Kolosas

Ibeg day, tebangan kaw te Timanem, aw begayan kaw din heman te kelinaw te pedowan niyo.

3 Kelikit te pegtawal-tawal day tepad kenyo, gayed kay egpesiontong diyà te Timanem Amay te Pengolo tadon si Jesu Cristo. 4 Egpesiontong kay diyà kandin so inindanan kay te ontò kaw egsalig diyà ki Jesu Cristo, aw dakel ekon heman se pedowan niyo diyà te kedita te sakop te Timanem. 5 Yan se eg-inangen niyo, so kedengan te pegdineg niyo te kebenalan tepad ki Cristo, nemenal kaw te doen ontong ibegay kenyo doton te langit. Yan se Mèpiya Indan 6 intoladà den doton kenyo aw doton te kebelad te keneyonan. Medita den se doma otaw nemenal kenyan, aw eg-inang den dan te mèpiya. Mig-iling kaw heman kandan, so lekat te aldaw te pegdineg niyo te doen tabang te Timanem kenyo, olò mèpiya se eg-inangen niyo, so netegahan niyo den te benal iyan. 7 Yan se intoladà i Epapras kenyo. Sikandin heman se sineligan i Cristo, aw dakel se pedowan tadon kandin. Sikandin se egseligan day insogò day doton kenyo amon megtoladà tepad ki Cristo. 8 Inindanan kay din te egpedekelay kaw te pedowan pineokit te Espiritu Santo.

9 Yan se doun te gayed kay egtawal-tawal tepad kenyo lekat te pegdineg day tepad kenyo kedengan lamig songkani. Gayed kay egpemoyò diyà te Timanem te ontò kaw metaga-taga aw eden se ibeg din inangen niyo pineokit te kebiyasa ibegay te Espiritu Santo kenyo. 10 Yan se egpemoyoen day amon ibeg te Pengolo tadon se eg-inangen niyo, aw amon gayed sikandin meluba tepad kenyo. Aw yan se inangen niyo, mèpiya se kedita te inang niyo, aw labi kaw pa metaga-taga tepad te Timanem. 11 Ibeg day lobosen te Timanem se pegsalig niyo diyà kandin pineokit te tolos din, amon meketayod kaw te kelimahan aw meluba heman se pedowan niyo. 12 Pegpesiontong kaw diyà te Timanem Amay, so impeakop kaw din diyà te menge sakop din begayan din te mèpiya doton te langit. 13 Impelowà kidon den te Timanem lekat te peglowan i Satanas, aw inalin kidon din doton te peglowan te Batà din si Jesu Cristo ontò din nedekelan te pedowan, 14 so pineokit te pegkematay i Jesus, impelowà kidon din lekat te salà, aw pigwedad den te Timanem se kedita te salà tadon.

15 Nayan, si Jesu Cristo se migpekeotaw amon ipekità din kenitadon se kedita tepad te Timanem eked kitai. Ontò melangkaw si Cristo diyà te kedita ininang te Timanem, 16 so pineokit ki Cristo, ininang te Timanem se kedita. Pengkey doton te langit aw dini te tanà, pengkey egkitaen aw kenà egkitaen, aw pengkey eden kemoloi te doen metolos aw eglowan, ininang te Timanem se kedita niyan pineokit ki Cristo amon sikandin se iduyun tadon. 17 Te wedad pa ininang, doen den tapay si Cristo. Timayod se ininang din lamig songkani, so sikandin se minawid te kedita diyà te belad din. 18 Sikandin se olo tadon, aw iling kidon te lawa din, so sikandin se egpengibing te kedita tadon egpemenal. Sikandin se egpemegay kenitadon te kaling pedowan, aw sikandin se tagnà neantay lekat te nematay eked palos todà kematay amon mengolo sikandin diyà te kedita te otaw meantay lekat te nematay. Yan se doun te wedad pa labi melangkaw diyà kandin, 19 so lekat te ibeg te Timanem, ontò kitaen se ketanem te Timanem diyà ki Cristo. 20 Ibeg te Timanem, pegsebaden din se kedita diyà kandin, pengkey dini te tanà aw doton te langit, aw yan se ininang din pineokit te Batà din si Jesu Cristo, so lekat te pegkematay din doton te kros, mepakay aw megsebad se otaw aw Timanem.

21 Kedengan, mediyò kaw kidoen te Timanem, aw minato kaw kandin, so medaet se pedowan niyo kandin aw medaet heman se eg-inangen niyo. 22 Meneng migpekeotaw si Jesus, aw nematay heman sikandin amon ibingen kaw din doton te Timanem. Mepakay aw megpedapag kaw den kandin so wedad den salà niyo aw wedad isila kenyo. 23 Meneng keilangan gayed kaw somalig diyà ki Jesu Cristo, aw keilangan lobosen niyo se pegpemenal niyo kandin. Ikà niyo egsoway lekat te kagi te Timanem pinemenalan niyo tepad ki Cristo, so doen den egpelimanan niyo. Yan se Mèpiya Indan intoladà den diyà te menge otaw doton te kebelad te keneyonan, aw yan heman se ipegtoladà ko.

24 Pengkey kineleboso a, meneng neluba a den, so pineokit te kelimahan ko, melobos se pedowan niyo diyà ki Cristo. Pineokit te pegtayod ko te kelimahan, kelumunan ko se kelimahan ibeg i Cristo okitan ko amon ketebangan se kedita te otaw egpemenal, kedita tadon impolingun te lawa i Cristo. 25 Insogò a te Timanem amon megtoladà a te kedita niyo egpemenal, so ibeg din ipetaga-taga ko se kagi din diyà te kedita niyo. 26 Yan se kebenalan wedà din petega-tegahi diyà te menge otaw gebii lamig songkani. Meneng impetaga-taga din den iyan diyà te menge sakop din, 27 so ibeg din ipetaga-taga din diyà kenitadon te ontò mèpiya se kebenalan seini. Ipetaga-taga din iyan heman doton te menge otaw kenà Judiyo. Seini se kebenalan sìyan wedà din petega-tegahi kedengan, te isogò din si Jesu Cristo meg-ogpà kidoen te kenyo pedowan, aw yan se doun te netegahan niyo te doen kèpiyaan pelimanan niyo doton te langit. 28 Egtoladà kay te kedita te otaw tepad ki Cristo. Gayed kay egsagda te kedita te otaw aw egtoladà kay kandan te kebenalan tepad ki Cristo, so ibeg day ontò melobos se pegtaking te kedita te otaw diyà ki Cristo. 29 Yan se doun te ontò a egpekagsen te pegtoladà ko kenyan pineokit te kagsen imbegay te Timanem kanak.

Kolosas 2 ->