1 Gebii, sebad olò se kemolò te kagi eg-ikegiyen te kedita te otaw dini te keneyonan. 2 Peglegeb-legeb dan, migpesalo dan doton te eglibtakan te aldaw, lamig dimateng dan doton te tanà mebelad aw mepantal kidoen te Sinar, aw mig-ogpà dan kidoen. 3 Migpeikegihay dan, “Ayas kaw den. Loteken tadon den se pasak aw delapen tadon iyan lamig megkagsen, amon doen inangen tadon balay.”

Yan linotek dan se pasak inangen dan bato, aw inimon dan se apog ibolit kenyan amon meg-inang dan te balay. 4 Penga niyan, minikagi dan, “Meg-inang kidon den te lonsod aw sebad balay melangkaw lamig mapet se atep niyan doton te langit, aw yan meinang kidon medengeg, aw eked kidon kebilit kidoen te kebelad te keneyonan.”

5 Nayan, dimoton se Timanem amon tomengteng sikandin te lonsod aw balay melangkaw ininang te menge otaw kidoen. 6 Mig-aneng-aneng se Timanem, “Migsebad se pedowan te kedita te otaw seini, aw sebad olò se kagi dan. Migtebò dan olò mig-inang kani. Na, te eked kenamay, pengkey eden se ibeg dan, yan se mebatog dan inangen. 7 Mèpiya aw domoton kidon kandan, aw todaen tadon se kagi dan amon medita kemolò se kagi dan, aw yan eked dan peilebetay.”

8 Yan tandà te peg-inang te Timanem kenyan, migbilit-bilit se kedita dan doton te kebelad te keneyonan, aw yan limengà dan te peg-inang dan te lonsod sìyan. 9 Iningedanan se lonsod sìyan Babel (kelebadan niyan, migkebulung), so ininang te Timanem medita kemolò se kagi te otaw kidoen, aw lekat kidoen binilit-bilit te Timanem se kedita dan doton te kebelad te keneyonan.

10 Seini se ngadan te menge bowad-bowad i Sem. Dowa se omay minokit penga te pegkelinep te tanà te wayeg, minapet te sebad gatos se omay i Sem, aw timebaw se batà din meama si Arfacsad. 11 Penga niyan, lima gatos se omay minokit te wedà pa kematay si Sem. Dalem niyan, doen pa menge doma batà din timebaw.

12 Peg-apet te ketlowan teg lima se omay i Arfacsad, timebaw se batà din meama si Sela. 13 Penga niyan, epat gatos aw telo se omay minokit te wedà pa kematay si Arfacsad. Dalem niyan, doen pa menge doma batà din timebaw.

14 Peg-apet te ketlowan se omay i Sela, timebaw se batà din meama si Eber. 15 Penga niyan, epat gatos telo se omay minokit te wedà pa kematay si Sela. Dalem niyan, doen pa menge doma batà din timebaw.

16 Peg-apet te ketlowan teg epat se omay i Eber, timebaw se batà din meama si Peleg. 17 Penga niyan, epat gatos ketlowan se omay minokit te wedà pa kematay si Eber. Dalem niyan, doen pa menge doma batà din timebaw.

18 Peg-apet te ketlowan se omay i Peleg, timebaw se batà din meama si Reu. 19 Penga niyan, dowa gatos siyam se omay minokit te wedà pa kematay si Peleg. Dalem niyan, doen pa menge doma batà din timebaw.

20 Peg-apet te ketlowan teg dowa se omay i Reu, timebaw se batà din meama si Serug. 21 Penga niyan, dowa gatos aw pito se omay minokit te wedà pa kematay si Reu. Dalem niyan, doen pa menge doma batà din timebaw.

22 Peg-apet te ketlowan se omay i Serug, timebaw se batà din meama si Nahor. 23 Penga niyan, dowa gatos se omay minokit te wedà pa kematay si Serug. Dalem niyan, doen pa menge doma batà din timebaw.

24 Peg-apet te kelowan teg siyam se omay i Nahor, timebaw se batà din meama si Tera. 25 Penga niyan, sebad gatos sempolò teg siyam se omay minokit te wedà pa kematay si Nahor. Dalem niyan, doen pa menge doma batà din timebaw.

26 Peg-apet te kepitowan se omay i Tera, timebaw se menge batà din meama si Abram, si Nahor, aw si Haran.

27 Seini se ngadan te menge bowad-bowad i Tera. Si Tera se amay i Abram, si Nahor, aw si Haran. Si Haran se amay i Lot. 28 Te wedà pa kematay si Tera, nematay se batà din si Haran doton te Ur, sìyan lonsod inogpaan din doton te Caldea. 29 Nengognan si Abram ki Sarai, aw nengognan si Nahor ki Melca, batà bayi te kedowa din nematay si Haran. Doen heman doma batà i Haran si Isca. 30 Wedad batà i Sarai, so eked sikandin pegbatà.

31 Impetaking i Tera se batà din si Abram, aw ogangan din si Sarai esawa i Abram, aw apò din si Lot batà i Haran. Nesayo dan lekat te lonsod te Ur doton te Caldea, aw migpesalo dan doton te Canaan. Meneng pegdateng dan doton te Haran, mig-ogpà dan kidoen. 32 Nematay si Tera kidoen te dowa gatos aw lima se omay din.

<- Genesis 10Genesis 12 ->