1 Kenà ko ipegduyun se kanak pegkeotawun. Kenà a iling te menge doma otaw egtoladà, so eked niyo dan segmani singed aw doen solat ipekità dan. Kenà a heman iling te doma otaw egtoladà, so eked dan heman segmani te menge doma otaw singed aw doen solat lekat kenyo. 2 Sikiyo se iling te solat megpekilala kanak doton te kedita te doma otaw, so nemenal kaw den ki Cristo lekat te pegtoladà ko. 3 Si Cristo se migtodà te kenyo pedowan lekat te pegtoladà ko, aw pineokit te tabang te Espiritu Santo wedad temanan din. Ketegahan iyan kenà pineokit te insolat, meneng pineokit te ininang te Espiritu Santo. Insolat iyan kenà kidoen te bato, meneng kidoen te pedowan niyo.

4 Insolat ko seini so egsalig a te Timanem pineokit ki Cristo. 5 Kenà lekat te kanak aneng-aneng aw kebiyasa se nekebatog te ininang ko doton kenyo, meneng lekat te Timanem se kebiyasa, 6 so sikandin se nemegay te kebiyasa kanak aw migsogò kanak megtoladà te doen kaling peokit ininang din. Kenà punù insolat se ipegkeliwat ko, meneng ipegkeliwat ko se intoladà te Espiritu Santo kanak. Se tapay punù insolat, yan olò se egpetaga-taga te menge otaw te medaet se pedowan dan. Meneng se Espiritu Santo, yan se egpemegay te kaling pedowan.

7 Insolat te Timanem diyà te bato se punù din ingkeliwat i Moises. Pegsolat din te punù sìyan, impeketin din ki Moises se keanyag din, aw penga niyan kinità te menge bowad-bowad i Israel se keanyag te Timanem diyà te bawa i Moises. Ontò minanyag se bawa din igsà wedà ontò peketengteng se menge otaw diyà kandin, so nelemitan dan pengkey gayed migpeloway se keanyag migkewedad. Se punù ingkeliwat i Moises, yan se egpetaga-taga te menge otaw te pelumun aw kemetayun wedad temanan. Pengkey mèpiya se impekità te Timanem te pegbegay din te punù ki Moises, 8 meneng labi pa mèpiya se ipekità te Timanem diyà te menge otaw begayan din te Espiritu Santo. 9 Pengkey mèpiya se pegpetaga-taga te Timanem te ipelumun din se otaw lomàpang te punù ingkeliwat i Moises, meneng labi pa mèpiya se pegpetaga-taga din te eneng-enengen din te metòlid se otaw memenal. 10 Pengkey mèpiya se tagnà peokit, meneng iling den te nelibelan se kèpiya niyan, so labi pa ontò mèpiya se kaling peokit. 11 Pengkey mèpiya se tagnà peokit doen temanan, meneng labi pa mèpiya se kaling peokit wedad temanan.

12-13 So netegahan ko te doen ketomanan te egpelimanan ko, yan se doun te egbengalen ko se pegtoladà ko. Kenà a iling ki Moises so wedad ipeg-eles ko. Penga te pegtoladà din, sinempengan din se bawa din amon eked kitai te menge doma din bowad-bowad i Israel se pegkewedad te keanyag diyà te bawa din. 14 Meneng wedà keleseb se aneng-aneng te menge Judiyo, so magsen se olo dan. Lamig songkani aw besahen dan se libro sinolatan tepad te tapay peokit ininang te Timanem, nebelebagan se aneng-aneng dan so eked dan pa pekelabet. Eked keabat se nekebelabag te aneng-aneng dan singed aw memenal dan ki Jesu Cristo. 15 Lamig songkani aw megbasa se menge Judiyo te punù ingkeliwat i Moises, iling te nebelebagan se aneng-aneng dan. 16 Meneng aw memenal dan te Pengolo, yan meabat se belabag amon mekelabet dan te kagi te Timanem sìyan. 17 Na, se Pengolo sìyan, yan se Espiritu Santo. Aw kidoen kandan se Espiritu Santo, eked den dan keallang te salà aw pegtolò te punù ingkeliwat i Moises. 18 Wedad den belabag diyà te kedita tadon nemenal ki Cristo. Aw gayed tadon keleseban se kelangkaw te Pengolo, gayed heman elinen te Timanem se pegkesawol tadon, amon kitaen te doma otaw se kelangkaw te Pengolo diyà kenitadon. Yan se eg-inangen te Pengolo, sìyan Espiritu Santo, amon labi kidon pa megkelangkaw iling kandin.

<- 2 Korinto 22 Korinto 4 ->