1 Nayan, pegkità i Jacob ki Esau doton te mediyò sipat te epat gatos otaw timaking kandin, impetonggò din se menge batà din ki Lea aw si Raquel aw sìyan dowa allang dan. 2 Impeonà din se dowa allang aw menge batà dan, aw impetelokon din se Lea aw menge batà din, aw impemodi din si Raquel aw si Jose. 3 Penga niyan, si Jacob se minonà diyà te kedita dan, aw mekepito sikandin longken diyà te tanà te pegpedapag din diyà te kakay din.

4 Meneng kimagnan si Esau simongon ki Jacob, aw kimeles sikandin te adi din, aw nengadek kandin. Didowa dan se migkelag. 5 Penga niyan, kinità i Esau se menge bayi aw mengisù. Mig-insà sikandin, “Sinu lay se menge doma nikaw?”

Timaba si Jacob, “Akay, seini se menge batà ko imbegay te Timanem diyà kanak tandà te keido din.”

6 Penga niyan, migpedapag se didowa allang aw menge batà dan, aw limongken dan. 7 Penga niyan, migpedapag si Lea aw menge batà din, aw limongken dan. Penga niyan, migpedapag heman si Jose aw si Raquel, aw limongken dan.

8 Mig-insà si Esau, “Menonen no se medita ayam-ayam nesongonan ko gina? Eden lay se tod no kenyan?”

Timaba si Jacob, “Amon keidowan a no peden Akay.”

9 Meneng minikagi si Esau, “Botong den se kanak. Kamno den iyan.”

10 Minikagi si Jacob, “Kenà. Aw doen keido no diyà kanak, kinewai bag se ibowang ko diyà kamno. Pegliyag no kanak, iling te liniyagan a te Timanem, so mèpiya den beling se pedowan no diyà kanak. 11 Kinewai bag se bowang seini impeibing ko diyà kamno, so mèpiya se tabang te Timanem diyà kanak, aw botong se kedònan ko.”

Gayed migleges si Jacob kandin, aw yan kiminawà si Esau kenyan.

12 Minikagi si Esau, “Na, mesayo kidon den. Domengan a den kenyo.”

13 Meneng minikagi si Jacob, “Akay, netegahan no te deitek pa se menge batà ko, aw keilangan megpeloway-loway se menge karniro aw baka ko doen nati. Aw pelaban megaen se pegpengibing day kenyan te olò sebad se aldaw, matay se kedita niyan. 14 Mèpiya beling aw monà ka diyà kenami, aw megpeloway-loway kay tomelokon kamno taman te mebatog te menge ayam-ayam aw batà ko lamig mekesaeb kay kamno doton te Edumea.”

15 Minikagi si Esau, “Yan mèpiya aw doen menge otaw ipedengan ko kenyo.”

Meneng minikagi si Jacob, “Ikà eg-inang kenyan. Neluba a den so mèpiya se pedowan no diyà kanak.”

16 Penga niyan dalem te aldaw sìyan, nesayo si Esau aw minolì doton te Edumea. 17 Meneng dimeleg beling si Jacob doton te Sucot, aw mig-inang sikandin te menge layag ogpaan dan aw menge kelokob te ayam-ayam. Doun niyan, iningedanan se lonsod sìyan Sucot (kelebadan niyan, menge kelokob).

18 Peg-olì i Jacob lekat te Mesopotamya, dimeleg sikandin doton te lonsod te Sikem kidoen te Canaan te wedad nemeeleg kandin. Mig-ogpà sikandin doton te tanà medapag te lonsod sìyan. 19 Bineyadan din se tanà sìyan inogpaan din. Sebad gatos plata se kwarta dan selapì se imbayad din kenyan diyà te menge bowad-bowad i Hamor amay i Sikem. 20 Mig-inang si Jacob te sonoganan te ayam-ayam ibegay diyà te Timanem, aw iningedanan din iyan El Elohe Israel (kelebadan niyan, magsen se Timanem egseligan i Israel).

<- Genesis 32Genesis 34 ->