1 Menge kedowa day, wedad den keilangan te pegsolat day kenyo tepad te aldaw aw kano iyan ketoman, 2 so ontò niyo den netegahan te domateng se aldaw te peglikò te Pengolo tadon iling te pegdateng te menenakaw te tengà te delem aw wedad egpeketagad. 3 Aw mikagi se menge otaw te wedad samok aw wedad kelemitanan, yan pegketà detengan dan te mekebebaet, iling te pegtebò te mesakit domateng te bayi agpet tebawan. Eked dan pekelowà lekat kenyan. 4 Meneng sikiyo menge kedowa day, kenà kaw diyà te kengitngitan, aw eked kaw kepela tandà te pegdateng te aldaw te peglikò te Pengolo tadon. Eked kaw kepela kenyan iling te otaw mepela te pegdateng te menenakaw. 5 So sakop kaw i Cristo, sikiyo se otaw te kelowahan aw aldaw. Kenà kidon otaw te delem aw kengitngitan. 6 Yan se doun te keilangan eked kidon peg-iling te menge otaw kenà egpemenal, so iling dan te otaw egtedogi. Meneng keilangan iling kidon te otaw egkeloka aw egpeketagad. 7 Delem se pegtedogi te otaw, aw delem heman se pegkelasing dan. 8 Meneng sikitadon se otaw te aldaw, aw yan keilangan egpeketagad kidon. Aw gayed kidon egsalig diyà te Timanem aw egpedekelay kidon te pedowan, yan se iling te ikelasag te lawa tadon, aw iling te telandà kinis se pegpeliman tadon te pegpelowà te Timanem kenitadon lekat te pelumun. 9 Pinemallì kidon te Timanem kenà amon ipelumun kidon din, meneng amon ipelowà kidon din lekat te pelumun pineokit te Pengolo tadon si Jesu Cristo. 10 Simelilin sikandin kenitadon aw nematay amon meg-ogpà se kedita tadon doma din pengkey nematay kidon aw wedà kidon pa kematay te peglikò din. 11 Yan pegpeentagay kaw te pedowan, aw pegpetebangay kaw, iling te eg-inangen niyo den.

12 Menge kedowa day, doen pa ipunù day kenyo te keilangan segmanen niyo se menge otaw egpengibing kenyo, sìyan measeb otaw pinemallì te Pengolo tadon amon mengibing dan aw megtoladà dan kenyo. 13 Keilangan ontò kaw megsagman kandan aw ontò dakel se pedowan niyo kandan tandà te eg-inangen dan doton kenyo. Keilangan eked kaw pegpedindilay.

14 Menge kedowa day, ibeg day megpunù kaw te menge otaw metaka te keilangan megpekeaseb dan. Peg-antag kaw te pedowan te menge otaw migkegenaw se pedowan. Pegtabang kaw te menge otaw kenà melobos se pegtaking dan te Timanem. Pekeleyati niyo se pedowan niyo diyà te kedita te otaw. 15 Ikà niyo eg-inang te medaet diyà te menge otaw eg-inang te medaet diyà kenyo, meneng keilangan gayed kaw meg-inang te mèpiya diyà te menge doma otaw egpemenal aw diyà heman te kedita te otaw.

16 Keilangan gayed meluba se pedowan niyo. 17 Keilangan gayed kaw megtawal-tawal diyà te Timanem. 18 Keilangan gayed kaw megpesiontong diyà kandin pengkey eden se domateng kenyo. Yan se ibeg te Timanem inangen niyo pineokit ki Jesu Cristo.

19 Ikà niyo egsagda te eg-inangen te Espiritu Santo. 20 Ikà niyo egkulu te kagi ikeliwat te Timanem kenyo, 21 meneng peg-ahà kaw aw keseligan se kedita. Aw keseligan se kagi ikeliwat kenyo, tolò kaw kenyan. 22 Meneng pegpekediyò kaw lekat te kedita te medaet.

23 Ibeg day, ontò kaw linisan te Timanem egpemegay te kelinaw te pedowan. Ibeg day tonggoan din heman se pedowan niyo, aw aneng-aneng niyo, aw lawa niyo, amon wedad palos isila kenyo te peglikò te Pengolo tadon si Jesu Cristo. 24 Tomanen iyan te Timanem nemallì kenyo, so egkeseligan sikandin.

25 Menge kedowa day, pegtawal-tawal kaw heman diyà te Timanem tepad kenami.

26 Pegpeliyagay kaw se kedita niyo egpemenal, so yan se pengilala te egpedekelay kidon te pedowan.

27 Lekat te Pengolo tadon se punù ko kenyo seini. Pegbasa kaw te solat seini diyà te kedita te otaw egpemenal kidoen kenyo.

28 Ibeg ko, tebangan kaw te Pengolo tadon si Jesu Cristo.

<- 1 Tesalonika 4