1 Pegdateng i Pablo aw si Bernabe doton te Ikonyo, dimoton dan te simbahan te Judiyo. Pegtoladà dan kidoen, nemenal se medita otaw Judiyo aw menge doma otaw kenà Judiyo. 2 Meneng doen menge Judiyo wedà pemenal migdeliseg te menge doma otaw kenà Judiyo amon meopal dan heman diyà te menge otaw nemenal. 3 Nenamay mig-ogpà si Pablo aw si Bernabe kidoen. Wedà dan pegketalaw te pegtoladà tepad te keido te Pengolo, aw migtabang heman se Pengolo kandan, aw mig-inang dan heman te kepelahan amon metaga-taga se menge otaw te benal se intoladà dan. 4 Meneng wedà pegsebad se pedowan te otaw eg-ogpà kidoen, so doen migpedigsel te menge Judiyo kenà egpemenal, aw doen heman migpedigsel te menge sogounun i Cristo. 5 Miglalang heman se menge Judiyo kenà egpemenal aw menge doma otaw kenà Judiyo aw otaw limowan kandan. Ibeg dan peelegen aw bontogan dan te bato si Pablo aw si Bernabe amon matay. 6-7 Pegketaga-taga te sogounun i Cristo kenyan, kimadas dan doton te Listra aw Derbe, didowa lonsod doton te Likaonya. Migtoladà dan te Mèpiya Indan kidoen aw doton heman te kedepagan niyan.

8 Doton te Listra, doen sebad otaw kapig wedà palos pekeipanaw lekat te pegtebaw din. 9 Nenenalan sikandin te intoladà i Pablo. Penga niyan, netegahan i Pablo te nemenal se otaw kapig te mekebatog se Timanem megpegolì kandin. Yan nenginoet si Pablo kandin 10 aw timawal te dakel se kagi din, “Tindeg ka.”

Pegketà neketindeg aw nekeipanaw. 11 Pegkità te menge doma otaw te ininang i Pablo, minikagi se tege Likaonya te kandan kagi wedà kelebeti i Pablo, aw migpetewalay dan, “Sikandan se timanem tadon migpekeotaw timenà dini kenitadon.”

12 Eden dan aw si Bernabe se timanem dan si Jupiter aw si Pablo ekon se sogounun din si Mercurio, so sikandin se migtoladà. 13 Doen dakel simbahan dan doton te lowà te Listra egtewal-tewalan dan ki Jupiter. Doen menge baka pineningaan dan te bolak inibing te pengolo te simbahan doton kandan amon idogsò dan ki Bernabe aw si Pablo. 14 Meneng pegketaga-taga dan te ibeg te menge otaw kidoen, linisì dan se saol tandà te lidò te pedowan dan. Ayas dan dimoton te otaw netipon aw timawal dan, kagi dan, 15 “Ikà niyo egdogsò kenami. Kenà kay timanem, meneng otaw kay heman iling kenyo. Dimini kay amon megtoladà kay kenyo te kagi te Timanem, amon lomengà kaw te pegsalig diyà te kenà benal timanem aw somalig kaw diyà te Timanem wedad temanan din, so sikandin se mig-inang te langit, aw tanà, aw dagat, aw kedita heman niyan. 16 Kedengan, pinebeyaan te Timanem se eg-inangen niyo kenà Judiyo. 17 Meneng gayed din impetaga-taga te doen Timanem, so egpemegay sikandin te odan, aw eg-entayen din se menge tinanem te kelikit te omay, amon megkedoen kànen niyo aw keluba te pedowan niyo.”

18 Pengkey pa te kagi dan sìyan, meneng ontò dan pa nelimahan te pegsagda dan te otaw megdogsò kandan.

19 Penga niyan, dimateng se menge Judiyo kenà egpemenal lekat te Ikonyo aw Antyokya sakop te Pisidya. Migdeliseg dan te tege Listra, aw yan binontogan dan si Pablo te bato, aw ginoyod dan doton te lowà te lonsod so eden dan aw nematay den. 20 Meneng pegketipon te otaw egpemenal doton kandin, minenaw si Pablo aw minolì doton te Listra. Keeldawan niyan, nesayo si Pablo aw si Bernabe pesalo doton te Derbe.

21 Migtoladà si Pablo aw si Bernabe te Mèpiya Indan kidoen te Derbe, aw medita se otaw nemenal ki Jesus. Penga niyan, limikò dan doton te Listra, aw Ikonyo, aw Antyokya kidoen te Pisidya. 22 Migtoladà dan te menge otaw egpemenal, aw mig-antag dan te pedowan te menge otaw kidoen amon melobos se pegsalig dan te Timanem. Minikagi dan, “Onà kidon tomayod te kelimahan, aw penga niyan lomowan se Timanem diyà kenitadon.”

23 Doen heman otaw pinemallì i Pablo aw si Bernabe doton te teg sebad-sebad lonsod, amon isawol dan egpengibing te simbahan. Doen aldaw migpowasa dan, aw nemoyò dan te tebangan dan te Pengolo egseligan dan.

24 Penga niyan, minokit dan doton te menge lonsod te Pisidya taman te menge lonsod te Pampilya. 25 Migtoladà dan doton te Perga, aw penga niyan dimeleg dan doton te Atalya. 26 Simakay dan te dakel belangay lekat te Atalya aw minolì dan doton te Antyokya, so yan se linekatan dan. Kedengan te peglekat dan doton te Antyokya, migtawal-tawal se otaw diyà te Timanem amon tebangan din se inang dan, sìyan neinang den dan. 27 Pegdateng dan doton te Antyokya, pigtipon dan se kedita te otaw egpemenal amon meg-indan dan te kedita te ininang te Timanem pineokit kandan, so tinebangan dan te Timanem te peg-indan dan te menge otaw kenà Judiyo, aw yan nemenal dan heman te kagi te Timanem. 28 Penga niyan, nenamay dan mig-ogpà kidoen te otaw egpemenal doton te Antyokya.

<- Menge Ininang 13Menge Ininang 15 ->