1 Nayan, siak se nekeleboso tandà te pegtaking ko te Pengolo, aw yan memoyò a diyà kenyo te keilangan gayed mèpiya se kedita te eg-inangen niyo, sìyan ibeg te Timanem, so yan se tod din te pegtawal din kenyo. 2 Ikà niyo egpelangkaw-langkaw. Keilangan melayat se pedowan niyo diyà te doma otaw tandà te pegpedekelay niyo te pedowan. 3 Pegpekagsen kaw amon megpedeleg se pegsebad te pedowan niyo, so sebad se pedowan imbegay te Espiritu Santo kenyo. 4 Ininang kaw den te Timanem iling te sebad lawa, aw olò sebad se Espiritu Santo mig-ogpà diyà kenyo, so olò sebad se egpelimanan niyo lekat te pegtawal te Timanem kenyo. 5 Olò sebad se Pengolo tadon. Olò sebad se pinemenalan tadon. Olò sebad se pegbonyag kenitadon. 6 Olò sebad se Timanem Amay te kedita tadon. Eglowan sikandin diyà te kedita tadon. Pengkey kenan kidon peg-ogpà, kidoen sikandin. Eg-ogpà sikandin diyà te kedita tadon.
7 Doen kebiyasa imbegay i Cristo kenitadon, meneng kenà onawa se imbegay din diyà te kedita tadon, so pinemallì din aw eden se ibegay din diyà te teg sebad-sebad kenitadon. 8 Iling kenyan se kagi te Timanem insolat gebii, kagi din,
“Pegpeengat din doton te langit, impetaga-taga din te dinaeg din den se kedita te poon din. Doen heman imbegay din diyà te menge sakop din.”
9 Na, pineokit te kagi “pegpeengat din,” netegahan tadon te tapay sikandin timenà dini te tanà. 10 Si Cristo se timenà dini te tanà, aw sikandin heman se migpeengat doton diatas te langit amon lomowan sikandin diyà te kedita pengkey kenan. 11 Sikandin se nemegay kenitadon te menge kinemoloan te kebiyasa amon megpetebangay kidon. Doen menge sogounun i Cristo. Doen heman menge telekeliwat te kagi te Timanem. Doen heman menge otaw egtoladà te Mèpiya Indan tepad ki Cristo. Doen heman menge otaw biyasa egpengibing aw egtoladà te menge otaw egpemenal. 12 Yan se menge kebiyasa imbegay din diyà kenitadon menge sakop te Timanem amon mekebatog kidon megtabang te menge doma otaw egpemenal, aw amon megkagsen se pegpemenal te kedita tadon neinang iling te lawa i Cristo. 13 Pineokit kenyan, mekebatog kidon megsebad te pegpemenal tadon aw pegketaga-taga tadon te Batà te Timanem. Yan meinang kidon iling te otaw migketesan, so meinang se keogpà tadon iling te keogpà i Cristo. 14 Aw metoman iyan, eked kidon pekeonawa te mengisù. Eked kidon pekeonawa te dagsà eg-ibingen te balud aw gayed ipegpalid te kelamag, so eked kidon pemenal te pengkey eden se itoladà te menge otaw biyasa eg-akal pineokit te kebolalaw dan. 15 Meneng keilangan tomolò kidon te kebenalan aw megpedekelay kidon heman te pedowan, amon meg-iling kidon ki Cristo pengkey eden se inangen tadon. Sikandin se olo tadon, 16 aw iling te lawa din se kedita tadon menge sakop din. Aw megsebad se terbaho te luluwadun aw teg sebad-sebad kinemoloan diyà te lawa, meketilles se lawa. Iling heman kenyan, aw tomanen te teg sebad-sebad kenitadon se eg-inangen tadon, tomilles kidon aw megkagsen kidon pineokit te pegpedekelay tadon te pedowan.
Kinewaen se kaling pegkeotawun
17 Nayan, seini se ipunù ko kenyo lekat te Pengolo tadon. Ikà niyo den egtaking te ketanem te otaw kenà egtaking te Timanem, so wedad ontong te aneng-aneng dan. 18 Wedà dan ketaga-taga te kebenalan. Wedad kaling pedowan imbegay te Timanem kandan, so wedà dan pemenal te kebenalan, aw magsen se olo dan. 19 Wedad yàyà dan te peg-inang dan te medaet, aw ontò dan metibayi, aw egkeibeg dan eg-inang te pengkey eden kemoloi te medaet.
20 Meneng kenà iling kenyan se pig-ilingan niyo tepad ki Cristo, 21 so netegahan ko te tinoledaan kaw tepad ki Jesus aw impetaga-taga kaw tepad te kebenalan intoladà din. 22 Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo. 23 Keilangan meinang kaling se kenyo pedowan aw aneng-aneng. 24 Keilangan kinewaen niyo den se kaling pegkeotawun ininang te Timanem iling kandin, aw ipekità niyo iyan pineokit te peg-inang niyo te ontò metòlid aw mèpiya.
25 Yan ikà niyo egkebolalaw. Keilangan benal se ikegiyen niyo diyà te doma otaw, so neinang se kedita tadon kinemoloan diyà te sebad olò lawa. 26 Aw doen ikeopal niyo, ikà niyo eg-inang te medaet. Pegwedadi niyo se keopal te eked pa sallep se aldaw, 27 amon eked kaw keboyo i Satanas meg-inang te medaet. 28 Aw doen menenakaw doton kenyo, keilangan lomengà aw megterbaho amon meketabang te menge doma otaw nelimahan. 29 Ikà niyo palos eg-ikagi te medaet diyà te doma otaw. Meneng keilangan mèpiya se ikegiyen niyo diyà te doma otaw amon megkagsen dan aw ketebangan dan pineokit te kagi niyo. Aw meketepad se kagi niyo, yan ketebangan se otaw domineg kenyo. 30 Ikà niyo eg-inang te pengkey eden eked keibegi te Espiritu Santo. Binegayan kaw te Timanem te Espiritu Santo, so yan se pengilala te sinakop kaw din aw ipelowà kaw te aldaw te peglikò te Pengolo tadon. 31 Ikà niyo egpeogpà te medaet diyà te pedowan. Ikà niyo egkeopal. Ikà niyo egdindil. Ikà niyo egbaet-baet. Ikà niyo heman eg-inang te medaet diyà te doma otaw. 32 Meneng keilangan meg-inang kaw te mèpiya, aw megpeidoway kaw. Keilangan pegwedaden niyo se salà ininang te doma otaw diyà kenyo, iling te pegwedad te Timanem te salà ininang niyo tandà te pegkematay i Cristo.
