1 Pegpengibing dan ki Pablo pesalo doton te Italya, simakay kay te dakel belangay. Doen sebad serhinto diyà te menge sondalo iningedanan Gropo Augusto ngadan din si Julio impetonggò i Festo ki Pablo aw menge doma otaw kineleboso. 2 Timaking heman kenami si Aristarco tege Tesalonika sakop te Masidonya. Doen dakel belangay dimateng lekat te Adramito megpesalo doton te menge lonsod te Asya, aw yan se sinekayan day lekat te Sesarya. 3 Keeldawan niyan, minapit kay doton te Sidon. Neidowan i Julio si Pablo, aw yan timenà sikandin aw miglegeana diyà te menge otaw egpemenal kidoen, aw sinagman dan sikandin. 4 Pegsakay day lekat te Sidon, minokit kay doton te keselibengan te kelamag kidoen te dibaloy te polò iningedanan Sipro, so wedà kay pekesongsong. 5 Minokit kay doton te lawod te Silisya aw Pampilya. Timenà kay doton te Mira, sebad lonsod kidoen te Lisya. 6 Netelaan i Julio se sebad pangkò doen dedakel layag meneng wedad katig. Dimateng se pangkò lekat te Alejandriya megpesalo doton te Italya, aw yan se sinekayan day lekat te Mira. 7 Ontò meloway se kagnan day, aw nenamay se pegdateng day doton te Ngido, so wedà kay pekesongsong te kelamag, aw yan minatas kay doton te polò iningedanan Kreta. Minokit kay medapag te Ponta Salmon, so ontò mebandes se kelamag kidoen. 8 Minokit kay medapag te enay, meneng nelimahan kay pa, aw nenamay kay dimateng doton te Mèpiya Dedongan medapag te lonsod te Lasya. 9 Tandà te kenamay te sinekayan day, neobos den se aldaw te pegpowasa, aw ontò melima se peglowà te belangay. Yan minikagi si Pablo, 10 “Aneng-aneng ko, ontò kidon kelimahan aw domeleg kidon, so kebàtan besi se pangkò aw lolan niyan, aw megelà kidon besi heman.”

11 Meneng wedà penenalan se serhinto ki Pablo, so simalig sikandin diyà te egpengibing aw tig-apò te pangkò sìyan. 12 Aneng-aneng dan, kenà ontò mèpiya se dedongan sìyan dalem te pengodan. Yan se doun te keditaan te otaw simakay meibeg mesayo doton te Fenis, sebad lonsod te polò sìyan digsel te egselepan te aldaw, so ibeg dan meg-ogpà kidoen dalem te pengodan.

13 Pegdateng te pasbang, eden dan aw mekebatog dan domeleg doton te Fenis. Yan linakon dan se pondo, aw minokit kay medapag te kilid te enay te polò sìyan. 14 Meneng wedà kenamay, ontò migkebandes se kelamag lekat te polò, so dinetengan kay te dakel odan aw dakel balud. 15 Neibing se pangkò te kelamag, so wedà kay pekesongsong. Yan tininggetanan day se kelamag aw neibing kay. 16 Pegdateng day doton te deitek polò iningedanan Kawda, tabag melinaw kidoen. Ontò melima se peglolan day te deitek boti. 17 Pegkepenga niyan, inigot dan heman se getan te pangkò te lobid amon eked kebàti. Nelemitan dan aw idagsà se pangkò doton te abas iningedanan Sirte doton te Libya. Yan linolon dan se layag aw neketaking kay te kelamag. 18 Keeldawan niyan, ontò pa medaet se dagat. Yan in-agbel day se lolan amon eked kay keteled. 19 Pegdateng te iketelo te aldaw, in-agbel day se telepagan te pangkò sìyan. 20 Ontò nenamay wedà kay pekekità te aldaw aw bitoen. Aneng-aneng te kedita day, eked kay peketayod, so timetoo pa se odan aw kelamag ontò medaet.

