1 Nayan, wedà ketemengi i Jose se pedowan din, aw yan impekesayo din se kedita te sineligan din amon eked dan kità kandin. Wedad doma otaw kidoen dalem te pegpekilala i Jose diyà te menge kedowa din. 2 Ontò migkelag si Jose igsà dinineg iyan te menge tege Ehipto doton te lowà, aw inindanan heman se menge otaw doton te balay te selotan. 3 Minikagi si Jose diyà te menge kedowa din, “Siaken si Jose. Mèpiya lay pa se pegkesawol te amay ko?”

Meneng pegdineg te menge kedowa din kenyan, wedà dan peketaba kandin tandà te peso dan. 4 Penga niyan, minikagi si Jose, “Pegpedapag kaw diyà kanak.”

Pegpedapag dan diyà kandin, minikagi heman si Jose, “Siaken se kedowa niyo si Jose imbeligyà niyo, aw inibing a dini te Ehipto. 5 Na, ikà niyo egketetana. Ikà niyo egkepuluk tepad te pegbeligyà niyo kanak, so impeonà a te Timanem dini amon eked kaw kematay. 6 Dowa den se omay te bitil, meneng lima mendad se omay wedad geniyen diyà te pawà. 7 Insogò a te Timanem dini amon megtabang a kenyo, so ibeg din eked kaw kematay te bitil amon meantay kaw aw menge bowad-bowad niyo. 8 Kenà niyo se migsawol kanak dini, meneng Timanem se migsawol kanak dini. Ininang a din melangkaw diyà te menge opisyal te selotan. Siak se egsogò te kedita te sineligan te selotan, aw siak heman se eglowan dini te kebelad te Ehipto.

9 “Kegaen kaw den olì doton te amay tadon, aw peg-indan kaw kandin, ‘Seini se inikagi te batà no si Jose. Impelowan a den te Timanem dini te kebelad te Ehipto. Keilangan meg-ayas kaw dini kanak. 10 Ipeogpà ta sikiyo dini te Gosen, amon medapag se kedita niyo diyà kanak, pengkey sikona, aw menge batà nikaw, menge apò nikaw, aw menge karniro aw menge kambing, aw menge baka, aw kedita te kedònan nikaw. 11 Aw meg-ogpà kaw dini te Gosen, ipaten ta sikiyo. Lima mendad se omay te bitil, aw eked a keibeg aw kelimahan ka, aw menge batà nikaw, aw menge ayam-ayam nikaw.’ ”

12 Minikagi heman si Jose, “Nayan, kedita niyo menge kakay ko, aw sikona heman Benjamin, kimilala kaw den te ontò a si Jose. 13 Indani niyo se amay tadon tepad te kelangkaw ko dini te Ehipto aw tepad te kedita te kinità niyo dini. Na, kegaen kaw den, aw ibingi niyo sikandin dini.”

14 Penga niyan, kimeles si Jose te adi din si Benjamin, aw migkelag. Migkelag heman si Benjamin te pegkeles din ki Jose. 15 Penga niyan, kimeles heman si Jose te tegsebad-sebad kandan, aw nengadek sikandin kandan, aw migkelag. Penga niyan, nekeikagi se menge kedowa i Jose diyà kandin.

16 Pegdineg te selotan te dimateng den se menge kedowa i Jose, neluba sikandin aw kedita te menge opisyal din. 17 Minikagi se selotan diyà ki Jose, “Sogoi se menge kedowa no meglolan te karga diyà te menge asno dan aw molì dan doton te Canaan, 18 amon engayen dan se amay niyo aw menge pamilya dan aw lomikò dan dini. Ipeogpà ko dan diyà te mèpiya tanà dini te Ehipto, aw ontò mèpiya se kànen dan dini. 19 Begayi dan heman te menge keriton lekat dini amon doen sekayan te menge esawa aw mengisù dan. Keilangan ibingen dan heman dini se amay niyo. 20 Ikegihi dan te keilangan eked dan ketetana tepad te kedònan dan tenanan doton, so begayan dan te ontò mèpiya dini te Ehipto.”

21 Yan se ininang te menge batà i Jacob. Doen menge keriton imbegay i Jose kandan iling te inikagi te selotan diyà kandin, aw doen heman kànen dan diyà te dalan imbegay din kandan. 22 Doen heman mèpiya ekasan imbegay i Jose diyà te tegsebad-sebad kandan, meneng si Benjamin se binegayan din te kwarta telo gatos plata selapì aw lima se ekasan. 23 Doen heman impeibing i Jose doton te amay din, sempolò asno linolanan te mèpiya kemolò te kedònan lekat te Ehipto, aw sempolò heman se doma asno linolanan te trigo, aw pan, aw menge doma kemolò te kànen amon doen kànen din diyà te dalan. 24 Penga niyan, minikagi si Jose diyà te menge kedowa din, “Ikà niyo egbolaw diyà te dalan.”

Yan impekesayo din dan. 25 Nesayo dan lekat te Ehipto, aw minolì dan doton te amay dan si Jacob kidoen te Canaan. 26 Minikagi dan diyà kandin, “Neantay pa si Jose, aw eglowan sikandin doton te kebelad te Ehipto.”

Ontò nepela si Jacob, so iling te eked din iyan pemenali. 27 Meneng peg-indan dan kandin tepad te kedita te inikagi i Jose, aw pegkità din te menge keriton impeibing i Jose amon sekayan din pesalo doton te Ehipto, yan neantay se pedowan din. 28 Minikagi sikandin, “Nemenal a den te neantay pa se batà ko si Jose. Wedad den doma ibeg ko. Keilangan domoton a den amon komità a kandin te eked a pa kematay.”

<- Genesis 44Genesis 46 ->