Hebreo 4

1 Nayan, doen pa ketomanan te pakang te Timanem te meg-ogpà kidon doma din doton te mèpiya ogpeanan impetagad din. Yan keilangan meg-ahà kidon amon aw domateng se aldaw te peg-okom, wedad peden diyà kenitadon eked peogpai doton. 2 Inindanan kidon den te mèpiya indan, onawa te in-indan diyà te menge kemonaan tadon Judiyo gebii. Meneng pengkey dimineg dan kenyan, wedad ontong dan, so wedà dan pemenal kenyan. 3 Meneng sikitadon egpemenal se ipeogpà te Timanem doton te mèpiya ogpeanan impetagad din, so minikagi se Timanem tepad te menge kemonaan tadon gebii,

“Yan neopal a aw migpunù a, ‘Eked ko dan peogpai doma ko doton te mèpiya ogpeanan impetagad ko.’ ”

Doen ogpeanan tapay impetagad din, so impetagad din iyan lekat te ketebò te keneyonan. 4 Doen insolat diyà te kagi te Timanem gebii tepad te ikepito aldaw,

“Mig-ogpà se Timanem te ikepito te aldaw, so nepenga den se kedita te ininang din.”

5 Meneng minikagi se Timanem tepad te menge kemonaan tadon wedà tolò kandin, “Eked ko dan peogpai doma ko doton te mèpiya ogpeanan impetagad ko.” 6 Pengkey dimineg dan te mèpiya indan, meneng wedà dan peogpai te Timanem doma din, so wedà dan pemenal kandin. Yan doen pa menge doma otaw ipeogpà din doma din. 7 Netegahan tadon te benal iyan, so pengkey medita se omay minokit, pineokit te insolat i David, impetaga-taga te Timanem te doen doma aldaw, pengkey seini, te ipeogpà din se menge otaw doma din. Yan se kedegdagan te kagi din tapay ko sinoblod,

“Pengkey seini aldaw, aw domineg kaw te kagi te Timanem, ikà niyo egketugul.”

8 Gebii te pegpengibing i Josue te menge kemonaan tadon, kenà ogpeanan impetagad te Timanem se dinotonan dan, so penga niyan minikagi se Timanem te doen pa doma aldaw te ipeogpà din se menge otaw doma din. 9 Yan se doun te netegahan tadon te doen pa mèpiya ogpeanan impetagad te Timanem te kedita tadon menge sakop din ogpaan tadon, iling te peg-ogpà din gebii te ikepito te aldaw. 10 Aw meg-ogpà kidon doma din, nepenga den se eg-inangen tadon, iling te peg-ogpà te Timanem penga te peg-inang din te keneyonan. 11 Yan, so doen mèpiya ogpeanan impetagad te Timanem kenitadon, keilangan megpekagsen kidon amon ipeogpà kidon din doma din doton te mèpiya ogpeanan sìyan impetagad din. Keilangan eked kidon peg-iling te menge kemonaan tadon sìyan, so wedà dan tolò aw yan wedà din dan peogpai doton.

12 Ontò metolos se kagi te Timanem aw egpekebegay te kaling pedowan. Labi pa megalang se kagi te Timanem diyà te sondang mekesipal te luluwadun aw ogat, so mekeapet se kagi te Timanem doton te temanan te pedowan aw aneng-aneng te otaw. Pineokit kenyan, ipetaga-taga aw eden se egkeeneng-enengan tadon aw egkeibegan te pedowan tadon. 13 Wedad palos mekeeles diyà te Timanem, so egkitaen din se kedita, aw sikandin se meg-okom te kenitadon eg-inangen.

Si Jesus se Telekagon tadon

14 Nayan, keilangan lobosen tadon se pegsalig tadon diyà ki Jesus pinemenalan tadon. Doen melangkaw Telekagon tadon dimoton den diatas te langit eg-ogpaan te Timanem, aw yan se Batà te Timanem si Jesus. 15 Netaga-taga se Telekagon tadon te kelomayan tadon aw ontò egkeido kenitadon, so pengkey eden kemoloi se ipegboyo i Satanas kenitadon, yan heman se tineyodan din, meneng wedà sikandin peg-inang te salà. 16 So doen Telekagon tadon, yan se doun te eked kidon sagkà te peg-apot tadon diyà te Timanem gayed egpenabang, amon keidowan kidon din, aw amon tebangan kidon din aw doen kelimahan tadon.

<- Hebreo 3 Hebreo 5 ->