1 Gebii te peg-inang te Timanem te tapay peokit pesalo doton kandin, doen menge punù din tepad te pegsimba te menge Judiyo, aw doen heman simbehanan dan dini lanto te tanà. 2 Peg-inang dan te simbahan, ininang dan se balay inetepan aw inebengan te penenaktun, aw dowa se tambì niyan. Iningedanan se sebad tambì “Tambì te Timanem,” aw yan se sinolan dan te solò aw lemisa egsolan te pan ipegpemegay diyà te Timanem. 3 Doen kayad diyà te lelebangan te balay sìyan, aw doen heman kayad diyà te tambì doton didalem niyan. Iningedanan se sebad tambì sìyan “Ontò Tambì te Timanem.” 4 Didalem niyan, doen lemisa ininang te bolawan egsonogan dan te metinadeg. Insawol dan heman kidoen se kaban linoplopan te bolawan. Se kaban sìyan, yan se pengilala te doen peokit ininang te Timanem pesalo doton kandin, aw yan se egsolan te tibod ininang te bolawan nepenò te pan iningedanan mana. Insawol heman doton didalem te kaban se bangkà i Aaron nemokad, aw sìyan didowa bato mebelad sinolatan te Timanem te menge punù impekeliwat din ki Moises. 5 Se saeb te kaban sìyan, yan se egwilikan te dipanog te menge ayam-ayam eg-imetayan amon pegwedaden te Timanem se menge salà te otaw. Egkelendongan iyan te pakpak te didowa ininang iling te anghil impetindeg kidoen, so yan se pengilala te kidoen se Timanem. Meneng eked a den pegpetaga-taga kenyo tepad te kedita niyan.

6 Pegpetagad dan te kedita niyan, gayed eg-awop se menge telekagon doton te tambì lenged te lowà te kelikit te aldaw, so eg-inangen dan se terbaho insalig diyà kandan. 7 Meneng sìyan sebad tambì doton didalem, olò ontò telekagon se mepakay mawop kidoen, aw mekesebad olò sikandin awop te kelikit te omay. Eked sikandin pekeawop kidoen singed aw ibingen din se dipanog te ayam-ayam ibegay din diyà te Timanem tandà te kandin salà aw tandà te menge salà neinang te kedita te doma din Judiyo. 8 Pineokit kenyan, impetaga-taga te Espiritu Santo kenitadon te kedengan dalem te doen pa punù tepad te balay sìyan, eked kepakay aw mawop se pengkey sinu otawi te Ontò Tambì amon megpedapag diyà te Timanem. 9 Iling iyan te tegdeyanan, aw doen kelebadan niyan keilangan peg-ilingan tadon seini. Pengkey pila se bowang dan aw ayam-ayam imetayan dan aw ibegay diyà te Timanem, meneng eked iyan pekeabat te salà te otaw egsimba kidoen. 10 Olò tepad te eg-inangen te otaw se menge punù sìyan, so doen punù tepad te pegkaen, aw peg-inem, aw peglinis te pengkey eden. Keilangan toloen iyan lamig olò te aldaw te peg-inang te Timanem te kaling peokit.

11 Meneng doen den kaling peokit sìyan, so dimateng den si Cristo. Ininang den sikandin Telekagon tadon. Pineokit kandin, mèpiya se tabang dimateng diyà kenitadon. Labi pa ontò mèpiya se simbahan inopan din doton te langit. Wedà iyan inangi te otaw so kenà iyan dini lanto te tanà. 12 Mekesebad olò sikandin awop te Ontò Tambì te Timanem doton te langit, so botong den se sebad peg-awop din. Kenà dipanog te kambing aw baka se inibing din doton, meneng kandin dipanog se imbegay din kidoen. Pineokit kenyan, impelowà kidon din lekat te salà te wedad temanan. 13 Aw memaed se otaw te lawa te otaw nematay, doen punù ingkeliwat i Moises te keilangan linisan sikandin. Keilangan wilikan sikandin te dipanog te kambing aw baka, aw bodbodan heman sikandin te abo te nati te baka sonogen amon melinis se lawa din. 14 Meneng labi pa dakel se egkebatog pineokit te dipanog i Cristo, so lininisan kidon den lekat te salà. Pineokit te tabang te Espiritu Santo wedad temanan din, nemegay sikandin te kandin lawa diyà te Timanem, aw inimetayan sikandin pengkey wedad palos salà din. So lininisan kidon den lekat te salà pineokit te dipanog i Cristo, yan wedad den keilangan te pegsalig tadon diyà te inang wedad ontong, meneng simalig kidon den diyà te Timanem wedad temanan din.

