1 Nayan, nedengeg se pegpemenal te menge otaw kenà Judiyo te kagi te Timanem. Netegahan iyan te menge sogounun i Cristo aw doma otaw egpemenal doton te Judiya. 2 Peglikò i Pedro doton te Jerusalem, simila se menge Judiyo egtoladà te keilangan tomolò se kedita te otaw nemenal ki Cristo te menge punù ingkeliwat i Moises, kagi dan, 3 “Medaet se ininang no, so mig-ogpà ka ekon doton te otaw kenà Judiyo, aw migdoma ka kandan kimaen.”

4 Penga niyan, migtebò si Pedro mig-indan diyà kandan te kedita te neinang. 5 Minikagi sikandin, “Pegtawal-tawal ko doton te Jopa, doen impekità te Timanem diyà kanak. Doen migpedanà diyà kanak iling te dakel bekas intonton lekat te langit aw inewidan diyà te epat dogong. 6 Penga niyan, timengteng a aw kinità ko se awop niyan ontò medita kemolò te ayam-ayam aw menenanap aw manok. 7 Penga niyan, doen minikagi diyà kanak lekat te langit, ‘E Pedro, pengiyaw ka amon doen iotan nikaw.’ 8 Meneng timaba a, ‘Pengolo, eked a kaen kenyan, so eked a làpang te punù ingkeliwat i Moises, sìyan gayed ko egtoloen.’ 9 Meneng todà heman minikagi diyà kanak, ‘Ikà eg-ikagi te eked kepakay aw kànen, so minikagi se Timanem te mepakay iyan kànen.’ 10 Meketelo heman iyan keinang diyà kanak iling kenyan, aw penga niyan neengat se bekas doton te langit. Meneng wedad kinaen ko. 11 Penga niyan te wedà kenamay, dimateng se telo otaw doton te balay inogpaan ko aw kenà dan Judiyo. 12 Insogò dan lekat te Sesarya amon engayen a dan. Minikagi se Espiritu Santo diyà kanak te eked a kulu se tomaking kandan. Enem se otaw egpemenal timaking kanak lekat te Jopa. Pegdateng day doton te balay i Cornelio, minawop se kedita day. 13 Mig-indan sikandin kenami tepad te pegkità din te anghil doton te balay din. Minikagi se anghil, ‘Sogò ka te otaw domoton te Jopa amon mangay ki Simon, se doma ngadan din si Pedro. 14 Megtoladà sikandin kamno aw kedita te otaw eg-ogpà diyà te balay nikaw. Yan mekelowà kaw lekat te salà niyo.’ 15 Pegtoladà ko kandan, dimateng se Espiritu Santo diyà kandan onawa te pegdateng din diyà kenitadon kedengan. 16 Yan neeneng-enengan ko se kagi te Pengolo,

19 Pegkematay i Esteban, pinemilang se menge otaw egpemenal. Pegkadas dan, migbilit-bilit dan doton te Fenisya, aw Sipro, aw Antyokya kidoen te Sirya. Mig-indan dan te kagi te Timanem diyà te doma dan menge Judiyo mig-ogpà kidoen. 20 Meneng doen menge otaw egpemenal tege Sipro aw tege Sirene dimoton te Antyokya, aw migtoladà dan heman tepad ki Jesus diyà te menge otaw kenà Judiyo. 21 Migtabang se Pengolo kandan, aw medita se otaw nemenal aw timolò te Pengolo. 22 Pegketaga-taga te menge otaw egpemenal doton te Jerusalem, insogò dan si Bernabe doton te Antyokya. 23-24 Mèpiya otaw si Bernabe aw simalig diyà te Pengolo aw egbeyà-beyaan heman te Espiritu Santo. Pegdateng din doton te Antyokya, neluba sikandin so kinità din te ontò dan tinebangan te Timanem. Migtoladà sikandin kandan te eked pegdowa-dowa se aneng-aneng dan, aw lobosen dan se pedowan diyà te Pengolo. Pegdineg dan te kagi din, medita se otaw nemenal diyà te Pengolo.

25 Penga niyan, dimoton si Bernabe te Tarso amon mengemahà ki Saulo. 26 Pegkità din kandin, inibing din doton te Antyokya. Mig-ogpà dan kidoen te sebad se omay. Migtoladà dan te menge otaw egpemenal. Se menge otaw egpemenal doton te Antyokya, yan se monà iningedanan Sakop i Cristo.

27 Dalem te kidoen dan pa te Antyokya, doen menge telekeliwat te kagi te Timanem dimateng lekat te Jerusalem. 28 Si Agabo se sebad kandan. Impeikagi sikandin te Espiritu Santo te agpet den domateng se bitil diyà te kedita te ogpeanan. Netoman iyan dalem te peglowan i Claudio doton te Roma. 29 Yan migsebad se pedowan te kedita te tege Antyokya egpemenal te megtabang dan te menge otaw egpemenal doton te Judiya. Imbowang te teg sebad-sebad otaw se nebatog dan imbegay. 30 Pegkeimon dan te bowang, insogò dan si Bernabe aw si Saulo mengibing kenyan doton te menge egpengibing te simbahan kidoen te Judiya.

<- Menge Ininang 10Menge Ininang 12 ->