Kenà si Pablo iling te otaw kenà benal sogounun i Cristo
1 Nayan, ibeg ko keleyatan a niyo te pedowan pengkey tabag a iling te otaw wedad inenengen, so domuyun a den te kanak pegkeotawun te eked kenamay. Keleyati a niyo bag te pedowan. 2 Netetana a kenyo iling te ketetana te Timanem kenyo, so ibeg ko, melobos se pedowan niyo ki Cristo, iling te pegkelobos te pedowan te laga diyà te sebad meama mengognan kandin. 3 Meneng nelemitan a aw metodà se ibeg niyo tomaking ki Cristo. Iling kenyan se peg-akal i Satanas ki Eva gebii pineokit te peg-akal te memokan kandin. 4 Netetana a aw menenalan kaw te menge otaw domoton kenyo megtoladà te doen doma egpelowà kenà si Jesus, sìyan intoladà ko den kenyo. Egtoladà dan te doen sebad kemolò Espiritu Santo aw Mèpiya Indan kenà iling te pinemenalan niyo kedengan. Nepela a, so neibeg kaw te migtoladà dan kenyan.
5 Na, tepad te sìyan menge otaw doton kenyo eg-ikagi te sikandan se ontò benal sogounun i Cristo, eden niyo aw sikandan se labi pa melangkaw diyà kanak. 6 Pengkey wedad nael kebiyasa ko megtoladà iling te doma otaw, meneng ontò a biyasa te kebenalan. Netegahan niyo den te ontò benal se intoladà ko kenyo.
7 Pegtoladà ko kenyo te Mèpiya Indan lekat te Timanem, wedà ko sikiyo pebeyadi, so migtabang a kenyo te wedad togpò amon doen ontong niyo te toladà ko. Meneng yan besi se salà ko kenyo. 8 Pegtoladà ko kenyo kedengan, tinogpoan a te menge otaw egpemenal ki Cristo doton te menge doma ogpeanan. Kolang besi se pegpengabat ko te kwarta kandan, so sikiyo se tinebangan ko. 9 Peg-ogpà ko kidoen kenyo, pengkey doen puluk ko, meneng wedà a pemoyò diyà kenyo, so se menge kedowa tadon nemenal doton te Masidonya, yan se nengibing te intogpò kanak. Wedà a palos pemoyò diyà kenyo, aw ibeg ko eked a palos pemoyò te tabang diyà kenyo. 10 Keseligan se kagi i Cristo, aw keseligan heman se kagi ko seini. Pengkey kenan a pesalo, doton kenyo aw doton te kedita te doma lonsod te Gresya, tomanen ko se pakang seini te wedad otaw pemoyoan ko te tabang. 11 Meneng pengkey eked a pemoyò te togpò lekat kenyo, ikà niyo eg-aneng-aneng te wedà ko sikiyo kedekeli te pedowan. Netegahan iyan te Timanem te ontò dakel se pedowan ko kenyo.
12 Yan eked a pemoyò te tabang lekat kenyo, so eked a peg-iling te menge menenoladà doton kenyo eg-ikagi te egpetandan a iling kandan. 13 Se menge otaw sìyan, kenà dan benal sogounun i Cristo. Mig-akal dan kenyo pineokit te pegtoladà dan aw pegpelingo-lingo te sikandan se insogò i Cristo. 14 Meneng eked tadon kepelahi se eg-inangen dan, so iling dan ki Satanas egpelingo-lingo te sikandin se sebad anghil insogò te Timanem. 15 Yan eked tadon kepelahi aw megpelingo-lingo heman se menge sakop i Satanas te sikandan se insogò te Timanem megtoladà te metòlid. Meneng te modi aldaw, ipelumun dan, so medaet se eg-inangen dan.