15 Yan si Cristo se mig-inang te kaling peokit amon mepakay kominawà se kedita tadon tinawal te Timanem te mèpiya impakang din kenitadon te wedad temanan. Mekinawà tadon se mèpiya sìyan, so pineokit te pegkematay i Cristo, impelowà kidon den lekat te salà ininang tadon dalem te pegtaking tadon te tapay peokit.

16 Nayan, aw doen otaw megpirma te papil tepad te pegteped te tanà din aw kedònan din penga te pegkematay din, eked iyan keteped diyà te menge otaw inlista diyà te papil pinirmahan din singed aw ipetaga-taga te benal nematay den sikandin. 17 Wedad kinewaen dan lamig te pegkematay din, so eked iyan ketoman singed aw matay se tig-apò kenyan. 18 Iling heman kenyan se tapay peokit ininang te Timanem, so wedad ontong te otaw kenyan singed aw doen dipanog te ayam-ayam imetayan dan. 19 Gebii, penga te pegtoladà i Moises te kedita te menge punù te Timanem diyà te menge Judiyo, inabat din se dipanog te nati te baka inimetayan din, aw sinengedan din iyan te wayeg. Penga niyan, inagem din se melalag bolbol te ayam-ayam karniro intangen din diyà te panga te kayo hisopo, aw inwilik din iyan diyà te libro sinolatan te menge punù, aw diyà heman te kedita te otaw. 20 Penga niyan, minikagi sikandin, “Se dipanog seini, yan se pengilala te doen den peokit pesalo doton te Timanem, aw migpunù sikandin te keilangan tomolò kidon kenyan.” 21 Iling heman kenyan se pegwilik din te dipanog diyà te simbahan dan sìyan aw diyà te kedita te telepagan niyan eggemiten dan te pegsimba dan doton, 22 so doen punù ingkeliwat i Moises te keilangan doen dipanog ilinis te keditaan te telepagan dan. Iling heman kenyan, eked pegwedadi te Timanem se salà te otaw singed aw doen imetayan amon doen dipanog ilinis.

23 Se simbahan te menge Judiyo aw menge telepagan niyan, yan olò se impeiling te benal simbahan doton te langit. Lininisan se simbahan dini te tanà pineokit te dipanog te ayam-ayam inwilik kenyan. Meneng kidoen te simbahan doton te langit, keilangan labi pa meelagà se dipanog ilinis kenyan. 24 Yan penga te pegkematay i Jesus, kenà simbahan ininang te menge Judiyo se inopan din, so olò iyan impeiling te benal simbahan doton te langit. Meneng dimoton sikandin te langit, aw egkagon den sikandin kenitadon doton te Timanem. 25 Se telekagon te Judiyo, yan se eg-awop te Ontò Tambì te simbahan te kelikit te omay amon mengibing te dipanog te ayam-ayam. Meneng si Cristo, mekesebad olò se pegpemegay te kandin pegkeotawun, so botong se pegkematay din. 26 Simpana kenà iyan botong, keilangan melikit se pegkematay din lekat te keteboan te keneyonan lamig songkani. Meneng kenà iling kenyan si Cristo, so mekesebad olò se peg-inang din songkani te wedà pa dateng se temanan te keneyonan, aw botong den iyan. Migpekeotaw sikandin amon mengabat te salà tadon pineokit te pegpemegay te kandin lawa te pegkematay din. 27 Keilangan mekesebad se pegkematay te kedita te otaw, aw penga niyan okomen kidon te Timanem. 28 Mekesebad heman se pegkematay i Cristo amon mengabat te salà te kedita tadon. Lomikò pa sikandin dini te tanà kenà amon todà mengabat te salà tadon, meneng lomikò amon mangay te kedita te otaw egpeliman kandin.

<- Hebreo 8Hebreo 10 ->