1 Pegdateng i Festo doton te probinsya te Judiya, mig-ogpà sikandin doton te Sesarya te telo se aldaw. Penga niyan, dimoton te Jerusalem. 2 Pegdateng din doton, mig-indan se menge pengolo te simbahan aw dakel otaw te ingkeopal dan ki Pablo. 3 Nemoyò dan te ipeangay i Festo si Pablo lekat te Sesarya aw ipeibing din doton te Jerusalem, so ibeg dan benganan dan si Pablo doton te dalan amon imetayan. 4 Meneng minikagi si Festo te tinonggoan pa si Pablo doton te Sesarya, aw molì heman sikandin kidoen te eked kenamay. 5 Kagi din, “Sogoi niyo se menge melangkaw otaw dini kenyo tomaking kanak pesalo doton te Sesarya. Aw doen salà din, megdimanda dan kidoen.”

6 Mig-ogpà si Festo doton te Jerusalem lampas te sebad simana. Penga niyan, minolì doton te Sesarya. Keeldawan niyan, dimoton sikandin te oseyanan, aw impeangay din si Pablo. 7 Pegdateng i Pablo doton kandin, timindeg se menge Judiyo kenà egpemenal dimateng lekat te Jerusalem. Mig-indan dan te medita se medaet ininang i Pablo, meneng wedad kebenalan impekità dan. 8 Pegtaba i Pablo, minikagi sikandin, “Wedad salà ko pengkey diyà te punù egtoloen day Judiyo, aw pengkey diyà te dakel simbahan day, aw pengkey diyà te gobirno.”

9 Meneng ibeg i Festo, meluba se menge Judiyo kandin, aw yan mig-insà sikandin ki Pablo, kagi din, “Meibeg ka lay domoton te Jerusalem amon osayan ta doton?”

10 Timaba si Pablo, kagi din, “Seini den se oseyanan te gobirno. Keilangan osayan a dini, so netegahan no den te wedad palos salà ko diyà te menge Judiyo neopal kanak. 11 Simpana benal doen salà ko, eked a kulu te ipelumun a aw imetayan a niyo. Meneng aw kenà benal se inikagi dan, eked a begayi diyà te belad dan. Yan memoyò a den te si Cesar se meg-osay kanak.”

12 Penga te pegpebelaw-belaway i Festo aw menge doma teleglawong, minikagi sikandin, “So pinemoyò no den te si Cesar se meg-osay kamno, yan ipeibing ta doton kandin.”

13 Pegkenamay-namay, dimateng se selotan te menge Judiyo si Agripas aw etebay din si Bernice. Miglegeana dan ki Festo kidoen te Sesarya. 14 Dalem te peg-ogpà dan doton, mig-indan si Festo diyà ki Agripas tepad ki Pablo. Minikagi si Festo, “Doen dini sebad otaw si Pablo kineleboso i Felis, meneng wedà din pelowai. 15 Pegdoton ko te Jerusalem, doen medita pengolo aw obanen te simbahan te Judiyo neopal ki Pablo. Nemoyò dan te ipelumun ko sikandin aw imetayan. 16 Meneng minikagi a kandan te eked kepakay diyà te gobirno kidoen te Roma aw ipelumun se sakop te Roma singed aw onà sikandin megkità te menge otaw migdimanda tepad kandin, amon meketaba te kagi dan. 17 Pegdateng day dini, wedà a peg-alà-alà, so keeldawan niyan, impeangay ko sikandin amon osayan ko. 18 Pegdimanda dan tepad kandin, eden ko aw ontò medaet se salà din ipetaga-taga dan kanak. 19 Meneng kenà, so ibeg dan olò megdindil tepad te ketanem dan aw tepad te sebad otaw nematay si Jesus, meneng minikagi si Pablo te neantay lekat te nematay. 20 So wedà ko ketegahi aw eden se osayen ko tepad kenyan, mig-insà a ki Pablo aw meibeg sikandin domoton te Jerusalem amon osayan ko kidoen. 21 Meneng nemoyò sikandin te si Cesar se meg-osay kandin. Yan impekeleboso ko pa sikandin dalem te eked pa sikandin keibing doton ki Cesar.”

22 Minikagi si Agripas, “Ibeg ko menenalan a kandin.”

Minikagi si Festo, “Kealdaw menenalan ka kandin.”

23 Keeldawan niyan, ontò sinagman si Agripas aw si Bernice te pegdoton dan te oseyanan sipat menge kapitan te sondalo aw menge dakel otaw te Sesarya. Impeangay i Festo si Pablo. 24 Penga niyan, minikagi si Festo, “Sir Agripas aw kedita niyo netipon dini, seini se otaw neopalan te menge Judiyo, pengkey dini te Sesarya aw doton heman te Jerusalem. Gayed dan egpemoyò te imetayan ko sikandin. 25 Meneng aneng-aneng ko, wedad salà din te mepakay sikandin imetayan. Meneng pegpemoyò din te si Cesar se meg-osay kandin, miglalang a te ipeibing ko sikandin doton ki Cesar. 26 Meneng wedà ko ketegahi aw eden se isolat ko diyà te melangkaw pengolo tadon si Cesar tepad te otaw seini. Yan impeangay ko sikandin amon menenalan ka Agripas aw kedita niyo. Penga niyan, indani a aw eden se isolat ko, 27 so aneng-aneng ko, eked kepakay se pegpeibing ko kandin doton ki Cesar singed aw doen salà din iindan ko.”

<- Menge Ininang 24Menge Ininang 26 ->