1 Na, aw metoman a lomikò kidoen kenyo, yan se iketelo te peglegeb ko kidoen kenyo. Ipelumun ko se otaw eg-inang te salà, meneng toloen ko pa se punù te Timanem te eked pelumuni se otaw singed aw doen dowa otaw aw kenà telo meg-indan te benal doen salà din. 2 Kedengan te ikedowa ko peglegeb doton kenyo, minikagi a te ipelumun ko se menge otaw mig-inang te medaet. Yan se inikagi ko diyà te menge otaw mig-inang te medaet aw menge otaw wedà peg-inang te medaet. Todà ko den heman sikiyo ikegihan te iyogan ko pineokit te pegsolat ko seini, aw domateng a kidoen, ontò ko sikiyo ipelumun, 3 so ipetaga-taga ko kenyo te benal si Cristo se migsogò kanak te pegpelumun ko kenyo. Kenà sikandin melomay iling te otaw, meneng doen tolos din te megpelumun kenyo. 4 Wedà kulu si Cristo inlansang diyà te kros, meneng neantay sikandin lekat te nematay so doen tolos te Timanem kidoen kandin. Iling a kenyan, so pengkey melomay se lawa ko, meneng kitaen niyo kwani te binegayan a te Timanem te eneg amon megpelumun kenyo.

5 Ontò niyo eneng-enengi. Sikiyo se keilangan meg-ahà te kenyo pegkeotawun aw lulub kaw ki Cristo. Mèpiya aw lobosen niyo se pegpemenal ki Cristo. Eneng-enengi niyo ini te kenà metòlid se otaw diyà te Timanem singed aw eg-ogpà si Jesu Cristo diyà kandin. 6 Pengkey eden se aneng-aneng niyo, meneng ibeg ko ketegahan niyo te metòlid a diyà te Timanem, aw insogò a i Cristo. 7 Megtawal-tawal a diyà te Timanem tepad kenyo amon metòlid se inangen niyo. Kenà ibeg ko ipekità kenyo te metòlid se eg-inangen ko, meneng ibeg ko inangen niyo se metòlid, pengkey wedad otaw metaga-taga te insogò a i Cristo megpelumun kenyo. 8 Eked kepakay aw inangen ko se kenà tepad te impunù te Timanem. Se tod ko, ketegahan te kedita te otaw se kebenalan tepad ki Cristo. 9 Yan pengkey wedad otaw ipelumun ko doton so migselsel den dan, meneng meluba a aw magsen kaw meg-inang te metòlid. Gayed ko ipegtawal-tawal diyà te Timanem te ontò melobos se pegpemenal niyo. 10 Insolat ko tapay ini kenyo te wedà a pa pesalo kidoen, amon wedad segdahen ko aw domateng a doton, so tapay kaw timolò. Benal insogò a te Pengolo kenà amon kebàtan kaw, meneng amon ketebangan kaw.

11 Na, menge kedowa ko, keluba kaw den. Imendayi niyo se peg-ogpà niyo. Toloi niyo se impunù ko kenyo. Pegsebad kaw te pegpemenal aw pedowan niyo. Domaan kaw te Timanem eglekatan te kedakel aw kelinaw te pedowan.

12 Pegpeliyagay kaw se kedita niyo egpemenal, so yan se pengilala te egpedekelay kidon te pedowan. 13 Eg-ikagi se kedita day menge sakop te Timanem eg-ogpà dini te eg-aneng-aneng kay kenyo.

14 Ibeg ko tebangan se kedita niyo te Pengolo tadon si Jesu Cristo, aw kedekelan kaw te Timanem te pedowan, aw megsebad kaw tandà te Espiritu Santo eg-ogpà diyà kenyo.

<- 2 Korinto 12