1 Nayan, dalem niyan, gayed egkeopal si Saulo aw egbentakan din se kedita te otaw egpemenal te Pengolo. Dimoton sikandin te ontò pengolo te simbahan te Jerusalem, 2 aw nemoyò te solat ibingen din doton te menge simbahan te Judiyo kidoen te Damasko amon mepakay din dekepen se menge otaw ketelaan din egtaking te Pengolo, pengkey meama aw bayi, aw ibingen din dan doton te Jerusalem amon kelebosowen. 3 Pegkedapag din doton te Damasko, pegketà nesogatan sikandin te anyag lekat te langit. 4 Nekelangkeb sikandin diyà te tanà aw doen dinineg din minikagi, “E Saulo, nengà lay egpemilang ka kanak?”

5 Mig-insà si Saulo, “Sir, sinu ka lay?”

Yan timaba se Pengolo, “Siaken si Jesus se egpemilangen nikaw. 6 Tindeg ka aw deleg ka doton te Damasko. Indanan ka aw eden se inangen nikaw.”

7 Netingen se menge otaw dimoma kandin tandà te peso dan, so pengkey dinineg dan se kagi, meneng wedà dan kitai se minikagi. 8 Penga niyan, timindeg si Saulo. Meneng pegkebeka te mata din, wedà pekekità. Yan inewidan dan se belad din aw inagak doton te Damasko. 9 Netelowan sikandin kidoen wedà pekekità aw wedad kinaen din aw ininem.

10 Doen sebad otaw mig-ogpà kidoen te Damasko si Ananias egpemenal ki Jesus. Migpekità se Pengolo diyà kandin aw minikagi, “E Ananias.”

Timaba si Ananias, kagi din, “Pengolo, eden lay se ibeg no ipeinang kanak?”

11 Minikagi se Pengolo, “Doton ka te dalan iningedanan Metòlid. Pemehai se balay i Judas, so yan se inogpaan te sebad otaw tege Tarso si Saulo. Migtawal-tawal sikandin diyà kanak. 12 Doen impekità ko kandin te domateng ka aw memaed ka kandin, amon todà sikandin komità.”

13 Minikagi si Ananias, “Sir, medita se otaw mig-indan kanak te ontò medaet se eg-inangen din diyà te menge otaw sinakop te Timanem doton te Jerusalem. 14 Dimini heman sikandin te Damasko nengibing te papil sinolatan te menge pengolo te simbahan te Jerusalem te mepakay sikandin mekedakep te kedita te otaw egtawal-tawal diyà kamno.”

15 Minikagi se Pengolo, “Doton ka, so sikandin se pinemallì ko amon meg-indan tepad kanak doton te menge otaw kenà Judiyo, aw menge selotan, aw sikiyo menge bowad-bowad i Israel. 16 Ipetaga-taga ko kandin te doen kelimahan domateng diyà kandin tandà te pegtaking din kanak.”

17 Penga niyan, dimoton si Ananias te balay inogpaan i Saulo. Peg-awop din, pinemàdan din si Saulo aw minikagi, “Kedowa ko, insogò a te Pengolo si Jesus, sìyan migpekità diyà kamno doton te dalan. Insogò a din dini kamno amon todà ka komità, aw amon domateng se Espiritu Santo kamno.”

18 Pegketà nedagdag se iling te onap lekat te mata i Saulo, aw yan kimità den sikandin. Penga niyan, binonyagan sikandin. 19 Pegpengaen din, migkèpiya se lawa din.

Nenamay-namay mig-ogpà si Saulo diyà te menge otaw egpemenal doton te Damasko. 20 Wedà kenamay, dimoton si Saulo te simbahan te Judiyo aw migtoladà diyà te otaw kidoen te si Jesus se Batà te Timanem. 21 Nepela se kedita te otaw nenenalan kandin, aw migpebelaw-belaway dan, “Sikandin indà se egpemilang te menge otaw egpemenal doton te Jerusalem. Dimini ekon heman amon dekepen din se menge otaw egpemenal ki Jesus, aw ibingen din dan doton te Jerusalem amon kelebosowen te menge pengolo te simbahan te Judiyo.”

