1 Peg-ipanaw i Jesus, kinità din se otaw bota lekat te pegtebaw din. 2 Mig-insà se menge tinoledaan i Jesus, “Sir, sinu lay se mig-inang te salà doun te bota se otaw seini lekat te pegtebaw din? Sikandin lay se mig-inang te salà, aw amay aw inay din?”

3 Timaba si Jesus, “Kenà lekat te kandin salà se pegkebota din. Kenà heman lekat te salà te amay aw inay din. Meneng bota sikandin amon pineokit kandin ipekità te metolos se Timanem. 4 Dalem te doen pa aldaw, keilangan inangen tadon se ibeg te Timanem simogò kanak, so wedad meketerbaho te delem. 5 Aw dini a pa te keneyonan, siaken se kelowahan eg-anyag diyà te pedowan te kedita te otaw te keneyonan.”

6 Penga te peg-ikagi din kenyan, neneptep sikandin diyà te tanà, aw inlotek se ngingi diyà te tanà, aw insawol din diyà te mata te otaw bota. 7 Minikagi sikandin, “Doton ka te lanaw iningedanan Siloam, aw onawi se bawa no kidoen.” (Se kelebadan te Siloam, yan se kagi “impeibing.”)

Penga niyan, dimoton se otaw bota aw migdàpog. Peg-olì din, kimità den. 8 Nepela se menge otaw simbalay din aw otaw tapay kimità kandin egpemoyò, aw minikagi dan, “Sikandin se gayed egpenenoo aw metipemoyò.”

9 Doen otaw minikagi, “Sikandin goman iyan.”

Meneng doen doma otaw minikagi, “Kenà sikandin. Tabag olò onawa se bawa dan.”

Meneng minikagi sikandin, “Siaken se bota.”

10 Mig-insà dan, “Aw sikona se bota, eden lay se neinang te kimità ka den?”

11 Timaba sikandin, “Doen otaw ngadan din si Jesus neneptep diyà te tanà aw inlotek din se ngingi din diyà te tanà, aw insawol din diyà te mata ko, aw insogò a din doton te Siloam amon megdàpog a te bawa ko. Timolò a kandin, aw yan kimità a den.”

12 Mig-insà dan, “Kenan lay den sikandin?”

Timaba se otaw, “Inday. Wedà ko ketegahi.”

13 Penga niyan, inibing dan se otaw negolì se mata din doton te menge Parisiyo. 14 Aldaw te peg-etod te menge Judiyo se aldaw te peglotek i Jesus te ngingi diyà te tanà aw migpegolì te mata te otaw bota. 15 Mig-insà heman se menge Parisiyo diyà kandin aw nemeno se pegkegolì te mata din. Mig-indan sikandin, kagi din, “Insawol din se pasak diyà te mata ko, aw migdàpog a te bawa ko, aw yan kimità a.”

16 Penga niyan, doen menge Parisiyo minikagi tepad ki Jesus, “Kenà sikandin insogò te Timanem, so eglàpang sikandin te punù tepad te aldaw te peg-etod.”

Meneng doen menge doma otaw minikagi, “Simpana sikandin se metilàpang te punù, eked sikandin pekebatog meg-inang te menge kepelahan iling kani.”

Yan migpedindilay dan. 17 Penga niyan, mig-insà dan diyà te otaw negolì se mata, “Eden lay se kamno aneng-aneng tepad kandin? So kamno mata se pinegolì din.”

Timaba sikandin, “Telekeliwat sikandin te kagi te Timanem.”

18 Wedà pemenal se menge obanen te Judiyo te tapay sikandin bota aw negolì den se mata din, aw yan impeangay dan se amay aw inay din. 19 Pegdateng dan doton, mig-insà dan kandan, “Batà niyo lay se otaw seini? Bota lay sikandin lekat te pegtebaw din? Nengà lay sikandin kimità den?”

20 Timaba se amay aw inay din, “Netegahan day te sikandin se batà day, aw netegahan day heman te bota sikandin lekat te pegtebaw din. 21 Meneng wedà day ketegahi aw nengà lay sikandin kimità den. Wedà day heman ketegahi aw sinu se migbolong kandin. Meneng mèpiya aw sikandin se insaen niyo, so dakel den sikandin. Sikandin se meketaba te menge insà niyo.”

