingkeliwat i Moises aw menge telekeliwat te kagi te Timanem, eked dan heman pemenal pengkey doen meantay lekat te nematay.’ ”
<- Lucas 15Lucas 17 ->
