“Pegtebò te pegtaking niyo kanak, wedà a pegtoladà kenyo te kedita nini, so migdoma a pa kenyo. 5 Meneng agpet a den molì doton te Amay ko simogò kanak. Nepela a kenyo so pengkey mesayo a den, wedà kaw peg-insà tepad te pegkesayo ko. 6 Meneng nelidò beling se pedowan niyo so migtoladà a kenyo aw eden se domateng kwani diyà kenyo. 7 Meneng seini se kebenalan. Begayan kaw pa te kèpiya pineokit te pegkesayo ko, so simpana eked a kesayo, eked dateng se Teletabang diyà kenyo. Meneng aw mesayo a, somogò a kandin diyà kenyo. 8 Aw domateng sikandin, ipetaga-taga din diyà te kedita te otaw tepad te salà, aw tepad te metòlid inang, aw tepad te pelumun. 9 Ipetaga-taga din kandan te doen salà dan, so wedà dan pemenal kanak. 10 Ipetaga-taga din tepad te metòlid inang, so molì a doton te Amay ko, aw eked a niyo den kitai. 11 Ipetaga-taga din heman te metoman dan ipelumun te Timanem, so dinaeg se pengolo te medaet dini te keneyonan.

12 “Doen pa medita kebenalan ibeg ko itoladà kenyo, meneng eked kaw pa pekelabet kenyan. 13 Meneng aw domateng se Espiritu Santo amon megtoladà te kebenalan, sikandin se megpetaga-taga kenyo te kedita te kebenalan. Eked din teboki se pegtoladà din kenyo, meneng kedita te intoladà te Amay ko kandin, yan se ikeliwat din heman kenyo. Iindan din heman kenyo aw eden se metoman domateng. 14 Iduyun a din, so lekat kanak se kagi itoladà din kenyo. 15 So insalig te Amay ko se kedita diyà kanak, yan minikagi a te lekat kanak se kagi itoladà din kenyo.”

16 “Te eked kenamay, eked a niyo den kitai. Penga niyan te eked kenamay, todà a niyo kitaen.”

17 Pegdineg te menge tinoledaan din kenyan, migpeinsaay dan, “Nengà lay sikandin minikagi te eked kenamay, eked kidon den kità kandin, aw penga niyan te eked kenamay, todà kidon komità kandin? Nengà lay heman sikandin minikagi te yan se meinang so molì doton te Amay din?”

18 Migpeinsaay dan heman, “Eden lay se kedegdagan te kagi din te eked kenamay? Wedà tadon ketegahi se kedegdagan niyan.”

19 Netaga-taga si Jesus te doen insaen dan peden kandin, aw yan minikagi sikandin, “Migpeinsaay kaw den tepad te kedegdagan te inikagi ko gina, te eked kenamay, eked a niyo den kitai, aw penga niyan te eked kenamay, todà a niyo kitaen. 20 Eneng-enengi niyo se ikegiyen ko den diyà kenyo. Megkelag aw megmatay kaw tepad kanak, meneng meluba se medaet otaw dini te keneyonan. Pengkey melidò kaw, meneng todà kaw meluba. 21 Eneng-enengi niyo ini. Aw doen bayi tebawan, yan se kesekitan aw domateng se aldaw te pegtebaw. Meneng penga te pegtebaw te batà din, kelibelan din se kesakit tandà te keluba din, so doen batà din timebaw. 22 Iling kaw heman kenyan, so pengkey melidò kaw den, meneng todà kaw komità kanak. Todà heman meluba se pedowan niyo, aw wedad otaw mekeabat te keluba kidoen kenyo. 23 Aw metoman iyan, wedad keilangan te peg-insà niyo kanak aw eden se kedegdagan te inikagi ko. Eneng-enengi niyo se kagi ko seini. Aw doen pemoyoen niyo diyà te Amay ko pineokit te ngadan ko, yan se ibegay din kenyo. 24 Lamig seini, wedà kaw pa pemoyò kandin pineokit te ngadan ko. Meneng lekat seini, pemoyò kaw kandin pineokit te ngadan ko, aw metoman kaw kominawà amon ontò kaw meluba.”

25 “Migtoladà a kenyo kani pineokit te menge tegdeyanan melima kelebetan. Meneng te eked kenamay, domateng se aldaw eked ko peokiti te tegdeyanan se itoladà ko kenyo, so bengalen ko se pegtoladà ko kenyo tepad te Amay ko. 26 Aw domateng se aldaw sìyan, mepakay aw sikandin se pemoyoan niyo pineokit te ngadan ko. Yan se doun te wedà a ikagi te siak se memoyò kandin tepad kenyo, 27 so dakel se pedowan din kenyo. Dakel se pedowan te Amay ko kenyo, so dakel se pedowan niyo kanak, aw nemenal kaw te insogò a te Amay ko. 28 Insogò a din dini te keneyonan, aw mesayo a den lekat te keneyonan amon molì a doton te Amay ko.”

29 Pegdineg te menge tinoledaan din kenyan, minikagi dan, “Nebangal den se inikagi no seini so wedà no iyan peokiti te tegdeyanan. 30 Netegahan day den te netaga-taga ka te kedita, aw wedad keilangan te meg-insà kay kamno. Yan se doun te nemenal kay den te insogò ka te Timanem.”

31 Minikagi si Jesus, “Nemenal kaw den, 32 meneng doen pa aldaw agpet domateng te mebilit kaw. Dimateng den se aldaw te megsiolì se kedita niyo, so tenanan a niyo sebad ko. Meneng doen pa doma ko, so domaan a te Amay ko. 33 Minikagi a kani diyà kenyo amon doen kelinaw te pedowan niyo tandà te pegpesakop niyo diyà kanak. Pengkey pemilangen kaw te otaw dini te keneyonan, meneng pegpekagsen kaw, so dinaeg ko se kedita te medaet dini te keneyonan.”

<- Juan 15Juan 17 ->