22 Yan se inikagi te amay aw inay din, so nelemitan dan te menge obanen te Judiyo. Tapay migsebad se menge obanen te eked den dan peopi te simbahan se otaw mikagi te si Jesus se Misiyas. 23 Yan se doun te minikagi se amay aw inay din, “Dakel den sikandin. Mèpiya aw sikandin se insaan niyo.”

24 Yan todà dan impeangay se otaw negolian te mata din, aw minikagi dan, “Na, peg-indan ka den te benal, so kinità ka den te Timanem. Netegahan day den te limàpang sikandin te punù ingkeliwat i Moises.”

25 Timaba se otaw, “Wedà ko ketegahi aw benal aw kenà benal te sikandin se limàpang te punù ingkeliwat i Moises. Meneng sebad olò se netegahan ko, te bota a kedengan, meneng egpengità a den songkani.”

26 Minikagi dan, “Eden lay se ininang din kamno? Pigmeno lay se pegbolong din te mata nikaw?”

27 Timaba sikandin, “Tapay ko iyan in-indan kenyo, meneng wedà kaw penenalan. Meibeg kaw lay domineg todà kenyan amon meinang kaw tinoledaan din?”

28 Pegdineg dan kenyan, neopal dan, aw minikagi dan, “Sikona se tinoledaan din, meneng sikami se tinoledaan te telekeliwat te kagi te Timanem gebii si Moises. 29 Netegahan day te si Moises se insogò te Timanem. Meneng otaw sìyan, wedà day ketegahi aw sinu se simogò kandin.”

30 Minikagi se otaw negolian, “Ontò a den nepela kenyo. Pengkey migpegolì sikandin te mata ko pineokit te tolos din, meneng wedà niyo pa ketegahi aw sinu se simogò kandin. 31 Netegahan tadon te kenà egtebangan te Timanem se otaw eglàpang te punù. Meneng se otaw egsimba te Timanem aw egtolò te ibeg din, yan se egtebangan te Timanem. 32 Lekat te ketebò te keneyonan lamig seini, wedad palos otaw netegahan tadon nekebatog migpegolì te mata te otaw bota lekat te pegtebaw din. 33 Simpana kenà sikandin insogò te Timanem, wedad palos kepelahan mebatog din inangen.”

34 Minikagi dan, “Pegtebaw no, bota ka so doen salà nikaw. Yan eked kepakay aw sikona se megtoladà kenami.”

Penga niyan, impelowà dan sikandin lekat te simbahan.

35 Pegdineg i Jesus te impelowà dan lekat te simbahan se otaw negolian, pinengemahà din sikandin. Pegkità din kandin, mig-insà si Jesus, “Nemenal ka lay te doen Timanem Migpekeotaw?”

36 Timaba sikandin, “Sir, indani a aw sinu iyan amon memenal a kandin.”

37 Minikagi si Jesus, “Kinità no den sikandin, so se minikagi diyà kamno, siaken iyan.”

38 Minikagi se otaw, “Pengolo, nemenal a den kamno.”

Penga niyan, migsimba sikandin ki Jesus.

39 Minikagi si Jesus, “Insogò a dini te keneyonan amon ipekità ko se awop te pedowan te kedita te otaw. Se otaw iling te bota so wedà dan kità te kebenalan, yan se tebangan ko amon komità dan. Meneng se otaw eden dan aw kimità dan te kebenalan, yan se pekitaan ko te iling dan te otaw bota.”

40 Doen menge Parisiyo medapag kandin aw dimineg dan te kagi din, aw minikagi dan, “Bota kay lay heman?”

41 Timaba si Jesus, “Aw iling kaw te otaw bota so wedà kaw kità te kebenalan, mepakay aw megselsel kaw amon pegwedaden te Timanem se salà niyo. Meneng so migpelingo-lingo kaw te ontò kaw kimità te kebenalan, yan doen pa salà niyo.”

<- Juan 8Juan 10 ->