22 Labi pa migkeinit se pedowan i Saulo te peg-indan din te benal si Jesus se Misiyas insogò te Timanem. Wedà pekedaeg kandin se menge Judiyo eg-ogpà doton te Damasko, so ontò mèpiya se inikagi din. 23 Pegkenamay-namay, doen menge Judiyo kenà egpemenal miglalang mengimatay kandin. 24 Pengkey aldaw aw delem, egbangan dan kandin kidoen te dalan lekat te Damasko amon imetayan dan sikandin. Meneng doen otaw mig-indan ki Saulo te ibeg dan. 25 Yan tinebangan sikandin te menge doma otaw egpemenal te Timanem. Pegketengà te delem, in-awop dan sikandin doton didalem te boliyas aw intonton dan iyan lekat te bintanà doton te lowà te melangkaw alad nekelibed te Damasko amon mekelowà.

26 Pegdateng i Saulo doton te Jerusalem, ibeg din makop diyà te menge otaw egpemenal kidoen. Meneng nelemitan dan, so eden dan aw wedà sikandin pemenal ki Jesus. 27 Meneng inibing i Bernabe si Saulo doton te menge sogounun i Cristo. Mig-indan sikandin diyà kandan tepad te pegpekità aw peg-ikagi te Pengolo diyà kandin doton te dalan. In-indan din heman kandan te wedà pegketalaw si Saulo te peg-indan din tepad ki Jesus doton te Damasko. 28 Penga niyan, timaking si Saulo diyà te menge otaw egpemenal kidoen te Jerusalem. Wedà pegketalaw te pegtoladà din so insogò te Pengolo. 29 Migtoladà si Saulo te menge Judiyo eg-ikagi te kagi te Griego aw migpebelaw-belaway dan. Meneng ibeg dan imetayan sikandin. 30 Pegketaga-taga te menge doma din kenyan, inibing dan sikandin doton te Sesarya aw impesakay dan diyà te dakel belangay pesalo doton te Tarso.

31 Penga niyan, wedad den migsamok te otaw egpemenal doton te kedita te lonsod te Judiya aw Galiliya aw Samarya. Nelobos se pedowan dan, aw timolò dan te Pengolo, aw migtabang se Espiritu Santo kandan.

32 Miglegeb si Pedro doton te medita lonsod aw doton heman te menge sakop te Timanem kidoen te Lida. 33 Doen otaw kinità din si Eneas kenà egpekeiwal te walo se omay. 34 Minikagi si Pedro kandin, “E Eneas, enaw ka, so pinegolì ka i Jesu Cristo. Loloni se inibatan nikaw.”

Pegketà minenaw si Eneas. 35 Kinità iyan te kedita te otaw doton te Lida aw doma lonsod te Saron. Nemenal dan heman diyà te Pengolo.

36 Doen sebad bayi egpemenal doton te Jopa ngadan din si Tabita, doma ngadan din si Dorcas. Mèpiya otaw sikandin, so gayed egtabang te doma otaw. 37 Doen sebad aldaw netigdaan si Dorcas, aw penga niyan nematay. Dinigos dan se lawa din, aw insawol dan doton te gibelayan. 38 Pegketaga-taga te menge otaw egpemenal te kidoen si Pedro te Lida, insogò dan se dowa otaw amon mangay kandin, so kenà mediyò se Jopa kidoen te Lida. Minikagi dan ki Pedro, “Ayas ka doton te Jopa.”

39 Yan timaking si Pedro kandan. Pegdateng din doton, inibing dan sikandin doton te gibelayan. Miglimpong se menge bayi balo diyà kandin, aw migkelag dan. Impekità dan kandin se menge saol aw dagom tinebil i Dorcas te wedà pa kematay. 40 Meneng impelowà i Pedro se kedita dan kidoen. Limongken si Pedro aw migtawal-tawal diyà te Timanem. Penga niyan, minasdang diyà te lawa te nematay aw minikagi, “E Tabita, enaw ka.”

Penga niyan, gimimata si Dorcas. Pegkità din ki Pedro, minenaw. 41 Pinemàdan i Pedro se belad din aw yan impetindeg din. Penga niyan, tinawal i Pedro se menge bayi balo sipat menge doma sakop te Timanem, aw kinità dan si Dorcas neantay lekat te nematay. 42 Nedengeg iyan doton te kebelad te Jopa, aw medita se otaw nemenal te Pengolo. 43 Nenamay si Pedro mig-ogpà doton te Jopa diyà te balay te otaw biyasa eglanit te kindal te ayam-ayam si Simon.

<- Menge Ininang 8Menge Ininang 10 ->