1 Nayan, minikagi se Timanem diyà ki Jacob, “Doton ka den te Betel, aw peg-ogpà ka den kidoen. Peg-inang ka te sonoganan te ayam-ayam kidoen amon megsimba ka kanak, so siak se Timanem migpekità diyà kamno kedengan te pegkadas no lekat te kedowa no si Esau.”

2 Yan minikagi si Jacob diyà te pamilya din aw diyà te menge sakop din, “Pegbàti niyo den se kedita te inotaw niyo, sìyan egsimbahen te menge doma otaw wedà ketaga-taga te Timanem. Pemedigos kaw den aw peg-ekas kaw amon ipetaga-taga niyo te Timanem olò se toloen niyo. 3 Pegpeketagad kaw den, so domoton kidon te Betel. Meg-inang a te sonoganan te ayam-ayam kidoen amon megsimba a te Timanem. Pegdateng te kelimahan diyà kanak kedengan, tinebangan a din, aw gayed a din egdomaan pengkey kenan a pesalo.”

4 Yan imbegay dan diyà ki Jacob se kedita te inotaw dan aw menge belenigan inaritis dan, aw inlebeng din iyan doton te siyong te olayan kidoen te Sikem. 5 Pegkesayo i Jacob aw pamilya din, wedad otaw mig-alaw kandan, so migpeso se kedita te otaw mig-ogpà doton te menge lonsod medapag kidoen tandà te peglamit te Timanem kandan.

6 Dimoton si Jacob te Luz (doma ngadan niyan Betel) kidoen te Canaan sipat te kedita te doma otaw timaking kandin. 7 Mig-inang sikandin te sonoganan te ayam-ayam kidoen, aw iningedanan din se tanà sìyan Timanem te Betel, so migpekità se Timanem diyà kandin kidoen kedengan te pegkadas din lekat te kedowa din. 8 Nematay kidoen si Debora tapay migtonggò ki Rebecca te pegkemengisù din, aw inlebeng se lawa din doton te olayan medapag te Betel. Yan se doun te iningedanan iyan Olayan te Pegkelag.

9 Peg-olì i Jacob lekat te Mesopotamya, todà migpekità se Timanem diyà kandin, aw migpakang sikandin te mèpiya se ibegay din diyà kandin. 10 Minikagi se Timanem, “Iningedanan ka ki Jacob, meneng lekat seini, eked ka den ingedani ki Jacob, so ingedanan ka den beling ki Israel.”

Yan iningedanan te Timanem sikandin ki Israel (kelebadan niyan, minato diyà te Timanem).

11 Minikagi heman se Timanem, “Siaken se Timanem eglowan diyà te kedita. Inangen ko medita se menge bowad-bowad nikaw. Inangen ko medita pongan se menge bowad-bowad nikaw, aw doen heman kandan meinang menge selotan. 12 Se kebelad te tanà imbegay ko diyà ki Abraham aw si Isaac, yan se ibegay ko heman diyà kamno, aw ibegay ko heman iyan diyà te menge bowad-bowad nikaw te modi aldaw.”

13 Penga niyan, nesayo se Timanem. 14 Kidoen tepad te inikegiyan te Timanem diyà kandin, impetindeg i Jacob se bato ininang din kekitaan. Penga niyan, tinoyongan din iyan te bino aw lana te olibo, so yan se pengilala te ininang din iyan simbahan te Timanem. 15 Iningedanan din se tanà sìyan Betel (kelebadan niyan, balay te Timanem).

16 Nesayo si Jacob aw pamilya din, aw dimeleg dan. Te wedà dan pa dateng doton te Efrata, dimateng se aldaw te tebawan si Raquel, aw ontò sikandin nelimahan. 17 Aw ontò sikandin ineleg, minikagi se menegemunay diyà kandin, “Ikà egkelemitan, so meama se timebaw diyà kamno.”

18 Penga niyan, nebogtò se pedowan din aw nematay sikandin. Te wedà pa sikandin kematay, iningedanan din se batà din ki Ben-oni (kelebadan niyan, batà te kelimahan). Meneng iningedanan sikandin i Jacob ki Benjamin (kelebadan niyan, batà melangkaw).

19 Pegkematay i Raquel, inlebeng dan se lawa din medapag te dalan pesalo doton te lonsod te Efrata. (Se lonsod te Efrata, yan se iningedanan Bitlihim songkani.) 20 Impetindeg i Jacob se dakel bato kidoen te lebeng din amon doen kekitaan kenyan, aw kidoen pa iyan te lebeng din lamig songkani. 21 Dimeleg si Jacob aw pamilya din, aw mig-ogpà dan doton dibaloy te kotà te Eder.

22 Dalem te peg-ogpà i Jacob kidoen te tanà sìyan, limayok si Ruben diyà te sebad esawa te amay din si Bilha, aw dimineg si Jacob tepad kenyan.

Sempolò teg dowa se batà meama i Jacob. 23 Se menge batà din meama timebaw diyà ki Lea, yan si Ruben penganay batà i Jacob, si Simeon, si Levi, si Juda, si Isacar, aw si Sabulon. 24 Se menge batà i Jacob timebaw diyà ki Raquel, yan si Jose aw si Benjamin. 25 Se menge batà din timebaw diyà te allang i Raquel si Bilha, yan si Dan aw si Neftali. 26 Se menge batà i Jacob timebaw diyà te allang i Lea si Zilfa, yan si Gad aw si Aser. Yan se menge batà meama i Jacob timebaw doton te Mesopotamya.

27 Nayan, minolì si Jacob doton te amay din si Isaac kidoen te Mamre medapag te Hebron tapay inogpaan i Abraham aw si Isaac kedengan. 28 Minapet te sebad gatos kewelowan se omay i Isaac. 29 Ontò sikandin temoay te pegkematay din. Nebogtò se pedowan din, aw neketelokon sikandin te menge kemonaan din nematay. Inlebeng te batà din si Esau aw si Jacob se lawa din.

<- Genesis 34Genesis 36 ->