'EMEO 8

Yeyox yã yũmũ yõg 'ãmãnex xe'ẽgnãg

1 Yeyox mũn yũmũ yõg 'ãmãnex xe'ẽgnãg, yã pexkox tu' xip, tu Topa xexka xe'ẽgnãg yĩpxe'e hã' yũm, nũy nõm mũtik tu xexka'. Yã hãmyũmmũg xe'e 'õhõm. 2 Hõmã hãmyãxatamuk xohix 'ĩhã Yoneo yõg 'ãmãnex te Topa pet hã mõ'nãhã', tikmũ'ũn te nõm pet mĩy topixxax ka'ok hã, pu tu xokxop hep 'ũm nũnnãy. Pãyã yũmũ yõg 'ãmãnex xat'ax, tu' hãm pexkox kopah, yã nõ'õm Topa xip'ax xe'e', tu pexkox tu' yũm.

3 Topa te 'ãmãnex xat'ax xop xohix yĩmõgatux, pu hãpxop xix xokxop mõ'hap, nũy Topa pu haxyã', nũy Topa pu' hõm, yĩy yũmũ yõg 'ãmãnex xat'ax hãm kamah, nũy Topa pu yãy mũn hõm, nũy yũmũg xohix pupi tu xok. 4 Pax pu Yeyox hãm tu' xihip, puxix yũmũ'ã hã 'ãmãnex hok. Yã Mõyyex te' xat, pu mõnãyxop Nemi mõkputox tu tu' hãm, nũy mõ xokxop hãp, nũy Topa pu' haxyã', ha Yeyox yã Nemi yõg xop hã' puknõg. 5 Ha Topa te Mõyyex xat, pu topixxax ka'ok xexka hã Topa pet mĩy, tu' mĩy'ax yũmmũgãhã', ha' mĩy, ha' pet te pexkox yõg pet hã pet komut. 6 Pa Yeyox te 'ãmãnex yõg hãpxopmã'ax mĩy, tu' mãynãg mĩy, yã 'ãmãnex xat'ax xe'ẽgnãg, hu' pa'ax tup mĩy Topa mũtik, xix tikmũ'ũn mũtik, Topa te hãm'ãktux xex ha' pa'ax mĩy. Yã pa'ax hittap yõg max miax, ha pa'ax tup yõg max xe'ẽgnãg.

7 Pax pu' pa'ax hittap tu ka'ok xe'ẽgnãg, puxix pa'ax tup mĩy hok, 8 pãyã Topa te tikmũ'ũn yũmmũg, ha hãpxopmã kummuk punethok, yĩy Topa te:

“'Ãmnĩy mõ'nãp-tup, 'ĩhã 'ãte pa'ax tup mĩy'ax,

'Iyaet yõg tikmũ'ũn mũtik mĩy'ax,

xix Yona yõg tikmũ'ũn mũtik mĩy'ax.

9 Yã' pa'ax nõy, 'ũtup, ha 'ãte nõm hittap mĩy mõnãyxop mũtik,

nũy mõgã', nũy hãpxexka 'Eyit tu 'ũxupmã',

pa mõnãyxop tek xaxok, tuk pa'ax xaxok kamah,

yĩy 'ãtep-tup nõg,” kaxĩy.

10 Tu xe hãm'ãktux, hu:

“'Ãte pa'ax tup mĩy putup,

tu 'Iyaet yõg tikmũ'ũn mũtik yõgnũ hãm'ãktux xex putup,

'ãte tikmũ'ũn putox tu' xex putup, xi' kuxa kopa' xex,

'ãte nõm tikmũ'ũn hã Topah,

hak mũn hã yã tikmũ'ũn xe'e, 'ũyãnãn tu'.

11 Tute hãmyũmmũg putup, yã' xohix tek yũmmũg putup,

hu' nõy yũmmũgã'ax hitop tu',

'a hãm'ũm 'ãktux putup'ah, nũy: ‘Topa yũmmũg.’ Kaxĩy.

Yã' xohix tek yũmmũg putup, 'ũk-tõgnãg xop tek yũmmũg nãm,

ha mõktu xexka xop tek yũmmũg nãm.

12 Ha 'ãte hãpkummuk mĩy'ax xaxogãp-tup, pu tu kux,” kaxĩy.

13 Hãpxop kutut te yãy xaxogã tãmnãg, Topa te' pa'ax hittap kux, ha yãy xaxogã'ax, yĩy pa'ax tup mĩy.

<- 'EMEO 7 'EMEO 9 ->