21 Ontò nenamay wedad kinaen day. Meneng timindeg si Pablo aw minikagi, “Menge doma ko, mèpiya peden aw timolò kaw te inikagi ko kenyo te eked kidon kesayo lekat te Kreta, amon eked kebàti se lolan aw wedad kelimahan tadon. 22 Na, mikagi a diyà kenyo, peseligi se pedowan niyo, so wedad otaw melemes, meneng olò pangkò se kebàtan. 23 So tengà te delem, doen anghil migpekità diyà kanak insogò te Timanem egsimbahen ko aw migsakop kanak. 24 Minikagi sikandin, ‘E Pablo, ikà egkelemitan, so metoman ka komità ki Cesar aw osayan ka din doton te Roma, aw yan minikagi se Timanem te eked kematay se otaw simakay doma nikaw.’ 25 Nayan menge doma ko, peseligi se pedowan niyo. Egsalig a te Timanem te metoman se kedita te kagi din kanak. 26 Meneng idagsà kidon doton te sebad polò.”

27 Pegkepenga te dowa simana, gayed kay pa impalid doton te dagat iningedanan Adriya. Tengà te delem, dinineg te gormiti se balud, aw netegahan day te medapag den se kilid te enay. 28 Penga niyan, intonton dan se lobid amon tendaen se kedalem te dagat. Kelowan depa se kedalem niyan. Wedà kenamay, todà dan tinandà aw sempolò teg lima depa se kedalem niyan. 29 Nelemitan kay aw idagsà se pangkò doton te abas. Yan indagdag dan se epat pondo lekat te olin, aw migtawal-tawal kay te meketayod kay lamig te peglibtak te aldaw. 30 Intonton te menge gormiti se deitek boti doton te dagat, so migpelingo-lingo dan te megdagdag dan te pondo doton te dolong, amon komadas dan lekat te pangkò sinekayan day. 31 Meneng minikagi si Pablo diyà te menge sondalo aw serhinto, “Eked kidon apet doton te enay singed aw meg-ogpà dan dini kenitadon.”

32 Penga niyan, binogtò te menge sondalo se lobid in-iket te deitek boti amon idagsà. 33 Mata-mata te iselem, minikagi si Pablo te mèpiya aw komaen dan. Kagi din, “Sempolò teg epat pa se aldaw migtagad kaw, aw netegahan ko te binallos kaw, so wedad nael kinaen niyo. 34 Yan kaen kaw amon megkagsen kaw. Ikà niyo egkelemitan, so wedad otaw melemes aw kepelian.”

35 Penga niyan, inabat i Pablo se pan, aw migpesiontong diyà te Timanem, aw pigbelà-belà din se pan, aw kimaen. 36 Pegkità day kandin, migkèpiya se pedowan day, aw kimaen kay heman. 37 Dowa gatos kepitowan teg enem se kedita day simakay te pangkò sìyan. 38 Pegkebesog day, in-agbel day se samà te trigo inlolan amon lomepaw se pangkò.

39 Peglibtak te aldaw, wedà day ketegahi aw kenan se detengan day, meneng kinità day se solok doen enay. Yan migpebelaw-belaway kay aw mebatog day ipesallad se pangkò kidoen. 40 Penga niyan, binogtò day se lobid in-iket te pondo, aw yan tinenanan se kedita te pondo doton didalem te dagat. Linebad day heman se lobid in-iket te bensalan. Bineka day se layag doton te dolong, aw yan migpesalo kay doton te enay. 41 Meneng nekesogat se pangkò diyà te abas aw yan nekesallad. Nekeselà se dolong, aw yan wedà keabat, aw nebàtan den se olin te balud. 42 Mig-aneng-aneng den se menge sondalo mengimatay te menge otaw egtonggoan dan amon eked dan pekekapay aw pekelowà. 43 Meneng migsagda si Julio kandan, so ibeg din eked imetayi si Pablo. Penga niyan, insogò din se menge otaw biyasa egkapay komahang doton te dagat amon monà dan domateng doton te enay. 44 Modi pa se menge doma otaw wedad kebiyasa egkapay. Minawid dan te tabla aw menge lopod lekat te pangkò, aw yan wedad mineleg, aw nekelowà se kedita day doton te enay.

<- Menge Ininang 26Menge Ininang 28 ->