Menge kelimahan neokitan i Pablo
16 Todà ko ini ikegiyen diyà kenyo. Ikà niyo eg-aneng-aneng te iling a te otaw wedad inenengen gayed egduyun te kandin pegkeotawun. Meneng pengkey yan se aneng-aneng niyo, keleyati a niyo te pedowan te peg-ikagi ko kani, pengkey iling te wedad inenengen ko. 17 Se ikegiyen ko seini tepad kanak, kenà iyan insogò te Pengolo, meneng iling a den te menge otaw wedad inenengen gayed egduyun te pegkeotawun dan. 18 So medita se otaw kidoen kenyo egduyun te kandan pegkeotawun, meg-indan a heman kenyo tepad kanak. 19 Pelaban melomì se olo niyo, so gayed kaw egpenenalan te toladà te menge otaw wedad inenengen, 20 so mepakay diyà kenyo aw ellangen kaw dan, aw ebaten dan se kwarta niyo, aw egawen dan se kedònan niyo. Aw lomowan dan kenyo, pengkey menampak dan kenyo, mepakay diyà kenyo. 21 Meneng mikagi kaw besi te neyàyà a so eked a keibeg meg-iling kandan.
Na, so mebolot dan domuyun te kandan pegkeotawun, mebolot a den heman domuyun te kanak pegkeotawun, meneng iling a te otaw wedad inenengen te peg-indan ko kani. 22 Aw domuyun dan te kandan pegkeotawun so Judiyo dan, siak heman se sebad Judiyo. Aw ikegiyen dan te pinemallì te Timanem se kandan pongan te Israel, siak heman se sebad sakop te Israel. Aw domuyun dan te kandan pegkeotawun so sikandan se menge bowad-bowad i Abraham, siak heman se sebad bowad-bowad i Abraham. 23 Eg-ikagi dan te sikandan se menge sogounun i Cristo. Iling a te otaw migkebook so iduyun ko se kanak pegkeotawun, meneng siak se ontò sogounun i Cristo. Labi pa dakel se kanak neinang diyà kandan. Tandà te pegtoladà ko te kebenalan, melikit a egkelebosowen. Melikit a egbedasen, eked ko den kebilang. Melikit a agpet egkematay. 24 Mekelima a bedasi te menge doma ko Judiyo te ketlowan teg siyam a kesogat te kelikit te badas. 25 Meketelo a pekeokit te binonalan te kayo. Mekesebad a bontogi te bato amon matay. Meketelo kebàti se dakel belangay sinekayan ko. Sebad se aldaw aw sebad se delem te limepaw a doton te lawod. 26 Medita se kelimahan neokitan ko te peglegeb. Egbatas a te miglaneg. Egkità a te menge megdedempasay. Doen menge Judiyo aw menge otaw kenà Judiyo ibeg mengimatay kanak. Medita se kelimahan neokitan ko doton te lonsod, aw doton te wedad otaw eg-ogpà, aw diyà te dagat. Pinemilang a heman te otaw egpelingo-lingo te egtaking dan ki Cristo. 27 Seini heman se menge neokitan ko. Ontò a migkelomay tandà te terbaho ko. Melikit a kenà egpeketedogi te delem. Egbellosen a, egkelao a, aw melikit kenà botong se kànen ko aw penenaktun. Neketayod a te wedad heman eg-ogpaan ko. 28 Doen heman medita doma kelimahan neokitan ko, meneng eked ko den indani. Te kelikit te aldaw, gayed pa doen ketetana ko tepad te doma tadon nemenal ki Cristo doton te teg sebad-sebad lonsod. 29 Aw doen olò sebad otaw melomay se pegpemenal din, ontò ko ibeg tebangan sikandin. Na, aw doen sebad otaw nemenal meg-inang te salà, ontò a egkeopal diyà te otaw migboyo kandin.
30 Na, eked a keibeg domuyun te kanak pegkeotawun, meneng aw meleges a domuyun te kanak pegkeotawun, ipekità ko olò se menge kelomayan ko. 31 Kenà kebolalaw se indan ko, aw netegahan iyan te Timanem, Amay te Pengolo tadon si Jesu Cristo. Iduyun sikandin te wedad temanan. 32 Iindan ko se tepad te neokitan ko doton te lonsod te Damasko kedengan. Doen sebad gobirnador kidoen insawol te sebad selotan si Aretas. Insogò din se menge sondalo megbangan kanak doton te dalan amon dekepen a. 33 Meneng se menge doma ko, in-awop a dan diyà te dakel boliyas. Penga niyan, impelowà a dan lekat diatas te melangkaw alad nekelibed te lonsod sìyan. Intonton a dan doton te lowà. Yan nekekadas a.
