1 Se solat seini lekat kanak ininang egpengibing te simbahan. Simolat a kamno Gayo, sigalak ko ontò ko egkedekelan te pedowan.
2 Sigalak ko, egtawal-tawal a diyà te Timanem te mèpiya se keogpà nikaw aw mèpiya se lawa nikaw, so netegahan ko te mèpiya pa se pegpemenal nikaw. 3 Ontò a neluba, so pegdini te menge kedowa ta, gayed a dan eg-indanan te nelobos se pedowan no diyà te Timanem, so ontò ka ekon egtaking te kebenalan. 4 Ontò a egkeluba aw egdinegen ko te egtaking te kebenalan se menge batà ko te pegpemenal.
Induyun i Juan si Gayo
5 Kedowa egkedekelan ko te pedowan, ontò ka egkeseligan, so egsegmanen no se menge kedowa ta te pegpemenal eg-apit doton kamno, pengkey otaw lekat te doma ogpeanan. 6 Mig-indan dan diyà te menge otaw egpemenal dini, te dakel se pedowan no kandan. Mèpiya aw gayed ka megtabang kandan amon domeleg dan megtoladà doton te doma ogpeanan, so yan se ibeg te Timanem inangen tadon. 7 Se menge otaw eglegeb amon megtoladà te doma otaw tepad ki Jesu Cristo, kenà dan egbegayan te tabang lekat te otaw kenà egpemenal. 8 Yan keilangan sikitadon egpemenal se menogpò te otaw egtoladà amon meketabang kidon te pegtoladà dan te kebenalan.
Si Diotrefes aw si Demetrio
9 Doen insolat ko diyà te menge otaw egpemenal kidoen kamno. Meneng wedà penenalan si Diotrefes te kagi ko, so ibeg din megpelangkaw-langkaw peden diyà te menge doma. 10 Aw domateng a doton kenyo, ipetaga-taga ko se medaet inang din, so medaet se eg-ikegiyen din tepad kanak. Pengkey medaet iyan, doen labi pa medaet eg-inangen din, so aw domateng se menge menenoladà kidoen, kenà sikandin egsagman kandan. Aw meibeg se doma otaw megsagman kandan, egsegdahen din dan, aw ipelowà din dan peden heman lekat te kedita dan egpemenal.
11 Kedowa egkedekelan ko te pedowan, ikà eg-iling te otaw eg-inang te medaet, meneng peg-iling ka te otaw eg-inang te mèpiya. Se otaw eg-inang te mèpiya, yan se otaw migpesakop diyà te Timanem. Meneng se otaw eg-inang te medaet, yan se wedà ketaga-taga te Timanem.
12 Ipegduyun si Demetrio te kedita te otaw, so egtaking sikandin te Timanem aw impekità din iyan pineokit te mèpiya inang din. Ipegduyun ko heman sikandin, aw netegahan no heman te benal se kagi ko.
Temanan te solat
13 Doen pa medita kagi isolat ko peden kamno, meneng eked a den keibeg aw isolat diyà kamno, 14 so doen ibeg ko meglegeana a kidoen kamno te eked kenamay amon megpebelaw-belaway ki.
15 Ibeg ko, doen kelinaw te pedowan nikaw. Eg-ikagi se menge sigalak ta dini te eg-aneng-aneng dan kamno. Indani heman se teg sebad-sebad sigalak ta kidoen kamno te eg-aneng-aneng kay kandan.
