1 Nayan, doen ipunù ko diyà te kedita niyo egpengibing te simbahan, so siaken heman se sebad egpengibing te simbahan. Kinità ko se pegpemilang ki Cristo kedengan, aw kitaen ko pa heman se kelangkaw din, so lomikò sikandin te eked kenamay. 2 Peg-ipat kaw te menge otaw egtoledaan niyo, so insalig dan te Timanem diyà kenyo. Peg-ipat kaw kandan kenà lekat te pegkeleges, meneng lekat te kèpiya te pedowan niyo, so yan se ibeg te Timanem kenyo. Pengibing kaw kandan kenà amon tendanan kaw, meneng keilangan meagka se pedowan niyo te pegtabang niyo kandan. 3 Ikà niyo egleges te menge otaw egtoledaan niyo, so insalig dan te Timanem diyà kenyo. Keilangan metòlid se eg-inangen niyo, so sikiyo se peg-ilingan dan. 4 Aw lomikò si Cristo Pengolo te kedita niyo egpengibing te simbahan, doen mèpiya ontong ibegay din diyà kenyo eked palos pegkedaet te wedad temanan.

5 Sikiyo heman menge kaling otaw, keilangan toloen niyo se menge egpengibing te simbahan. Ikà niyo egpelangkaw-langkaw, meneng keilangan megpedanà se kedita niyo diyà te menge doma niyo, so doen kagi te Timanem insolat te meinang poon te Timanem se otaw egpelangkaw-langkaw, meneng egtebangan din se otaw egpedanà. 6 Yan keilangan megpedanà kaw diyà te Timanem Metolos, so aw domateng se aldaw pinemallì din, inangen kaw din melangkaw. 7 Pengkey eden se ketetana niyo, salig kaw gayed diyà kandin, so sikandin se eg-ipat kenyo.

8 Peg-ahà kaw. Keilangan megpeketagad kaw, so egpengemahà se poon tadon si Satanas te otaw pegbàtan din, iling te liyon binallos gayed egpengemahà te okadan niyan aw kànen. 9 Salig kaw diyà te Timanem, aw ato kaw ki Satanas, so netegahan niyo te kenà olò sikiyo se egdetengan te kelimahan, meneng nelimahan heman se kedita te doma niyo egpemenal dini lanto te tanà. 10 Pengkey nelimahan kaw den seini, meneng mepenga iyan te eked kenamay. Gayed egtabang se Timanem, aw tinawal kaw din amon megdoma kaw kandin te wedad temanan tandà te pegsebad niyo diyà ki Cristo. Penga te pegtayod niyo te kelimahan, Timanem se meg-inang kenyo mesikop aw domasel, aw sikandin se memegay kenyo te eneg din. 11 Sikandin se lomowan te wedad temanan. Metoman iyan.

12 Si Silas se migtelaban kanak te pegsolat ko kani. Sikandin se kedowa tadon te pegpemenal, aw netegahan ko te egkeseligan sikandin. Pengkey pilabok se kagi ko kenyo seini, meneng impesolat ko ini amon meantag se pedowan niyo. Ibeg ko ketegahan niyo te seini se kebenalan ingkeliwat ko diyà kenyo tepad te tabang te Timanem kenitadon. Peg-aneng-aneng kaw gayed tepad kenyan.

13 Eg-eneng-enengen kaw te kedita te otaw pinemallì te Timanem aw migpesakop diyà kandin dini te lonsod te Babilonya. Eg-aneng-aneng heman si Marcos kenyo. Iling sikandin te batà ko. 14 Pegpeliyagay kaw se kedita niyo egpemenal, so yan se pengilala te egpedekelay kidon te pedowan.

Ibeg ko, doen kelinaw te pedowan te kedita niyo migpesakop diyà ki Cristo.

<- 1 Pedro 4